ຄະ​ນະ​ກໍາ​ມາ​ທິ​ການ​ລະ​ຫວ່າງ​ລັດ​ຖະ​ບານ​ອາ​ຊຽນວ່າ​ດ້ວຍ​ສິດ​ທິ​ມະ​ນຸດ (ASEAN Intergovern-mental Commission on Human Rights ຫຼື AICHR) ໄດ້​ຈັດ​ກອງ​ປະ​ຊຸມ​ຂຶ້ນ ​ລະ​ຫວ່າງວັນ​ທີ 27-28 ຕຸ​ລາ 2016 ທີ່ ຮ່າ​ໂນ້ຍ, ສ​ສ ຫວຽດ​ນາມ ​ພາຍ​ໃຕ້​ການ​ເປັນ​ປະ​ທານ​ຂອງ​ທ່ານ ພູ​ໂຂງ ສີ​ສຸ​ລາດ, ຫົວ​ໜ້າ​ກົມ​ສົນ​ທິ​ສັນ​ຍາ​ ແລະ ກົດ​ໝາຍ, ກະ​ຊວງ​ການ​ຕ່າງ​ປະ​ເທດ, ປະ​ທານ​ຄະ​ນະ​ກຳ​ມາ​ທິ​ການ​ລະ​ຫວ່າງ​ລັດ​ຖະ​ບານ​ອາ​ຊຽນ​ວ່າ​ດ້ວຍ​ສິດ​ທິ​ມະ​ນຸດ ໂດຍ​ມີ​ຜູ້​ຕາງ​ໜ້າ​ຂອງ​ປະ​ເທດ​ສະ​ມາ​ຊິກ​ອາ​ຊຽນ ແລະ ເຈົ້າ​ໜ້າ​ທີ່​ກອງ​ເລ​ຂາອາ​ຊຽນ​ເຂົ້າ​ຮ່ວມ.

     ກອງປະຊຸມຄະນະກໍາມະການຊາຍແດນຮ່ວມ ລາວ-ຈີນ ຄັ້ງທີ 14 ໄດ້ຈັດຂຶ້ນໃນລະຫວ່າງວັນທີ 25-29 ຕຸລາ 2016 ທີ່ ນະຄອນເຊິນເຈິນ, ສປ.ຈີນ, ຊຶ່ງຄະນະຜູ້ແທນຝ່າຍລາວ ນຳໂດຍ ທ່ານ ແພງສະຫວັນ ແກ້ວປະເສີດ,​ ຫົວໜ້າຫ້ອງການຄະນະກໍາມະການຊາຍແດນແຫ່ງຊາດ, ກະຊວງການຕ່າງປະເທດ ແຫ່ງ ສປປ.ລາວ, ​ຫົວໜ້າຄະນະກໍາມະການຊາຍແດນຮ່ວມ ລາວ-ຈີນ ແລະ ຝ່າຍຈີນ ນຳໂດຍ ທ່ານ ເຫີເຫວີຍ, ຮອງຫົວໜ້າກົມກິດຈະການຊາຍແດນ ແລະ ທະເລ, ກະຊວງການຕ່າງປະເທດ ແຫ່ງ ສປ.ຈີນ, ຫົວໜ້າຄະນະກໍາມະການຊາຍແດນຮ່ວມ ຈີນ-ລາວ ຝ່າຍຈີນ, ພ້ອມດ້ວຍຜູ້ຕາງໜ້າຈາກພາກສ່ວນກ່ຽວຂ້ອງຂອງສູນກາງ ແລະ ແຂວງທີ່ມີຊາຍແດນຕິດຈອດກັບ ສປ ຈີນ.

ໃນ​ວັ​ນ​ທີ 24 ຕຸ​ລາ 2016, ທີ່ ສະ​ໂມ​ສອນຂອງ​ມະ​ຫາ​ວິ​ທະ​ຍາ​ໄລ​ແຫ່ງ​ຊາດ, ວິທະຍາເຂດດົງໂດກ, ກະ​ຊວງ​ການ​ຕ່າງ​ປະ​ເທດ, ກົມ​ອົງ​ການ​ຈັດ​ຕັ້ງ​ສາ​ກົນ ​ໄດ້​ຈັດກອງ​ປະ​ຊຸມ​ເຜີຍ​ແຜ່ການຈັດຕັ້ງປະຕິບັດເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ (SDGs) ​ໃຫ້​ແກ່​ພະນັກງານຄູອາຈານແລະນັກ​ສຶກ​ສາ​ຈຳ​ນວນ 300 ກວ່າທ່ານຈາກມະ​ຫາ​ວິ​ທະ​ຍາ​ໄລ​ແຫ່ງ​ຊາດ ພາຍ​ໃຕ້​ການ​ເປັນ​ປະ​ທານ​ຂອງ​ທ່ານຄຳ​ອິນຄິດ​ຈະ​ເດດ, ຫົວ​ໜ້າ​ກົມ​ອົງ​ການ​ຈັດ​ຕັ້ງ​ສາ​ກົນ, ກະ​ຊວງ​ການ​ຕ່າງ​ປະ​ເທດທັງ​ເປັນ​ຫົວ​ໜ້າ​ກອງ​ເລ​ຂາ​ຄະ​ນະ​ຊີ້​ນຳ​ລະ​ດັບ​ຊາດເພື່ອຕິດຕາມ​ການ​ຈັດ​ຕັ້ງ​ປະ​ຕິ​ບັດ​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ​ໂດຍ​ມີທ່ານ ຮສ. ປອ. ອຸດົມ ພອນຄໍາເພັງ,ຮອງອະ​ທິ​ການ​ບໍ​ດີມະ​ຫາ​ວິ​ທະ​ຍາ​ໄລ​ແຫ່ງ​ຊາດ ໃຫ້​ກຽດ​ເປັນ​ປະ​ທານ​ຮ່ວມ. ກອງ​ປະ​ຊຸມ​ໄດ້​ຮັບ​ຟັງໄດ້ຮັບຟັງການບັນລະຍາຍໂດຍວິທະຍາກອນຈາກກົມອົງການຈັດຕັ້ງສາກົນ, ກະຊວງການຕ່າງປະເທດແລະກົມແຜນການ, ກະຊວງແຜນການແລະການລົງທຶນກ່ຽວກັບເປົ້າຫມາຍການພັດທະນາແບບຍືນຍົງ ແລະ ການເຊື່ອມສານເປົ້າໝາຍດັ່ງກ່າວເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 8 ກໍຄືຍຸດທະສາດການພັດທະນາເສດຖະກິດ-ສັງຄົມ ຮອດປີ 2025 ແລະ ວິໄສທັດ ປີ 2030 ຂອງ ສປປ ລາວ ເພື່ອໃຫ້ຜູ້ເຂົ້າຮ່ວມທັງຫມົດມີຄວາມຮັບຮູ້ ແລະ ເຂົ້າໃຈກ່ຽວກັບເປົ້າຫມາຍການພັດທະນາຂອງສາກົນ ແລະ ຂອງປະເທດເຮົາ.​