ໃນວັນທີ 15 ພຶດສະພາ 2020 ຜ່ານມາ, ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ຈັດພິທີເປີດປື້ມໄວ້ອາໄລເຖິງດວງ ວິນຍານ ສະຫາຍ ພົນເອກ ສີສະຫວາດ ແກ້ວບຸນພັນ, ໂດຍໄດ້ມີຄະນະການນຳຂັ້ນ​ສູງພັກ, ລັດ ສສ ຫວຽດນາມ ປະກອບມີ: ສະຫາຍ ເຈືອງ ຮວ່າ ບິ່ງ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ຜູ້ປະຈຳການລັດຖະບານ ພ້ອມດ້ວຍຄະນະຕິດຕາມ ປະກອບມີ ສະຫາຍ ນາງ ຕ່ອງ ທິ ຟ້ອງ, ກຳມະການກົມການເມືອງສູນກາງພັກ, ຮອງປະທານ ຜູ້ປະຈຳການສະພາແຫ່ງຊາດຫວຽດນາມ, ສະຫາຍ ຟ້າມ ມີງ ຈີ້ງ, ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ສະຫາຍ​ເຫົາ​ອາ​ເລັ່ງ, ຮອງປະທານແນວໂຮມປະເທດຊາດຫວຽດນາມ, ສະຫາຍ ຟ້າມ ບີ່ງ ມີງ ຄະນະກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ, ຄະນະພົວພັນຕ່າງປະເທດສູນກາງພັກຄອມມູນິດຫວຽດນາມ ພ້ອມດ້ວຍຄະນະ​ຂອງບັນດາກະຊວງອົງການຈຳນວນ 32 ຄະນະ ພິ​ເສດ​ສະຖານທູດ​ຍັງ​ໄດ​ຮັບ​ພວງ​ມາລາ​ຂອງ ສະຫາຍ​ຫງວຽນ​ຟູ່ຈ້ອງ, ເລຂາທິການ​ໃຫຍ່ ປະທານ​ປະ​ເທດ ແຫ່ງ ​ສສ. ຫວຽດນາມ; ພ້ອມນີ້, ກໍ່ຍັງມີບັນດາ ທ່ານເອກອັກຄະລັດຖະທູດຕ່າງປະ​ເທດ​ປະຈຳ​ຫວຽດນາມ​ຈຳນວນ​ໜຶ່ງ ໄດ້ເຂົ້າວາງພວງມະລາ ແລະ ເຊັນປື້ມເພື່ອໄຫວ້ອາໄລແດ່ ດວງວິນຍານຂອງ ສະຫາຍ ພົນເອກ ສີສະຫວາດ ແກ້ວບຸນພັນ ອະດິດກໍາມະການ ສູນກາງພັກສະໄໝທີ I, II, III, IV, V, VI, VII ແລະ VIII, ອະດີດເລຂາທິການສູນກາງ ພັກສະໄໝທີ III ແລະ IV, ອະດີດກໍາມະການກົມການເມືອງສູນກາງພັກ ສະໄໝທີ IV, VI, VII ແລະ VIII, ອະດີດນາຍົກລັດຖະມົນຕີ, ອະດີດຮອງປະທານປະເທດ, ອະດີດປະທານສູນກາງແນວລາວສ້າງຊາດ,  ເພື່ອສະແດງເຖິງຄວາມຮູ້ບຸນຄຸນ ແລະ ອາໄລອາວອນຢ່າງສຸດຊຶ້ງ ຕໍ່ການຈາກໄປຂອງສະຫາຍ ພົນເອກ ສີສະຫວາດ ແກ້ວບຸນພັນ ຢ່າງບໍ່ມີມື້ກັບຄືນມາ.

ໃນໂອກາດດຽວກັນນີ້, ສະຫາຍ ​ແສງ​ເພັດ ​ຮຸ່ງ​ບຸນ​ຍວງ, ເອກອັກຄະລັດຖະທູດວິສາມັນຜູ້​ມີ​ອຳນາດ​ເຕັມ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ສະແດງຄວາມຂອບໃຈ ແລະ ມີຄວາມຊາບຊຶ້ງເປັນຢ່າງຍິ່ງຕໍ່ ສະຫາຍ ເຈືອງ ຮວ່າ ບິ່ງ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ຜູ້ປະຈຳການລັດຖະບານ ພ້ອມດ້ວຍບັນດາ​ສະຫາຍ​ການ​ນຳຂັ້ນສູງພັກ-ລັດ ຫວຽດນາມ ໄດ້ຕາງໜ້າໃຫ້ຄະນະບໍລິຫານງານ ສູນກາງພັກກອມມູນິດຫວຽດນາມ, ລັດຖະບານແຫ່ງ ສສ. ຫວຽດນາມ ແລະ ປະຊາຊົນຫວຽດນາມ ທີ່ໄດ້ມາເຂົ້າຮ່ວມ ພິທີວາງພວງມາລາ ແລະ ຂຽນ​ປື້ມໄຫວ້ອາໄລ ຕໍ່ການເສຍຊີວິດຂອງ ສະຫາຍ ພົນເອກ ສີສະຫວາດ ແກ້ວບຸນພັນ.

