ກອງປະຊຸມປຶກສາຫາລືດ້ານການເມືອງຂັ້ນຮອງລັດຖະມົນຕີ ລະຫວ່າງ ສອງກະຊວງການຕ່າງປະເທດ ລາວ ແລະ ຫວຽດນາມ ຄັ້ງທີ 6 ໄດ້ມີຂຶ້ນໃນວັນທີ 31 ສິງຫາ 2021 ໃນຮູບແບບທາງໄກ ໂດຍການເປັນປະທານຮ່ວມ ຂອງ ສະຫາຍ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ສະຫາຍ ຫງວຽນ ກວ໋ກ ຢຸ້ງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ ແລະ ມີການເຂົ້າຮ່ວມຂອງບັນດາຫົວໜ້າກົມ, ຮອງກົມ, ພາຍໃນກະຊວງການຕ່າງປະເທດ ຂອງສອງຝ່າຍເຂົ້າຮ່ວມ, ຊຶ່ງເປັນກົນໄກປະຈໍາປີ ລະຫວ່າງ ສອງກະຊວງການຕ່າງປະເທດທີ່ປະຕິບັດຮ່ວມກັນມາແຕ່ປີ 2015.

ໃນວັນທີ 01 ກັນຍາ 2021, ທີ່ ກະຊວງການຕ່າງປະເທດ, ໄດ້ມີພິທີລົງນາມສັນຍາການຮ່ວມມື (Cooperation Agreement ) ລະຫວ່າງ ລັດຖະບານ ແຫ່ງ ສປປ ລາວ ແລະ ອົງການຈັດຕັ້ງສາກົນ ເພື່ອການເຄື່ອນຍ້າຍຖິ່ນຖານ (IOM), ໂດຍຕາງໜ້າຝ່າຍລາວ ກໍຄື ຕາງໜ້າໃຫ້ລັດຖະບານລາວ ຮ່ວມລົງນາມ ຄັ້ງນີ້ແມ່ນ ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ແລະ ຕາງໜ້າຝ່າຍອົງການ IOM ແມ່ນ ທ່ານ ນາງ ຊາຣີນ ທູລາດາຣ໌ (Shareen TULADHAR), ຫົວໜ້າຫ້ອງການອົງການ IOMປະຈໍາ ສປປ ລາວ ແລະ ມີບັນດາຜູ້ຕາງໜ້າ ຈາກຂະແໜງການທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ. ການລົງນາມໃນຄັ້ງນີ້, ແມ່ນເພື່ອເສີມຂະຫຍາຍການຮ່ວມມືລະຫວ່າງ ສປປ ລາວ ແລະ ອົງການ IOM ເຊິ່ງນິຕິກໍາດັ່ງກ່າວເປັນບ່ອນອີງໃຫ້ແກ່ການຮ່ວມມືໃນຕໍ່ໜ້າ ແລະ ການຈັດຕັ້ງປະຕິບັດບັນດາໂຄງການທີ່ອົງການ IOM ໄດ້ໃຫ້ການຊ່ວຍເຫລືອລາວ ໃນວຽກງານການເຄື່ອນຍ້າຍຖິ່ນຖານ.

ສະຖາບັນການຕ່າງປະເທດ ກະຊວງການຕ່າງປະເທດ ແລະ ສະຖານເອກອັກຄະລັດຖະທູດແຫ່ງ ສປ ຈີນ ປະຈໍາ ສປປ ລາວ ທີ່ ນະຄອນຫລວງວຽງຈັນ ໄດ້ເປັນເຈົ້າພາບຮ່ວມກັບ ສູນຄົ້ນຄວ້າແນວຄິດການທູດ ສີ ຈິ້ນຜິງ ໃນການຈັດກອງປະຊຸມສໍາມະນາ ພາຍໃຕ້ຫົວຂໍ້: "ຄວາມໝາຍຕໍ່ໂລກຂອງແນວຄິດການທູດ ສີ ຈິ້ນຜິງ", ໃນວັນທີ 25 ສິງຫາ 2021 ທີ່ ໂຮງແຮມ ແລນມາກ. ໃຫ້ກຽດກ່າວເປີດກອງປະຊຸມໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທ່ານ ຈ່ຽງ ຈາຍຕົ່ງ, ເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ ແລະ ທ່ານ ຢູ ຈ່ຽງ, ຮອງຫົວໜ້າສະຖາບັນຄົ້ນຄວ້າບັນຫາສາກົນ ແຫ່ງ ປະເທດຈີນ.