ໃນຕອນບ່າຍຂອງວັນທີ 13 ກັນຍາ 2022, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ຊອຍ ຢຸງ ຊໍາ (CHOI Young-sam), ຮອງລັດຖະມົນຕີກະຊວງການຕ່າງປະເທດ ແຫ່ງ ສ. ເກົາຫຼີ ພ້ອມດ້ວຍຄະນະ, ໃນໂອກາດເດີນທາງມາເຂົ້າຮ່ວມກອງປະຊຸມເວທີພົບປະພາກທຸລະກິດ ແມ່ນໍ້າຂອງ-ສ.ເກົາຫຼີ ຄັ້ງທີ 10 (The 10th Mekong-Republic of Korea Business Forum).
ໃນໂອກາດນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ຄະນະຜູ້ແທນ ສ. ເກົາຫຼີ, ພ້ອມທັງໄດ້ຕີລາຄາສູງ ຕໍ່ສາຍພົວພັນມິດຕະພາບທີ່ດີ ແລະ ການຮ່ວມມືອັນເຕັມໄປດ້ວຍໝາກຜົນ ໃນດ້ານຕ່າງໆ ລະຫວ່າງ ສປປ ລາວ ແລະ ສ.ເກົາຫຼີ ຕະຫຼອດໄລຍະຜ່ານມາ, ເປັນຕົ້ນແມ່ນການພົວພັນຮ່ວມມືດ້ານການເມືອງ, ການຄ້າ, ການລົງທຶນ, ການທ່ອງທ່ຽວ, ການພັດທະນາຊັບພະຍາກອນມະນຸດ, ສາທາລະນະສຸກ, ພື້ນຖານໂຄງລ່າງ, ດ້ານປ້ອງກັນຊາດ-ປ້ອງກັນຄວາມສະຫງົບ, ການຮ່ວມມືສາຍສະພາ ແລະ ອື່ນໆ ໄດ້ສືບຕໍ່ຂະຫຍາຍຕົວຢ່າງຕໍ່ເນື່ອງ. ພ້ອມກັນນັ້ນ, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ສະແດງຄວາມຂອບໃຈ ຕໍ່ລັດຖະບານ ແລະ ປະຊາຊົນ ສ. ເກົາຫຼີ ທີ່ໄດ້ໃຫ້ການຊ່ວຍເຫຼືອ ຕໍ່ ສປປ ລາວ ໃນໄລຍະຜ່ານມາ, ໂດຍສະເພາະແມ່ນການຊ່ວຍເຫລືອເພື່ອການພັດທະນາ (ODA), ການສະໜອງເງິນກູ້ຜ່ານກອງທຶນຮ່ວມມືພັດທະນາເສດຖະກິດ (EDCF), ການຮັບມືກັບການແຜ່ລະບາດຂອງພະຍາດໂຄວິດ-19, ການຝຶກອົບຮົມວິຊາຊີບໃຫ້ແກ່ແຮງງານລາວ, ການສະໜອງທຶນການສຶກສາ ແລະ ອື່ນໆ, ເຊິ່ງໄດ້ປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ໃນໄລຍະຜ່ານມາ. ນອກຈາກນັ້ນ, ທ່ານ ຮອງນາຍົກລັດຖະມົນຕີ ຍັງເນັ້ນໃສ່ການສົ່ງເສີມການທ່ອງທ່ຽວລະຫວ່າງສອງປະເທດ ໃຫ້ກັບມາຟົດຟື້ນເໝືອນກັບ ໄລຍະກ່ອນການລະບາດ ຂອງພະຍາດໂຄວິດ-19.
ໃນໂອກາດດຽວກັນນີ້, ທ່ານ ຮອງລັດຖະມົນຕີ ຊອຍ ຢຸງ ຊໍາ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນໃນຄັ້ງນີ້ ແລະ ຢືນຢັນຈະສືບຕໍ່ຊຸກຍູ້ສົ່ງເສີມການພົວພັນຮ່ວມມື ລະຫວ່າງສອງປະເທດ ສປປ ລາວ-ສ. ເກົາຫຼີ ໃຫ້ໄດ້ຮັບການເສີມຂະຫຍາຍຂຶ້ນເປັນກ້າວໆ ໂດຍສະເພາະທາງດ້ານການຄ້າ ແລະ ການລົງທຶນ ເຊິ່ງສອງຝ່າຍເຫັນວ່າ ຍັງມີທ່າແຮງໃນການຮ່ວມມືກັນຕື່ມອີກ. ພ້ອມນີ້, ທ່ານ ຮອງລັດຖະມົນຕີ ຊອຍ ຢຸງ ຊໍາ ຍັງໄດ້ເນັ້ນໃສ່ການສືບຕໍ່ກົນໄກປຶກສາຫາລື ລະຫວ່າງສອງກະຊວງການຕ່າງປະເທດ ຫຼື ກອງປະຊຸມປຶກສາຫາລືດ້ານການເມືອງ ໃນລະດັບຮອງລັດຖະມົນຕີຕ່າງປະເທດ ເຊິ່ງໄດ້ຈັດຂຶ້ນໃນປີ 2014 ຜ່ານມາ ທີ່ ສ. ເກົາຫຼີ ແລະ ອື່ນໆ.