ໃນວັນທີ 3 ກຸມພາ 2023 ທີ່ ຈາກາກຕາ, ອິນໂດເນເຊຍ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມສະພາປະສານງານອາຊຽນຄັ້ງທີ 32 ໂດຍການເປັນປະທານອາຊຽນຂອງ ອິນໂດເນເຊຍ ພາຍໃຕ້ຄໍາຂວັນ ອາຊຽນມີຄວາມສໍາຄັນ: ສູນກາງແຫ່ງການພັດທະນາ (ASEAN Matters: Epicentrum of Growth), ແລະ ມີລັດຖະມົນຕີກະຊວງການຕ່າງປະເທດ ແລະ ການຮ່ວມມື ຂອງຕີມໍເເລັດເຕ ເຂົ້າຮ່ວມໃນນາມປະເທດສັງເກດການ.
ກອງປະຊຸມ ໄດ້ຮັບຊາບບູລິມະສິດຂອງ ອິນໂດເນເຊຍ ສໍາລັບການເປັນປະທານອາຊຽນ ສົກປີ 2023, ຄວາມຄືບໜ້າຮ່າງວິໄສທັດປະຊາຄົມອາຊຽນ ຫຼັງປີ 2025 ແລະ ການຈັດຕັ້ງຜັນຂະຫຍາຍຜົນຂອງກອງປະຊຸມສຸດຍອດອາຊຽນຄັ້ງທີ 40 ແລະ 41. ພ້ອມນີ້, ກອງປະຊຸມ ໄດ້ເຫັນດີຮັບເອົາລະບຽບການໃນການຈັດຕັ້ງປະຕິບັດ ສະຖານະພາບເປັນປະເທດສັງເກດການຂອງຕີມໍເລສເຕ ແລະ ພາລະບົດບາດຂອງຫນ່ວຍງານຮັບຜິດຊອບ ການສະຫມັກ ເຂົ້າເປັນສະມາຊິກອາຊຽນຂອງ ຕີມໍເເລັດເຕ, ແລະ ເຫັນດີຊຸກຍູ້ໃຫ້ສ້າງແຜນງານສໍາລັບການເຂົ້າເປັນສະມາຊິກສົມບູນອາຊຽນຂອງ ຕີມໍເເລັດເຕ ໃນຕໍ່ໜ້າ.
ໃນໂອກາດເຂົ້າຮ່ວມກອງປະຊຸມໃນຄັ້ງນີ້, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ພ້ອມດ້ວຍລັດຖະມົນຕີຕ່າງປະເທດອາຊຽນ ເຂົ້າຢ້ຽມຂໍ່ານັບ ທ່ານ Joko Widodo ປະທານາທິບໍດີອິນໂດເນເຊຍ ແລະ ໄດ້ຕາງໜ້າ ລັດຖະມົນຕີຕ່າງປະເທດອາຊຽນ ໃນນາມປະເທດປະທານອາຊຽນ ປີ 2024 ກ່າວສະເເດງຄວາມຂອບໃຈ ແລະ ຊົມເຊີຍ ອິນໂດເນເຊຍ ໃນການເປັນປະທານອາຊຽນ ສົກປີ 2023 ພາຍໃຕ້ຄໍາຂວັນ: "ອາຊຽນມີຄວາມສໍາຄັນ: ສູນກາງເເຫ່ງການພັດທະນາ (ASEAN Matters : Epicentrum of Growth)". ນອກນັ້ນ, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ພ້ອມດ້ວຍຄະນະ ໄດ້ພົບປະກັບ ທ່ານ ນ. Adalijiza Magno, ລັດຖະມົນຕີກະຊວງການຕ່າງປະເທດ ແລະ ການຮ່ວມມື ຕີມໍເເລັດເຕ ເພື່ອເເລກປ່ຽນຄໍາຄິດເຫັນ ແລະ ປຶກສາຫາລື ກ່ຽວກັບ ການຮ່ວມມືໃນຂອບສອງຝ່າຍ. ໃນນີ້, ຝ່າຍຕີມໍເເລັດເຕ ໄດ້ຕີລາຄາສູງ ແລະ ສະເເດງຄວາມຂອບໃຈຕໍ່ການສະໜັບສະໜູນຂອງ ສປປ ລາວ ຕໍ່ການສະໝັກຂອງ ຕີມໍເເລັດເຕ ເຂົ້າເປັນສະມາຊິກອາຊຽນ. ພ້ອມດຽວກັນນີ້, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ກໍໄດ້ມອບຮູບເເຕ້ມ ກ່ຽວກັບ ວັດທະນະທໍາ, ຮີດຄອງປະເພນີ ແລະ ເອກະລັກອັນດີງາມຂອງຊາດ ແລະ ປະຊາຊົນລາວ ໃຫ້ເເກ່ ທ່ານ ປອ. Kao Kim Hourn, ເລຂາທິການໃຫຍ່ອາຊຽນ ເພື່ອວາງສະເເດງຢູ່ ກອງເລຂາອາຊຽນ.
------------------------