ໃນວັນທີ 15 ພຶດສະພາ 2020, ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ຣາຊະອານາຈັກ ກໍາປູເຈຍ ທີ່ມີສໍານັກງານຕັ້ງຢູ່ ນະຄອນຫຼວງພະນົມເປັນ ຮ່ວມກັບສະຖານກົງສູນໃຫຍ່ ແຫ່ງ ສປປ ລາວ ປະຈໍາຢູ່ແຂວງຊຽງແຕງ, ຣາຊະອານາຈັກ ກໍາປູເຈຍ ໄດ້ຈັດພິທີເຊັນປື້ມໄຫວ້ອາໄລເຖິງດວງວິນຍານຂອງ ທ່ານ ພົນເອກ ສີສະຫວາດ ແກ້ວບຸນພັນ, ອາດີດສະມາຊິກພັກຄອມມຸຍນິດອິນດູຈີນ, ອາດີດກໍາມະການກົມການເມືອງສູນກາງພັກປະຊາຊົນ ປະຕິວັດລາວ, ອາດິດຮອງປະທານປະເທດ ແລະ ອາດີດນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ໄດ້ເສຍຊີວິດ ໃນວັນທີ 12 ພຶດສະພາ 2020, ລວມອາຍຸໄດ້ 92 ປີ, ໂດຍການເຂົ້າຮ່ວມໃນພິທີດັ່ງກ່າວມີ ທ່ານ ອໍາໄພ ກິນດາວົງ, ເອກອັກຄະລັດຖະທູດ ແລະ ຫ້ອງການທີ່ປຶກສາທູດຝ່າຍປ້ອງກັນຊາດ ແຫ່ງ ສປປ ລາວ ປະຈໍາຣາຊະອານາຈັກ ກໍາປູເຈຍ ແລະ ທ່ານ ຄົມສອນ ຂຸນປະເສີດ, ກົງສູນໃຫຍ່ ພ້ອມດ້ວຍຄະນະເຂົ້າຮ່ວມຢ່າງພ້ອມພຽງ. ພ້ອມດຽວກັນນີ້, ທ່ານເອກອັກຄະລັດຖະທູດ ແລະ ທ່ານກົງສູນໃຫຍ່ ກໍ່ໄດ້ເຊັນປື້ມໄຫວ້ອາໄລຕໍ່ການຈາກໄປຂອງ ທ່ານ ພົນເອກ ສີສະຫວາດ ແກ້ວບຸນພັນ ຢ່າງບໍ່ມີວັນກັບຄືນມານັ້ນ, ເພື່ອແບ່ງເບົາຄວາມທຸກໂສກຕໍ່ການສູນເສຍບຸກຄົນສໍາຄັນຂອງລັດຖະບານ ແລະ ປະຊາຊົນລາວ ທັງເປັນການສູນເສຍຜູ້ນໍາຮຸ່ນທໍາອິດຂອງພັກ ແລະ ລັດເຮົາ ທີ່ໄດ້ອຸທິດຊີວິດຂອງຕົນ ໃນການຕໍ່ສູ້ກູ້ຊາດຕ້ານຈັກກະພັດລ່າເມືອງຂື້ນແບບເກົ່າ ແລະ ໃໝ່ ທ່ານເປັນນັກຮົບປະຕິວັດທີ່ອົງອາດກ້າຫານ, ມີນໍ້າໃຈເສຍສະຫຼະອັນສູງສົ່ງ ເປັນໜຶ່ງໃນບັນດານາຍທະຫານທີ່ນໍາພາ-ບັນຊາ ດີເດັ່ນ ເປັນທີ່ເຄົາລົບຮັກຂອງກໍາລັງປະກອບອາວຸດ ແລະ ປະຊາຊົນລາວບັນດາເຜົ່າ, ທ່ານເປັນການນໍາທີ່ມີແບບແຜນ ນໍາພາໃນພາລະກິດປະຕິວັດ ປົດປ່ອຍຊາດ, ປົກປັກຮັກສາ ແລະ ສ້າງສາລະບອບໃໝ່ ຄຸນງາມຄວາມດີຂອງທ່ານ ຈະຢູ່ໃນຄວາມຊົງຈໍາຂອງປວງຊົນລາວທັງຊາດ ຕະຫຼອດຊົ່ວກາລະນານ.

ໃນຕອນເຊົ້າວັນທີ 20 ພຶດ​ສະ​ພາ 2020, ກອງ​ປະ​ຊຸມ​ໃຫຍ່ ຄັ້ງ​ທີ III ຂອງໜ່ວຍ​ພັກ​ກົມອາຊຽນ ກະ​ຊວງ​ການ​ຕ່າງ​ປະ​ເທດ ໄດ້ໄຂຂຶ້ນຢ່າງເປັນທາງການ, ໂດຍການໃຫ້ກຽດເຂົ້າຮ່ວມ​​ເປັນປະທານຂອງ ສະຫາຍ ສະ​ເຫຼີມ​ໄຊ ກົມ​ມະ​ສິດ, ກໍາມະການສູນກາງພັກ, ເລ​ຂາຄະນະບໍລິຫານງານພັກ, ລັດຖະມົນຕີກະ​ຊວງ​ການ​ຕ່າງ​ປະ​ເທດ ແລະສະຫາຍລັດສະໝີແກ້ວມະນີ, ເລຂາໜ່ວຍພັກ, ຫົວໜ້າກົມອາຊຽນ. ເຂົ້າຮ່ວມກອງປະຊຸມຄັ້ງນີ້, ຍັງມີບັນດາສະຫາຍເລຂາ, ຮອງເລຂາ ແລະ ຜູ້ຕາງໜ້າໜ່ວຍພັກອ້ອມຂ້າງກະຊວງການຕ່າງປະເທດ, ແລະສະມາຊິກຜູ້ແທນສົມບູນ ແລະສຳຮອງຂອງໜ່ວຍພັກກົມ ເຂົ້າຮ່ວມຢ່າງພ້ອມພຽງ.