ໃນວັນທີ 14 ມີນາ 2024, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະກັບ ທ່ານ​ ນາງ ຈຸດຕາ ເອີກພິລາຍເນັ້ນ, ກໍາມາທິການຮ່ວມມືສາກົນ ຂອງ ສະຫະພາບເອີຣົບ (Ms. Jutta Urpilainen, European Commissioner for International Partnership), ໃນໂອກາດເດີນທາງມາຢ້ຽມຢາມເຮັດວຽກ ຢູ່ ສປປ ລາວ ໃນວັນທີ 14-15 ມີນາ 2024.

ໃນໂອກາດດັ່ງກ່າວນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ຕີລາຄາສູງຕໍ່ການເດີນທາງມາ ຢ້ຽມຢາມເຮັດວຽກ ຢູ່ ສປປ ລາວ ຂອງຄະນະຜູ້ແທນ ສະຫະພາບເອີຣົບ ໃນຄັ້ງນີ້, ເຊິ່ງເປັນຂີດໝາຍອັນສຳຄັນໃນການສືບຕໍ່​​ຮັດ​ແໜ້ນ ແລະ ເສີມຂະຫຍາຍ​ສາຍ​ພົວພັນ​ມິດຕະພາບ​ ແລະ ການ​ຮ່ວມ​ມື​ທີ່ມີມາຍາວນານ​ ລະຫວ່າງ ສປປ ລາວ ແລະ ສະຫະພາບເອີຣົບ ທີ່ກຳລັງສືບຕໍ່ຂະຫຍາຍຕົວຢ່າງຕໍ່ເນື່ອງ. ພ້ອມກັນນີ້, ສອງຝ່າຍ ໄດ້ຕີລາຄາສູງ​ຕໍ່​ສາຍ​ພົວ​ພັນ​ ແລະ ການ​ຮ່ວມ​ມືອັນ​ດີ ລະ​ຫວ່າງ ສ​ປ​ປ ລາວ ແລະ ສະຫະພາບເອີຣົບ ໃນ​ໄລ​ຍະ​ຜ່ານ​ມາ. ນັບຕັ້ງແຕ່ໄດ້ມີການສ້າງຕັ້ງສາຍພົວພັນການທູດນຳກັນ ໃນວັນທີ 21 ພະຈິກ 1975, ການ​ຮ່ວມ​ມື​ ລະຫວ່າງ ສປປ ລາວ ແລະ ສະຫະພາບເອີຣົບ ສືບ​ຕໍ່​ເສີມ​ຂະ​ຫຍາຍ​ຂຶ້ນ​ເລື້ອຍໆ, ພ້ອມກັນນັ້ນສະຫະພາບເອີຣົບ ກໍ່ສືບຕໍ່ໃຫ້ການຊ່ວຍເຫຼືອແກ່ ສປປ ລາວ ໂດຍສຸມໃສ່ 3 ຂົງເຂດຕົ້ນຕໍ ຄື: 1) ການພັດທະນາເສດຖະກິດສີຂຽວ ແລະ ລວມໝູ່; 2) ການພັດທະນາຊັບພະຍາກອນມະນຸດ; ແລະ 3) ການປົກຄອງທີ່ດີ. ນອກນັ້ນ, ສອງຝ່າຍ ຍັງໄດ້ແລກປ່ຽນຄໍາຄິດເຫັນຕໍ່ບາງສະພາບການພົ້ນເດັ່ນ ໃນພາກພື້ນ ແລະ ສາກົນທີ່ສອງຝ່າຍມີຄວາມສົນໃຈ.

ໃນໂອກາດດຽວກັນນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ຕາງໜ້າໃຫ້ແກ່ລັດຖະບານ ແລະ ປະຊາຊົນລາວ ສະແດງຄວາມຂອບໃຈເປັນຢ່າງສູງ ມາຍັງ ສະຫະພາບເອີຣົບ ທີ່ໃຫ້ການຊ່ວຍເຫຼືອ ແກ່ ສປປ ລາວ ຕະຫຼອດໄລຍະຜ່ານ​ມາ ລວມເຖິງການສືບຕໍ່ໃຫ້ການຊ່ວຍເຫຼືອໃນຕໍ່ໜ້າ. ພ້ອມກັນນີ້, ກໍໄດ້ແຈ້ງໃຫ້ຊາບເຖິງການເປັນປະທານ ອາຊຽນ ຂອງ ສປປ ລາວ ໃນປີ 2024 ໂດຍເນັ້ນການສົ່ງເສີມການເຊື່ອມຕໍ່ພາກພື້ນ, ສ້າງຄວາມເຂັ້ມແຂງແກ່ອາຊຽນ ແລະ ເສີມຂະຫຍາຍການພົວພັນຮ່ວມມືກັບບັນດາຄູ່ຮ່ວມພັດທະນາຕ່າງໆ, ພ້ອມທັງຍັງໄດ້ຝາກຄໍາເຊີນຊວນໄປຍັງປະຊາຊົນ ສະຫະພາບເອີຣົບ ໃຫ້ມາທ່ອງທ່ຽວ ສປປ ລາວ ໃນໂອກາດ ປີທ່ອງທ່ຽວລາວ 2024 ນີ້.

ໃນຂະນະດຽວກັນ, ທ່ານ ນາງ ຈຸດຕາ ເອີກພິລາຍເນັ້ນ ກໍໄດ້ສະແດງຄວາມປິຕິຍິນດີ ແລະ ຂອບໃຈ ຕໍ່ການຕ້ອນຮັບໃນການເດີນທາງຢ້ຽມຢາມ ສປປ ລາວ ໃນຄັ້ງນີ້ຢ່າງອົບອຸ່ນ, ພ້ອມທັງສະແດງຄວາມຍິນດີທີ່ຈະສືບຕໍ່ໃຫ້ການສະໜັບສະໜູນ ແກ່ ສປປ ລາວ ໃນຕໍ່ໜ້າ, ໂດຍສະເພາະການເປັນປະທານອາຊຽນຂອງ ສປປ ລາວ ໃນປີ 2024 ນີ້ ໃຫ້ໄດ້ຮັບຜົນສຳເລັດຕາມຄາດໝາຍ, ໃນຖານະທີ່ ສະຫະພາບເອີຣົບ ກໍ່ເປັນຄູ່ຮ່ວມມືຍຸດທະສາດຂອງອາຊຽນ.