ຕອນ​​ແລງວັນທີ 13 ພຶດສະພາ 2020 ຢູ່ທີ່ສະພາ​ແຫ່ງ​ຊາດ​ຫວຽດນາມ​ ໄດ້​ມີ​ພິທີມອບ-​ຮັບ​ເຄື່ອງ​ຊ່ວຍ​ເຫຼືອການແພດຈາກສະພາ​ແຫ່ງ​ຊາດຫວຽດນາມໃຫ້ແກ່ ສປປ ລາວ, ກຳປູ​ເຈຍ, ອິນ​ໂດ​ເນ​ເຊຍ, ມາ​ເລ​ເຊຍ, ຟີ​ລິບ​ປິນ, ສິງກະ​ໂປ ​ແລະ ຍີ່ປຸ່ນ ເຄື່ອງ​ຊ່ວຍ​ເຫຼືອ​ດັ່ງກ່າວ​​ເປັນຜ້າ​ອັດ​ປາກກາ​ນ​ແພດ. ​ເພື່ອປ້ອງກັນ ພະຍາດອັກເສບປອດ ສາຍພັນໃຫມ່ (COVID-19).

ກ່າວມອບໂດຍແມ່ນ ສະຫາຍ ຫງວຽນ​ແຫ້ງ​ຟຸກ, ກຳມະການ​ສູນ​ກາງ​ພັກ, ຫ​ົວໜ້າ​ຫ້ອງວ່າການສະພາ​ແຫ່ງ​ຊາດ​ຫວຽດນາມ, ​ສະຫາຍ ​ແສງ​ເພັດ​ ຮຸ່ງ​ບຸນ​ຍວງ, ​ເອກ​ອັກຄະ​ລັດຖະທູດ ວິສາມັນ​ຜູ້​ມີ​ອຳນາດ​ເຕັມ ​ແຫ່ງ​ ສປປ ລາວ ປະຈຳ ສສ.ຫວຽດນາມ ​ໄດ້​ຕາງໜ້າ​ໃຫ້​ບັນດາ​ເອກ​ອັກຄະ​ລັດຖະທູດ​ຂອງ​ປະ​ເທດ​ທີ່​ໄດ້​ຮັບ​ເຄື່ອງ​ຊ່ວຍ​ເຫຼືອ​ມີ​ຄຳ​ເຫັນ​ກ່າວ​ຮັບ​ໂດຍ​ໄດ້​ຍົກ​ໃຫ້​ເຫັນ​ຜົນ​ກະທົບ​ອັນ​ຮ້າຍ​ແຮງ​ຂອງພະຍາດອັກເສບປອດສາຍພັນໃຫມ່ (COVID-19) ທີ່​ກຳລັງ​​ແຜ່​ລະບາດ​​ເປັນ​ວົງ​ກວ້າ​ງ​ໃນ​ທົ່ວ​ໂລກ​​, ພ້ອມ​ດຽວ​ກັນ​ນັ້ນ​ຍັງໄດ້ຕີ​ລາຄາ​ສູງຕໍ່ຜົນສຳ​ເລັດ​ອັນ​​ໃຫຍ່ຫຼວງ​ຂອງ​ພັກ, ລັດຖະບານ ​ແລະ ປະຊາຊົນ​ຫວຽດນາມຍາດມາ​ໄດ້​​ໃນ​ການ​ສະກັດ​ກັ້ນ, ຢັບຢັ້ງ, ຈຳກັດ​ພະຍາດ​ທີ່​ຮ້າຍ​ແຮງ​ດັ່ງກ່າວ, ​ ຊຶ່ງຫວຽດນາມ​ໄດ້ກາຍ​ເປັນ​ແວ່ນ​ແຍງ ​ແລະ ​ໄດ້​ຮັບ​ການ​ຍ້ອງຍໍ​ຊົມ​ເຊີຍ​ຈາກ​ບັນດາປະ​​ເທດ​ໃນ​ໂລກ.

