ໃນ​ວັນ​ທີ 21 ມີນາ 2020, ເວລາ 13:30 ​ໂມງ ຕາມເວລາທ້ອງຖິ່ນ, ທີ່​ຫ້ອງປະຊຸມ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສ. ຣັດເຊຍ ໄດ້​ຈັດ​ກອງປະຊຸມໃຫຍ່ ຄັ້ງທີ IV ຂອງຫນ່ວຍພັກ ສະຖານທູດ ແຫ່ງ ສປປ ລາວ ປະຈຳ ສ. ຣັດເຊຍ ໂດຍປະຕິບັດຕາມມະຕິຕົກລົງ ຂອງຄະນະບໍລິຫານງານພັກ ກະຊວງການຕ່າງປະເທດ ສະບັບເລກທີ 377/ຄພ.ຕປທ., ​ລັງວັນທີ 16 ມີນາ 2020. ​ໃຫ້​ກຽດເຂົ້າຮ່ວມໃນກອງປະຊຸມໃຫຍ່ຄັ້ງນີ້ ມີສະ​ຫາຍ ປອ. ສີວຽງເພັດ ເພັດວໍຣະສັກ, ​ເລຂາ​ຄະນະ​ຫນ່ວຍ​ພັກ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສ. ຣັດເຊຍ, ມີຄະນະຫນ່ວຍພັກ, ສະມາຊິກພັກສົມບູນ ທີ່ມາຈາກສະຖານທູດລາວ ທີ່ມົດສະກູ ແລະ ສະມາຊິກພັກສົມບູນ ແລະ ສຳຮອງ ທີ່ເປັນນັກສຶກສາລາວ ໃນນະຄອນຫລວງມົດສະກູ, ມີຜູ້ຕາງໜ້າ 3 ອົງການຈັດຕັ້ງມະຫາຊົນ ເຊັ່ນ: ສະຫະພັນກໍາມະບານ, ສະຫະພັນ​ແມ່ຍິງ ແລະ ຊາວ​ໜຸ່ມປະຊາຊົນປະຕິວັດລາວຂອງສະຖານທູດ ​ເຂົ້່າຮ່ວມທັງ​ໝົດ 16 ສະຫາຍ, ຍິງ 3 ສະຫາຍ,​ໃນນັ້ນ ມີຜູ້ແທນສົມບູນ ຂອງກອງປະຊຸມໃຫຍ່ ທັງຫມົດ 12 ສະຫາຍ,​ ຍິງ 1 ສະຫາຍ.

ຜ່ານການດໍາເນີນກອງປະຊຸມໃຫຍ່ເປັນເວລາເຄິ່ງວັນ, ກອງປະຊຸມໄດ້ມີຜົນສຳເລັດ ແລະ ຕົກລົງເຫັນດີເປັນເອກະພາບກັນຮັບຮອງເອົາບົດລາຍງານການເມືອງ ຂອງໜ່ວຍພັກສະຖານທູດ ທີ່ມົດສະກູ, ຊື່ງໄດ້ຍົກໃຫ້ເຫັນຜົນງານ, ບົດຮຽນທີ່ຖອດຖອນໄດ້, ຈຸດດີ ແລະ ຂໍ້ຄົງຄ້າງທີ່ຈະຕ້ອງໄດ້ແກ້ໄຂ. ພ້ອມກັນນັ້ນ, ກອງປະຊຸມໃຫຍ່ ຍັງໄດ້ເຫັນດີເປັນເອກະພາບ ຮັບຮອງເອົາທິດທາງແຜນການເຄື່ອນໄຫວ ຂອງໜ່ວຍພັກໃນຕໍ່ໜ້າ. ໃນບົດລາຍງານການເມືອງ ຍັງໄດ້ສັງເກດຕີລາຄາຢ່າງເລິກເຊິ່ງຕໍ່ການຊີ້ນໍາ-ນໍາພາ ຂອງຄະນະໜ່ວຍພັກ ແລະ ການເຄື່ອນໄຫວຂອງໜ່ວຍພັກ ສະຖານທູດໃນໄລຍະຜ່ານມາ ເປັນຕົ້ນ: ການສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພັກ ແລະ ພະນັກງານ ໃຫ້ມີຄວາມເຊືອໜັ້ນຕໍ່ການນໍາພາຂອງພັກ ແລະ ໃຫ້ມີຄວາມໜັກແໜ້ນ,ມີຄວາມຕັ້ງໜ້າບຸກບືນ, ສູ້ຊົນຜ່ານຜ່າຄວາມຫຍຸ້ງຍາກດ້ວຍຄວາມຮັບຜິດຊອບສູງ ແລະ ປະສົບຜົນສຳເລັດໃນດ້ານຕ່າງໆ ເຊັ່ນ: ວຽກງານວິຊາສະເພາະ ແລະ ການເອົາໃຈໃສ່ຊີ້ນໍາ-ນໍາພາຕໍ່ອົງການຈັດຕັ້ງມະຫາຊົນ ແລະ ອື່ນໆ. ພ້ອມກັນນັ້ນ, ກໍ່ຍັງໄດ້ຮັບຮອງເອົາບົດລາຍງານ ການສໍາຫລວດການຊີ້ນໍາ-ນໍາພາຂອງຄະນະໜ່ວຍພັກຊຸດເກົ່າ ແລະ ໄດ້ຕີລາຄາສູງຕໍ່ການປະກອບສ່ວນ ຂອງຄະນະຫນ່ວຍພັກ ແລະ ສະມາຊິກພັກທັງຫມົດ ໃນໄລຍະຊຸມປີຜ່ານມາ ເຫັນວ່າມີຜົນງານໃນຫລາຍດ້ານເລື້ອຍໆມາ. ພ້ອມທັງໄດ້ຍົກໃຫ້ເຫັນຄວາມສາມັກຄີ ແລະ ຄວາມເປັນເອກະພາບກັນພາຍໃນໜ່ວຍພັກ ເຮັດສຳເລັດຫນ້າທີ່ການເມືອງຂອງຕົນ. ນອກຈາກນັ້ນ, ຜູ້ເຂົ້າຮ່ວມກອງປະຊຸມໃຫຍ່ໄດ້ພ້ອມກັນໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ແລະ ກອງປະຊຸມໃຫຍ່ຄັ້ງທີ IVຂອງຫນ່ວຍພັກສະຖານທູດ ແຫ່ງ ສປປ ລາວ ປະຈຳ ສ. ຣັດເຊຍໄດ້ຕົກລົງເຫັນດີ ເປັນເອກະພາບເລືອກເອົາບັນດາສະຫາຍດັ່ງລຸ່ມນີ້ເປັນຄະນະຫນ່ວຍພັກຊຸດໃຫມ່ ຄື :

