ໃນຕອນເຊົ້າຂອງວັນທີ 29 ກໍລະກົດ 2021, ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້ນຳພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ (ASEAN Senior Officials’ Meeting) ແບບທາງໄກ ພາຍໃຕ້ການເປັນປະທານຂອງ ບຣູໄນ ດາຣູຊາລາມ.

ກອງປະຊຸມ ໄດ້ຕີລາຄາສູງຕໍ່ຄວາມຄືບໜ້າ ໃນການຈັດຕັ້ງປະຕິບັດກິດຈະກຳບູລິມະສິດການເປັນປະທານອາຊຽນຂອງ ບຣູໄນ ດາຣູຊາລາມ ໃນປີ 2021 ເປັນຕົ້ນແມ່ນການຈັດກອງປະຊຸມສໍາມະນາອາຊຽນ ກ່ຽວກັບ ເສດຖະກິດສີຟ້າ, ກອງປະຊຸມສຳມະນາອາຊຽນ ວ່າດ້ວຍການຍຶດຖືຫຼັກການຮ່ວມມືຫຼາຍຝ່າຍ ຊຶ່ງເປັນກິດຈະກຳພາຍໃຕ້ຖະແຫຼງການຜູ້ນຳອາຊຽນ ວ່າດ້ວຍ ການຍຶດຖືຫຼັກການຮ່ວມມືຫຼາຍຝ່າຍ ທີ່ຈະໄດ້ຖືກຮັບຮອງເອົາໃນໂອກາດກອງປະຊຸມສຸດຍອດອາຊຽນ ຄັ້ງທີ 38 ໃນເດືອນ ຕຸລາ 2021. ພ້ອມກັນນີ້, ກອງປະຊຸມ ຍັງໄດ້ຮັບຊາບຄວາມຄືບໜ້າການກະກຽມລົງນາມ ການເຂົ້າເປັນພາຄີຂອງສົນທິສັນຍາໄມຕີຈິດ ແລະ ການຮ່ວມມືຢູ່ອາຊີຕາເວັນອອກສ່ຽງໃຕ້ ຫຼື TAC.

ກອງປະຊຸມ ຍັງໄດ້ແຈ້ງໃຫ້ຊາບ ກ່ຽວກັບ ການເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້ (TAC) ຂອງ ໂຮນລັງ, ເກຣັກ, ກາຕາ ແລະ ສະຫະນະຄອນ ເອເມຣັດ ອາຣັບ. ນອກນັ້ນ, ກອງປະຊຸມຄັ້ງນີ້ ກໍໄດ້ປຶກສາຫາລືການຮ່ວມມືອາຊຽນກັບແຕ່ລະຄູ່ເຈລະຈາອາຊຽນ ແລະ ພິຈາລະນາການສະເໜີເຂົ້າເປັນຄູ່ຮ່ວມຂະແໜງການ ແລະ ຄູ່ຮ່ວມເຈລະຈາອາຊຽນ. ສຸດທ້າຍ, ກອງປະຊຸມ ໄດ້ກະກຽມທັງທາງດ້ານເນື້ອໃນ ແລະ ພະລາທິການໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 54 (AMM), ກອງປະຊຸມລັດຖະມົນຕີຕ່າງປະເທດອາຊຽນກັບບັນດາຄູ່ເຈລະຈາອາຊຽນ (PMC) ແລະ ບັນດາກອງປະຊຸມລັດຖະມົນຕີຕ່າງປະເທດທີ່ກ່ຽວຂ້ອງອື່ນໆ ແບບທາງໄກ ທີ່ຈະຈັດຂຶ້ນໃນລະຫວ່າງວັນທີ 2-6 ສິງຫາ 2021.

ໃນຕອນບ່າຍຂອງວັນດຽວກັນ, ທ່ານຮອງລັດຖະມົນຕີ ຍັງໄດ້ສືບຕໍ່ນຳພາຄະນະ ເຂົ້າຮ່ວມກອງປະຊຸມໜ່ວຍງານວິຊາການຂອງສະພາປະສານງານອາຊຽນ ວ່າດ້ວຍ ການສະໝັກເຂົ້າເປັນສະມາຊິກອາຊຽນຂອງ ຕີມໍແລັດສະເຕ ຄັ້ງທີ 11, ຊຶ່ງກອງປະຊຸມ ໄດ້ຮັບຊາບຄວາມຄືບໜ້າ ໃນການກະກຽມການໄປຢ້ຽມຢາມ ຕີມໍແລັດສະເຕ (Fact-Finding Mission) ຂອງເສົາຄ້ຳປະຊາຄົມເສດຖະກິດອາຊຽນ ແລະ ເສົາຄ້ຳປະຊາຄົມວັດທະນະທຳ-ສັງຄົມອາຊຽນ (ສຳລັບເສົາຄ້ຳປະຊາຄົມການເມືອງ-ຄວາມໝັ້ນຄົງອາຊຽນ ແມ່ນສຳເລັດແລ້ວໃນປີ 2019). ກອງປະຊຸມ ຍັງໄດ້ປຶກສາຫາຫຼືກ່ຽວກັບຕາຕະລາງບັນດາກິດຈະກຳ ແລະ ເອກະສານທິດນຳກ່ຽວກັບການເຂົ້າຮ່ວມຂອງ ຕີມໍແລັດສະເຕ ໃນບັນດາກິດຈະກຳການສ້າງຂີດຄວາມສາມາດຂອງອາຊຽນ.