ໃນ​ວັນ​ທີ 6 ພຶດ​ສະພາ 2016, ທີ່​ ສະພາ​ແຫ່ງ​ຊາດ, ທ່ານ ສົມ​ພັນ ​ແພງ​ຄໍາ​ມີ, ຮອງ​ປະທານ​ສະພາ​ແຫ່ງ​ຊາດ ​ໄດ້​ໃຫ້​ກຽດ​ຕ້ອນຮັບ​ ການ​ເຂົ້າ​ຢ້ຽມ​ຄໍານັບ​ຂອງ​ ທ່ານ ນາງ ອອງຊານ ຊູ​ຈີ, ປະທານ​ທີ່​ປຶກສາ​ ປະທານາທິບໍດີ, ລັດຖະມົນຕີ​ກະຊວງ​ການ​ຕ່າງປະ​ເທດ, ລັດຖະມົນຕີ​ ປະ​ຈໍາ​ສໍານັກງານ​ ປະທານ​ປະ​ເທດ​ ແຫ່ງ ສາທາລະນະ​ລັດ ສະຫະພາບ ​ມຽນມາ ​ແລະ ຄະນະ  ​ໃນ​ໂອກາດ​ເດີນທາງ​ຮ່ວມ​ກັບ ປະທານາທິບໍດີ ອູ ຕິນ ຈໍ ຢ້ຽມຢາມ​ທາງ​ລັດຖະກິດ ສປປ ລາວ ຢ່າງ​ເປັນ​ທາງ​ການ.

ໂອກາດ​ນີ້, ທ່ານ ສົມ​ພັນ ​ແພງ​ຄໍາ​ມີ  ໄດ້​ສະ​ແດງ​ຄວາມຍິນ​ດີ​ຕ້ອນຮັບຂອບ​ໃຈ ແລະ ຕີ​ລາຄາ​ສູງຕໍ່ການ​ຢ້ຽມຢາມ ທາງ​ລັດຖະກິດ ​ ຢູ່ ສປປ ລາວ ​ຂອງ ທ່ານ ນາງ ອອງຊານ ຊູ​ຈີ, ເຊິ່ງເປັນ​ການ​ປະກອບສ່ວນ​ສຳຄັນ​ເຂົ້າ​ໃນ​ການ​ເສີມ​ຂະຫຍາຍ ສາຍ​ພົວພັນ​ມິດຕະພາບ ອັນ​ເປັນມູນ​ເຊື້ອ​​ທີ່​ຍາວ​ນານ ​ແລະ ການ​ຮ່ວມ​ມື​ ລະຫວ່າງ ລາວ ​ແລະ ມຽນມາ ໃຫ້​ນັບ​ມື້​ແຕກ​ດອກ​ອອກ​ຜົນ ​ແລະ ຈະ​ເລີ​ນງອກ​ງາມ​ຍິ່ງໆ​ຂຶ້ນ. ການ​ພົບ​ປະ​ຄັ້ງ​ນີ້, ​ໄດ້​ດຳ​ເນີນ​ດ້ວຍໄມຕີ​ຈິດມິດຕະພາບ ​ແລະ ຄວາມ​ເຂົ້າ​ອົກ​ເຂົ້າ​​ໃຈ ເຊິ່ງກັນ ​ແລະ ກັນ​ ຢ່າງ​ເລິກ​ເຊິ່ງ. ພ້ອມນີ້, ທ່ານ ສົມ​ພັນ ​ແພງ​ຄໍາ​ມີ ໄດ້ສະແດງຄວາມຊົມເຊີຍຕໍ່ ທ່ານ ນາງ​ ອອງຊານ ຊູ​ຈີ ທີ່ໄດ້ຮັບການເລືອກຕັ້ງ ໃຫ້ດໍາລົງຕໍາແໜ່ງ​ໃໝ່ ​ເປັນ​ລັດຖະມົນຕີກະຊວງ​ການ​ຕ່າງປະ​ເທດ, ລັດຖະມົນຕີ​ ປະ​ຈໍາ​ສໍານັກງານ ​ປະທານ​ປະ​ເທດ ຂອງ ສສ ມຽນມາ.
ທ່ານ ນາງ ​ອອງຊານ ຊູ​ຈີ ​ໄດ້​ສະ​ແດງ​ຄວາມ​ຂອບ​ໃຈ ຕໍ່ທ່ານ​ ຮອງ​ປະທານສະພາ​ແຫ່ງ​ຊາດ ທີ່​ໃຫ້ການ​ຕ້ອນຮັບຢ່າງ​ອົບ​ອຸ່ນ​ໃນ​ຄັ້ງ​ນີ້ ແລະໄດ້ສະແດງຄວາມຊົມເຊີຍຕໍ່ ທ່ານ ສົມ​ພັນ ​ແພງ​ຄໍາ​ມີ ທີ່ໄດ້ຮັບການຄັດເລືອກ ໃຫ້ເປັນຮອງ​ປະທານ​ ສະພາ​​ແຫ່ງ​ຊາດ ​ອີກ​ສະ​ໄໝ ຂອງ ສປປ ລາວ ພ້ອມ​ທັງເຊື່ອໝັ້ນວ່າ ສາຍ​ພົວພັນມິດຕະພາບ​ອັນ​ເປັນມູນ​ເຊື້ອຍາວ​ນານ ​ແລະການ​ຮ່ວມ​ມື ລະຫວ່າງ ສອງ​ປະ​ເທດ ລາວ ​ແລະ ມຽນມາຈະນັບ​ມື້​ຂະຫຍາຍຕົວຢ່າງ​ບໍ່ຢຸດ​ຢັ້ງ.