ໃນວັນທີ 17 ສິງຫາ 2022 ທີ່ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ Michael W. Michalak, ເຈົ້າໜ້າທີ່ອາວຸໂສ, ຮອງປະທານສະພາທຸລະກິດ ອາເມຣິກາ-ອາຊຽນ (USABC) ພ້ອມດ້ວຍຄະນະ ໃນໂອກາດນໍາພາ ຄະນະນັກທຸລະກິດ ອາເມຣິກາ ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ.
ໃນໂອກາດນີ້, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້ ທີ່ເປັນການສະແດງເຖິງຄວາມຕັ້ງໃຈ, ຄວາມພະຍາຍາມຮ່ວມກັນໃນການສືບຕໍ່ຊຸກຍູ້, ສົ່ງເສີມການພົວພັນຮ່ວມມືດ້ານເສດຖະກິດ, ການຄ້າ, ການລົງທຶນ ລະຫວ່າງ ອາເມຣິກາ ແລະ ອາຊຽນ ໂດຍສະເພາະ ລະຫວ່າງ ສປປ ລາວ ແລະ ອາເມຣິກາ ທີ່ເປັນການປະກອບສ່ວນເຂົ້າໃນການຟື້ນຟູເສດຖະກິດພາຍຫຼັງ ໂຄວິດ-19 ກໍ່ຄືການຈັດຕັ້ງປະຕິບັດການເປັນຄູ່ຮ່ວມແບບກວມລວມ ລາວ-ອາເມຣິກາ. ທ່ານຮອງນາຍົກລັດຖະມົນຕີ ໄດ້ຊົມເຊີຍ ແລະ ຕີລາຄາສູງຕໍ່ຜົນສໍາເລັດ, ການປະກອບສ່ວນ ແລະ ຄວາມຄືບໜ້າຂອງການຮ່ວມມືດ້ານເສດຖະກິດ, ການຄ້າ, ການລົງທຶນໃນຂະແໜງການຕ່າງໆຂອງນັກທຸລະກິດ ອາເມຣິກາ ຢູ່ ສປປ ລາວ ຕະຫຼອດໄລຍະທີ່ຜ່ານມາ ທີ່ເຮັດໃຫ້ມູນຄ່າການຄ້າ, ການລົງທຶນ ລະຫວ່າງ ລາວ ແລະ ອາເມຣິກາ ມີການເພີ່ມຂຶ້ນຢ່າງຕໍ່ເນື່ອງໃນແຕ່ລະປີ, ພ້ອມທັງໄດ້ແຈ້ງກ່ຽວກັບຈຸດສຸມຂອງລັດຖະບານ ໃນການສົ່ງເສີມການຜະລິດດ້ານກະສິກໍາ, ການທ່ອງທ່ຽວ, ເສດຖະກິດສີຂຽວ ແລະ ສະອາດ, ການເປັນສູນກາງດ້ານການຂົນສົ່ງ (logistic hub) ແລະ ສະເໜີໃຫ້ຄະນະ USABC ແລະ ນັກທຸລະກິດອາເມຣິກາ ສືບຕໍ່ໃຫ້ການຊ່ວຍເຫຼືອໃນໂຄງການຮ່ວມມືໃນຂະແໜງຕ່າງໆ ໂດຍສະເພາະກ່ຽວກັບການສ້າງຄວາມອາດສາມາດຂອງທຸລະກິດຂະໜາດກາງ ແລະ ຂະໜາດນ້ອຍ (MSMEs, SMESs), ແຮງງານລາວ ແລະ ອື່ນໆ.
ຄະນະສະພາທຸລະກິດ ອາເມຣິກາ-ອາຊຽນ ໄດ້ແຈ້ງຈຸດປະສົງຂອງການເດີນທາງໃນຄັ້ງນີ້ ເພື່ອຊອກຮູ້, ປຶກສາຫາລື ແລະ ແລກປ່ຽນຮ່ວມມືກັບພາກສ່ວນກ່ຽວຂ້ອງຂອງ ລາວ ໂດຍສະເພາະຄວາມສົນໃຈ, ແຜນການຊອກຫາຕະຫຼາດ, ທ່າແຮງເຮັດທຸລະກິດຢູ່ລາວໃນດ້ານຕ່າງໆຂອງອາເມຣິກາ ເຊັ່ນ: ດ້ານພະລັງງານ, ການຜະລິດສິນຄ້າ, ເຕັກໂນໂລຊີຂໍ້ມູນຂ່າວສານ, ການບໍລິການດ້ານການເງິນ, ຂະແໜງສາທາລະນະສຸກ ແລະ ອື່ນໆ ກໍ່ຄືເພື່ອຊອກຮູ້, ສຶກສາກ່ຽວກັບນະໂຍບາຍ ແລະ ວຽກງານບູລິມະສິດຂອງລັດຖະບານລາວ ເພື່ອເປັນທິດທາງໃນການດໍາເນີນທຸລະກິດໃນອະນາຄົດ.
ທ່ານຮອງນາຍົກລັດຖະມົນຕີ ພ້ອມດ້ວຍຄະນະສະພາທຸລະກິດ ອາເມຣິກາ-ອາຊຽນ ແລະ ບັນດານັກທຸລະກິດ ອາເມຣິກາ ໄດ້ຮ່ວມກັນແລກປ່ຽນຂໍ້ມູນ, ປຶກສາຫາລືໃນບັນຫາຕ່າງໆກ່ຽວກັບຂໍ້ສະດວກ, ຂໍ້ຫຍຸ້ງຍາກໃນການດໍາເນີນທຸລະກິດ, ຄວາມຄືບໜ້າໃນການເຈລະຈາຈັດຕັ້ງຜັນຂະຫຍາຍ ສັນຍາວ່າດ້ວຍການຄ້າ ແລະ ການລົງທຶນ ລະຫວ່າງ ລັດຖະບານ ລາວ ແລະ ອາເມຣິກາ (TIFA-Trade and Investment Framework Agreement) ແລະ ອື່ນໆ.
ໃນຕອນທ້າຍ, ທ່ານ Michael W. Michalak ໄດ້ຕາງໜ້າໃຫ້ສະພາທຸລະກິດ ອາເມຣິກາ-ອາຊຽນ ກໍ່ຄືນັກທຸລະກິດ ອາເມຣິກາ ສະແດງຄວາມຂອບໃຈມາຍັງ ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ທີ່ໄດ້ໃຫ້ກຽດຕ້ອນຮັບ ແລະ ພົບປະໃນຄັ້ງນີ້ ທີ່ເປັນຜົນປະໂຫຍດ ແລະ ໄດ້ຮັບຮູ້ຂໍ້ມູນອັນສໍາຄັນ ເພື່ອເປັນທິດທາງໃນການຊຸກຍູ້ສົ່ງເສີມການຮ່ວມມືດ້ານການຄ້າ, ການລົງທຶນ ລະຫວ່າງ ສອງປະເທດ ໂດຍສະເພາະການດໍາເນີນທຸລະກິດ ຢູ່ ລາວ ທີ່ຈະເປັນການປະກອບສ່ວນອັນສໍາຄັນໃຫ້ແກ່ການເສີມຂະຫຍາຍການພົວພັນຮ່ວມມືສອງຝ່າຍ ລະຫວ່າງ ລາວ ແລະ ອາເມຣິກາ ດ້ານເສດຖະກິດ, ການຄ້າ ແລະ ລົງທຶນໃຫ້ກວ້າງຂວາງໃນຕໍ່ໜ້າ.