ນະຄອນຫຼວງວຽງຈັນ, ວັນທີ 03 ມີນາ 2020

ໃນນາມ ລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍ່ຄືໃນນາມສ່ວນຕົວ, ຂ້າພະເຈົ້າ ຂໍສະແດງຄວາມຊົມເຊີຍຢ່າງຈິງໃຈ ມາຍັງ ພະນະທ່ານ ໃນໂອກາດທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງ ເປັນນາຍົກລັດຖະມົນຕີ ແຫ່ງ ມາເລເຊຍ.

ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງ ທີ່ເຫັນວ່າ ສາຍພົວພັນ ແລະ ການຮ່ວມມືສອງຝ່າຍ ລະຫວ່າງ ສປປ ລາວ ແລະ ມາເລເຊຍ ກຳລັງເຕີບໃຫຍ່ຂະຫຍາຍຕົວ ແລະ ມີໝາກຜົນ.

ຂ້າພະເຈົ້າ ພ້ອມແລ້ວທີ່ຈະຮ່ວມເຮັດວຽກຢ່າງໃກ້ຊິດກັບ ພະນະທ່ານ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືືທີ່ດີ ລະຫວ່າງ ສອງປະເທດພວກເຮົາ ໃຫ້ແຕກດອກອອກຜົນຍິ່ງຂຶ້ນ ເພື່ອຜົນປະໂຫຍດຮ່ວມກັນ ຂອງປະຊາຊົນສອງຊາດພວກເຮົາ ກໍ່ຄື ເພືຶ່ອສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາ ຢູ່ໃນພາກພື້ນ ແລະ ສາກົນ.

ຂ້າພະເຈົ້າເຊື່ອໝັ້ນວ່າ ພາຍໃຕ້ການນຳພາອັນປີຊາສາມາດ ແລະ ປະສົບການອັນສູງສົ່ງ ຂອງ ພະນະທ່ານ, ມາເລເຊຍ ຈະສືບຕໍ່ໄດ້ຮັບການພັດທະນາໃຫ້ຈະເລີນກ້າວໜ້າ ແລະ ວັດ ທະນະຖາວອນຍິ່ງໆຂຶ້ນ.

ຂ້າພະເຈົ້າ ຂໍຖືໂອກາດນີ້ ອວຍພອນໃຫ້ ພະນະທ່ານ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ມີຜົນສຳເລັດຍິ່ງໆຂຶ້ນ ໃນພາລະກິດອັນມີກຽດສູງສົ່ງ ຂອງພະນະທ່ານ.

ດ້ວຍຄວາມນັບຖືຢ່າງສູງ,

ທອງລຸນ ສີສຸລິດ

ພະນະທ່ານ ຕັນ ສຣີ ມູຢິດດິນ ບິນ ຮາຈິ ມູຮຳມັດ ຢັດຊິນ

ນາຍົກລັດຖະມົນຕີ ແຫ່ງ ມາເລເຊຍ

ກົວລາລຳເປີ

ນະຄອນຫລວງວຽງຈັນ,​ ວັນທີ 5 ມີນາ 2020

ພະນະ​ທ່ານ,

ຂ້າພະ​ເຈົ້າ​ ໄດ້ຕິດຕາມຢ່າງໃກ້ຊິດດ້ວຍຄວາມເປັນຫ່ວງ ຕໍ່ກັບສະພາບການແຜ່ລະບາດ ຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ (COVID-19) ທີ່ປັດຈຸບັນ ໄດ້ແຜ່ລາມໄປຢ່າງໄວວາຢູ່ ສ. ເກົາຫລີ ເຊິ່ງໄດ້ສົ່ງຜົນກະທົບຕໍ່ການດໍາລົງຊີວິດ ແລະ ໄດ້ສ້າງຄວາມສູນເສຍດ້ານຊີວິດຂອງປະຊາຊົນ ສ. ເກົາຫລີ.

​          ໃນນາມລັດຖະບານ ​ແລະ ປະຊາຊົນ​ລາວ ກໍ່​ຄື​ໃນ​ນາມ​ສ່ວນ​ຕົວ, ຂ້າພະເຈົ້າຂໍ​ສະ​ແດງ​ຄວາມເຫັນໃຈ ແລະ ເສົ້າສະຫລົດໃຈ​​​ຢ່າງ​ສຸດຊຶ້ງມາ​ຍັງ ​ພະນະທ່ານ, ລັດຖະບານ ​ແລະ ປະຊາຊົນ ສ. ເກົາຫລີ ໂດຍສະເພາະຄອບຄົວຂອງຜູ້ເສຍຊີວິດຈາກພະຍາດ​ COVID-19 ດັ່ງກ່າວ.

ຂ້າພະເຈົ້າ ເຊື່ອໝັ້ນຢ່າງແຮງກ້າວ່າ ພາຍໃຕ້ການຊີ້ນຳຢ່າງ​ໃກ້​ຊິດຂອງພະນະທ່ານ ແລະ ການໃຊ້ມາດຕະການຕ່າງໆ ທີ່ມີປະສິດທິຜົນສູງຂອງລັດຖະບານ ສ.​ ເກົາຫລີ, ສ. ເກົາຫລີ ຈະ​ສາມາດ​ຄວບຄຸມ ແລະ ຈຳກັດການລະບາດ ຂອງເຊື້ອພະຍາດດັ່ງກ່າວ ແລະ ຟື້ນ​ຟູ​ຊີວິດການເປັນຢູ່ ຂອງປະຊາຊົນ​ ສ. ເກົາຫລີ ໃຫ້ກັບຄືນສູ່ສະພາບປົກກະຕິໂດຍ​ໄວ.

ດ້ວຍຄວາມນັບຖືຢ່າງສູງ.

   ບຸນ​ຍັງ ວໍລະ​ຈິດ

   ປະທານ​ປະ​ເທດ

ແຫ່ງ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ

ພະນະທ່ານ ມູນ ແຈ ອິນ,

ປະທານາທິບໍດີ ແຫ່ງ ສາທາລະນະລັດ ເກົາຫລີ

ທີ່ ເຊອູນ

ນະ​ຄອນຫຼວງວຽງ​ຈັນ, ວັນ​ທີ 26 ກຸມພາ 2020

ພະນະທ່ານ,

​ຂ້າ​ພະ​ເຈົ້າ ມີ​ຄວາມ​ໂສກເສົ້າ​ເປັນ​ຢ່າງ​ຍິ່ງ ​ທີ່​ໄດ້​ຮັບ​ຂ່າວ​ການ​ເສຍ​ຊີວິດ​ຂອງ ພະນະທ່ານ ໂມຮາເມັດ ໂຮສນີ ມູບາຣັກ, ອາດີດ​ປະທານາທິບໍດີ ແຫ່ງ ສາທາລະນະລັດ ອາຣັບ ເອຢິບ ໃນ​ວັນ​ທີ 25 ກຸມພາ 2020 ທີ່ຜ່ານມາ.