ໃນວັນທີ 28 ມິຖຸນາ 2024, ທີ່ ກະຊວງການຕ່າງປະເທດ ໄດ້ມີພິທີມອບ-ຮັບ ເງິນສະໜັບສະໜູນການເປັນປະທານອາຊຽນຂອງ ສປປ ລາວ ໃນປີ 2024, ຈໍານວນ 1 ຕື້ ກີບ ຈາກ ບໍລິສັດ ເທີນ ຫີນບູນ ພາວເວີ ຈໍາກັດ, ໂດຍຕາງໜ້າໃຫ້ລັດຖະບານ ສປປ ລາວ ແມ່ນ ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ, ໃນນາມຮອງຫົວໜ້າອະນຸກໍາມະການຂົນຂວາຍການຊ່ວຍເຫຼືອ ສໍາລັບປະທານອາຊຽນ ຂອງ ສປປ ລາວ ໃນປີ 2024 ເປັນຜູ້ຮັບ ແລະ ທ່ານ ຈີ່ຊົ່ງ ຈືຫວ່າໄຊກິ, ຜູ້ອໍານວຍການໃຫຍ່ ບໍລິສັດ ເທີນ ຫີນບູນ ພາວເວີ ຈໍາກັດ ໄດ້ຕາງໜ້າບໍລິສັດ ມອບເງິນຊ່ວຍເຫຼືອດັ່ງກ່າວ. 

ໃນຕອນເຊົ້າຂອງວັນທີ 20 ມິຖຸນາ 2024, ກົມເສດຖະກິດ, ກະຊວງການຕ່າງປະເທດ ໄດ້ຈັດກອງປະຊຸມປຶກສາຫາລື “ວຽກງານການທູດເສດຖະກິດ ຮ່ວມກັບບັນດາ 05 ແຂວງພາກກາງ ແລະ 02 ແຂວງພາກເໜືອ” ຂຶ້ນທີ່ ແຂວງສະຫວັນນະເຂດ, ພາຍໃຕ້ການເປັນປະທານຮ່ວມໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ປອ ແສນສັກ ສຸລິສັກ, ຮອງເຈົ້າແຂວງ ສະຫວັນນະເຂດ, ພ້ອມດ້ວຍບັນດາຜູ້ຕາງໜ້າຈາກບັນດາພະແນກການຕ່າງໆທີ່ກ່ຽວຂ້ອງ ທີ່ມາຈາກ 05 ແຂວງພາກກາງ ແລະ 02 ແຂວງພາກເໜືອ ເຂົ້າຮ່ວມທັງໝົດ ຈໍານວນ 110 ທ່ານ.