ໃນຕອນບ່າຍຂອງ ວັນທີ 19 ກຸມພາ 2020, ທີ່ ນະຄອນຫລວງປຣາກ, ທ່ານ ພົມມາ ບຸດທະວົງ, ໄດ້ເຂົ້າຍື່ນສານຕາຕັ້ງຕໍ່ ພະນະທ່ານ ມີໂລດສ ຊີແມນ, ປະທານາທິບໍດີ ແຫ່ງ ສາທາລະນະລັດ ເຊັກ, ເພື່ອດຳລົງຕໍາແໜ່ງເປັນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະນະລັດ ເຊັກ, ຊຶ່ງມີສຳນັກງານສະຖານທູດ ຕັ້ງຢູ່ນະຄອນຫລວງແບກແລງ, ສາທາລະນະລັດ ສະຫະພັນ ເຢຍລະມັນ.
ໃນໂອກາດດັ່ງກ່າວ, ທ່ານ ພົມມາບຸດ ທະວົງ, ໄດ້ນຳເອົາຄວາມຢື້ຢາມຖາມຂ່າວອັັນອົບອຸ່ນຂອງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຝາກເຖິງ ພະນະ ທ່ານ ມີໂລດສ ຊີແມນ, ປະທານາທິບໍດີ ແຫ່ງ ສາທາລະນະລັດ ເຊັກ ແລະ ປະຊາຊົນເຊັກ ທຸກຖ້ວນໜ້າ.
ພະນະທ່ານ ມີໂລດສ ຊີແມນ ກໍໄດ້ສະແດງຄວາມຊົມເຊີຍຕໍ່ ທ່ານ ພົມມາ ບຸດທະວົງ ທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງເປັນ ເອກອັກຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈໍາ ສາທາລະນະລັດ ເຊັກ, ພ້ອມທັງອວຍພອນໃຫ້ ທ່ານເອກອັກຄະລັດຖະທູດ ຈົ່ງປະສົບຜົນສຳເລັດໃນການເຄື່ອນໄຫວວຽກງານການທູດຂອງຕົນ. ພ້ອມດຽວກັນນີ້, ພະນະທ່ານ ປະທານາທິບໍດີ ມີໂລດສ ຊີແມນ ຍັງໄດ້ ຝາກຄວາມຢື້ຢາມຖາມຂ່າວ ມາຍັງພະນະທ່ານ ປະທານປະເທດ ບຸນຍັງ ວໍລະຈິດ ແລະ ປະຊາຊົນລາວ ນຳດ້ວຍ.
ໃນໂອກາດການຍື່ນສານ, ທ່ານທູດ ພົມມາ ບຸດທະວົງ ໄດ້ກ່າວສະແດງຄວາມຍີນດີ ຕໍ່ການພົວພັນ ແລະ ການຮ່ວມມືອັນດີມາເປັນເວລາຍາວນານ ລະຫວ່າງສອງປະເທດ, ຊຶ່ງໃນປີ 2020 ນີ້, ລາວ ແລະ ເຊັກ ໄດ້ມີ ສາຍພົວພັນການທູດນຳກັນ ຄົບຮອບ 58 ປີ (31/09/1962-31/09/2020). ທ່ານທູດ ພົມມາ ບຸດທະວົງ ໄດ້ຕາງໜ້າລັດຖະບານ ແລະ ປະຊາຊົນລາວ ກ່າວສະແດງຄວາມຂອບໃຈລັດຖະບານເຊັກ ທີ່ໄດ້ໃຫ້ການສະ ຫນັບສະຫນູນ ແກ່ ສປປ ລາວ ໃນເວທີສາກົນ, ໂດຍສະເພາະການເຂົ້າເປັນສະມາຊິກອົງການການຄ້າໂລກ (WTO) ຂອງລາວ ໃນໄລຍະຜ່ານມາ ແລະ ການຊ່ວຍເຫລືອທຶນການສຶກສາຈໍານວນຫນຶ່ງ ໃຫ້ແກ່ນັກສຶກສາລາວ ໄດ້ໄປສຶກສາຕໍ່ຢູ່ ສ. ເຊັກ.