​​ເຖິງ​ແມ່ນ​ວ່າ​ຫວຽດນາມ​ຍັງ​ປະສົບ​ກັບ​ຄວາມ​ຫຍຸ້ງ​ຍາກ ​ແລະ​ ​ໄດ້​ຮັບ​ຜົນ​ກະທົບ​ຈາກ​ການລະບາດ​​ພະຍາດອັກເສບປອດ ສາຍພັນໃຫມ່ (COVID-19) ກໍ່ຕາມ ​ແຕ່ຫວຽດນາມ​ຍັງ​ໄດ້​ບິ​ແບ່ງຊ່ວຍເຫຼືອ ​ທັງ​ວັດຖຸ​ອຸປະກອນການ​ແພດ ​ແລະ ບົດຮຽນ​, ​​ໃນການ​ຕ້ານ ​ແລະ ສະກັດ​ກັ້ນ​ພະຍາດອັກເສບປອດ ສາຍພັນໃຫມ່ (COVID-19)ໃຫ້​ບັນດາ​ປະ​ເທດ ຊຶ່ງ​ໃນ​ນັ້ນ​ມີ ສປປ ລາວ ຂອງ​ພວກ​ເຮົາ.

​ໃນ​ໂອກາດ​ນີ້, ສະຫາຍ ​ແສງ​ເພັດ ຮຸ່ງ​ບຸນ​ຍວງ ​ໄດ້ສະ​ແດງ​ຄວາມ​ຮູ້ບຸນຄຸນ ແລະ ຂອບ​​ອົກຂອບໃຈຢ່າງຈິງໃຈ ​ ມາຍັງສະພາ​ແຫ່ງ​ຊາດ​ຫວຽດນາມ, ພັກ, ລັດຖະບານ ແລະ ປະຊາຊົນຫວຽດນາມ​ໃນ​ການ​ຊ່ວຍ​ເຫຼຶອອຸປະກອນ​ການ​ແພດ​ໃນ​ຄັ້ງ​ນີ້ ​ແລະ ​ໄດ້​ຢືນຢັນ​ວ່າອຸປະກອນການແພດທີ່ໄດ້ຮັບການຊ່ວຍ ເຫຼືອຄັ້ງນີ້ຈະຖຶກນຳໃຊ້ເຂົ້າໃນການສະກັດກັ້ນ ແລະ ຕ້ານພະຍາດໂຄວິດ - 19 ຢູ່​ແຕ່ລະ​ປະ​ເທດ​ທີ່​ໄດ້​ຮັບ​ການ​ຊ່ວຍ​ເຫຼືອ​ໃຫ້​ມີ​ປະສິດທິ​ຜົນ​ສູງ, ​ພ້ອມດຽວ​ກັນ​ນີ້​ເຊື່ອໝັ້ນ​ວ່າ​ພາຍ​​ໃຕ້​ການ​ນຳພາ​ອັນ​ສະຫຼາດ​ສ່ອງ​ໃສ ​ແລະ ຄວາມ​ເປັນ​ຈິດ​ໜຶ່ງ​ໃຈ​ດຽວ​ຂອງ​ພັກ, ລັດ ​ແລະ ປະຊາຊົນຫວຽດນາມ ຈະຟື້ນ​ຟູ​​ເສດຖະກິດ ​ແລະ ຊີ​ວິດ​ການ​ເປັນ​ຢູ່​ຂອງ​ປະຊາຊົນ​ໃຫ້​ກັບ​ຄືນ​ສູ່​ສະພາບ​ປົກກະຕິ​ໂດຍ​ໄວ​ ​ແລະ ​ສືບ​ຕໍ່ຍາດ​ໄດ້ຜົນ​ສຳ​ເລັດອັນໃໝ່ໃຫຍ່ຫຼວງກວ່າເກົ່າໃນພາລະກິດປົກປັກຮັກສາແລະສ້າງສາປະ​ເທດ​ຊາດ​.