1. ສະຫາຍ ປອ. ສີວຽງເພັດ ເພັດວໍຣະສັກ ເປັນເລຂາຫນ່ວຍພັກ.
2. ສະຫາຍ ພັອ. ບຸນຍົງ ພັນດານຸວົງ, ທີ່ປຶກສາຝ່າຍປ້ອງກັນຊາດ ເປັນຮອງເລຂາຫນ່ວຍພັກ.
3. ສະຫາຍ ລຽນທອງ ສຸພານີ, ທີ່ປຶກສາຝ່າຍເສດຖະກິດ-ການຄ້າ ເປັນກຳມະການກວດກາຫນ່ວຍພັກ.

ໃນກອງປະຊຸມ ຍັງໄດ້ຮັບຟັງການໂອ້ລົມຂອງ ສະຫາຍ ປອ ສີວຽງເພັດ ເພັດວໍຣະສັກ, ເລຂາໜ່ວຍພັກ, ​ເອກອັກຄະລັດຖະທູດ ແຫ່ງ ສປປ ລາວ ປະຈຳ ສ. ຣັດເຊຍ, ຊຶ່ງສະຫາຍໄດ້ສະແດງຄວາມຊົມເຊີຍຕໍ່ຜົນງານ ແລະ ຜົນສຳເລັດທີ່ຫນ່ວຍພັກສະຖານທູດຍາດມາໄດ້ ໃນໄລຍະຜ່ານມາ. ສະຫາຍ ຍັງໄດ້ເນັ້ນຫນັກໃຫ້ເອົາໃຈໃສ່ໃນການຍົກສູງຄຸນນະພາບ ທາງດ້ານວຽກງານການເມືອງ-ແນວຄິດ ຂອງສະມາຊິກພັກ-ພະນັກງານ, ເພີ້ມທະວີກໍ່ສ້າງພັກໃຫ້ເປັນໜ່ວຍພັກ ປອດໃສ, ເຂັ້ມແຂງ ແລະ ຫນັກແຫນ້ນ, ເຊີດຊູຄວາມເປັນແບບຢ່າງນຳຫນ້າ ຂອງສະມາຊິກພັກໃຫ້ພະນັກງານ, ປັບປຸງວິທີການນຳພາ ຂອງໜ່ວຍພັກ, ການເຄື່ອນໄຫວ ຂອງຫນ່ວຍພັກຕາມ 5 ຫລັກການ ຂອງພັກ, ການເຮັດສຳເລັດ 5 ຫນ້າທີ່ ຂອງພັກ ແລະ ການເອົາໃຈໃສ່ປະຕິບັດ 4 ຫລັກການ ໃນການເຄື່ອນໄຫວດຳເນີນຊີວິດ ຂອງໜ່ວຍພັກ ໃນແຕ່ລະເດືອນ ແລະ ອື່ນໆອີກ. ການໂອ້ລົມຄັ້ງນີ້ ຍັງເປັນເຂັມຊີ້ທິດເຍືອງທາງ ແລະ ມີຄຸນຄ່າສູງ ໃຫ້ແກ່ຄະນະໜ່ວຍພັກ, ສະມາຊິກພັກສະຖານທູດ ແລະ ນັກສຶກສາລາວ ທີ່ມົດສະກູ ໃນການຈັດຕັ້ງປະຕິບັດຫນ້າທີ່ການເມືອງ ຂອງຕົນ, ທິດທາງການເຄື່ອນໄຫວໃນຕໍ່ຫນ້າຂອງໜ່ວຍພັກ ແລະ ການສ້າງຂະບວນການຕ່າງໆ ເພື່ອຂ່ຳນັບຮັບຕ້ອນກອງປະຊຸມໃຫຍ່ ຂອງຄະນະບໍລິຫານງານພັກ ກະຊວງການຕ່າງປະເທດ ທີ່ຈະໄຂຂຶ້ນໃນຕໍ່ໜ້າ. ກອງປະຊຸມໃຫຍ່ໄດ້ປິດລົງໃນເວລາ 17:00 ໂມງ ຂອງວັນດຽວກັນ ດ້ວຍຜົນສໍາເລັດອັນຈົບງາມ.