ໃນວັນທີ 18 ສິງຫາ 2022, ທ່ານ ລັດສະໝີ ແກ້ວມະນີ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ຕວັກກີ ທີ່ມີສໍານັກງານຕັ້ງຢູ່ ເຊີແນວ, ປະເທດສະວິດເຊີແລນ, ໄດ້ເປັນກຽດຕາງໜ້າໃຫ້ລັດຖະບານ ຕ້ອນຮັບ ແລະມອບສານແຕ່ງຕັ້ງ ຂອງ ພະນະທ່ານ ສະເຫລີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໃຫ້ແກ່ ທ່ານ Nihat OZPINAR, ນັກທຸລະກິດສັນຊາດຕວັກກີ ເພື່ອດໍາລົງຕໍາແໜ່ງເປັນກົງສຸນກິດຕິມະສັກ ແຫ່ງ ສປປ ລາວ ປະຈໍາ ຕວັກກີ ໂດຍກວມເອົາທຸກແຂວງຂອງຕວັກກີ.
ໃນໄລຍະວັນທີ 05-06/08/2022, ທ່ານ ນາງ ຄໍາເພົາ ເອິນທະວັນ, ເອກອັກຄະລັດຖະທູດ ແຫ່ງ ສປປ ລາວ ປະຈໍາ ສປ ຈີນ ພ້ອມດ້ວຍພະນັກງານສະຖານທູດ ແລະ ຄອບຄົວ ໄດ້ເດີນທາງໄປທັດສະນະຢ້ຽມຢາມແຂວງເຫີເປີຍ ຕາມການເຊື້ອເຊີນ ຂອງ ສະມາຄົມມິດຕະພາບຈີນກັບນານາຊາດ. ໃນໄລຍະຢ້ຽມຢາມ, ຄະນະໄດ້ຢ້ຽມພົບ ສະຫາຍ ເນັ້ຍຣຸຍຜິງ, ຮອງປະທານສະພາຜູ້ແທນປະຊາຊົນແຂວງເຫີເປີຍ ພ້ອມດ້ວຍຄະນະ. ການພົບປະຄັ້ງນີ້ຝ່າຍຈີນໄດ້ແຈ້ງໃຫ້ຊາບ ກ່ຽວກັບ ສະພາບການພັດທະນາເສດຖະກິດ-ສັງຄົມຂອງແຂວງ, ທີ່ຕັ້ງທີ່ມີຄວາມ ໝາຍສໍາຄັນທາງປະຫວັດສາດຂອງການປະຕິວັດຂອງພັກກອມມູນິດຈີນໃນເມື່ອກ່ອນ ກໍ່ຄື ການພັດທະນາຢ່າງ ຮອບດ້ານຂອງແຂວງໃນປັດຈຸບັນ, ສະພາບການພົວພັນຮ່ວມມືລະຫວ່າງແຂວງເຫີເປີຍ ກັບ ສປປ ລາວ ໃນຜ່ານມາ ແລະ ທິດທາງການຮ່ວມມືໃນຕໍ່ໜ້າ. ສະຫາຍ ນາງ ຄຳເພົາ ເອີນທະວັນ ໄດ້ສະແດງຄວາມຂອບໃຈຕໍ່ການຕ້ອນ ຮັບຄະນະຂອງສະຖານທູດລາວ ແລະ ຕີລາຄາສູງຕໍ່ຈຸດພິເສດທາງດ້ານພູມສາດການເມືອງທີ່ສໍາຄັນ ໃນການປະ ກອບສ່ວນຕົ້ນຕໍເຂົ້າໃນການປົດປ່ອຍ ແລະ ສະຖາປະນາເປັນສາທາລະນະລັດປະຊາຊົນຈີນ ໃນປີ 1949 ແລະ ສະແດງຄວາມຊົມເຊີຍ ຕໍ່ການພັດທະນາເສດຖະກິດ-ສັງຄົມຂອງແຂວງເຫີເປີຍ ທີ່ສາມາດຍາດໄດ້ຜົນສຳເລັດອັນໃຫຍ່ຫຼວງຮອບດ້ານ ພາຍໃຕ້ການນໍາພາຂອງພັກ-ລັດ ຈີນ. ສອງຝ່າຍ ໄດ້ປຶກສາຫາລືການຮ່ວມມື ເພື່ອຮັດແໜ້ນການພົວພັນສອງຝ່າຍ ລະຫວ່າງ ລາວ-ຈີນ ເວົ້າລວມ, ເວົ້າສະເພາະ ແມ່ນການພົວພັນລະຫວ່າງ ສະຖານທູດລາວ ປະຈໍາ ສປ ຈີນ ທີ່ປັກກິ່ງ ແລະ ແຂວງເຫີເປີຍ, ສປ ຈີນ.
ໃນລະຫວ່າງ ວັນທີ 29 ກໍລະກົດ - 01 ສິງຫາ 2022 ຜ່ານມາ, ທ່ານ ນາງ ວິລາວັນ ເຍ່ຍປໍເຮີ່, ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປປ ລາວ ປະຈຳ ສາທາລະນະລັດ ເບລາຣຸດຊີ ທີ່ມີສຳນັກງານຕັ້ງຢູ່ ສະຫະພັນ ຣັດເຊຍ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວວຽກງານ ຢູ່ ສາທາລະນະລັດ ເບລາຣຸດຊີ ຕາມການເຊື້ອເຊີນຂອງປະເທດເຈົ້້າພາບ. ໃນໂອກາດດັ່ງກ່າວນີ້, ທ່ານທູດ ພ້ອມດ້ວຍຄະນະ ກໍ່ໄດ້ເດີນທາງໄປເຂົ້າຮ່ວມກິດຈະກໍາຕ່າງໆ ເພື່ອສະເຫຼີມສະຫຼອງວັນທີ່ປຶກສາທາງດ້ານການຄ້າ ປະຈຳປີ 2022 ຢູ່ແຂວງ ເບຣດທ໌, ສ. ເບລາຣຸດຊີ, ຊຶ່ງແຂວງດັ່ງກ່າວ ເປັນເຂດເສດຖະກິດສາມຫລ່ຽມ ເບລາຣຸດຊີ-ໂປໂລຍ-ອູກຣາອິນ ທີ່ຕັ້ງຢູ່ທາງພາກຕາເວັນຕົກສຽງໃຕ້ຂອງ ເບລາຣຸດຊີ. ແຂວງເບຣດທ໌ ນີ້, ຍັງເປັນບ່ອນທີ່ມີຈຸດເຊື່ອມຕໍ່ເສັ້ນທາງລົດໄຟຂະຫນາດໃຫຍ່ ລະຫວ່າງ ເບລາຣຸດຊີ, ຣັດເຊຍ ແລະ ເອີຣົບ.