ສະຫາຍ ຫລີ ເຄີສຽງ,

ນາຍົກລັດຖະມົນຕີ

ແຫ່ງ ສາທາລະນະລັດ ປະຊາຊົນຈີນ                                   

                                                                                 ທີ່ ນະຄອນຫຼວງປັກກິ່ງ

ສະຫາຍ ທີ່ນັບຖື,

ຂ້າພະເຈົ້າ ໄດ້ຕິດຕາມຢ່າງໃກ້ຊິດ ສະພາບການລະບາດຂອງພະຍາດ ເຊື້ອໄວຣັສ ໂຄໂລນາ ສາຍພັນໃໝ່ ຢູ່ ນະຄອນອູຫັ້ນ, ແຂວງຫູເປີຍ ນັບແຕ່ທ້າຍປີ 2019 ເປັນຕົ້ນມາ ທີ່ໄດ້ແຜ່ຂະຫຍາຍໄປນະຄອນອື່ນໆຂອງ ສປ ຈີນ ອັນໄດ້ສົ່ງຜົນກະທົບຕໍ່ການດໍາລົງຊີວິດ ກໍ່ຄືສ້າງຄວາມສູນເສຍດ້ານຊີວິດ ແກ່ປະຊາຊົນຈີນຈໍານວນຫຼວງຫຼາຍ.

ໃນນາມພັກ, ລັດຖະບານ ແລະ ປະຊາຊົນລາວ ກໍຄືໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເຫັນອົກເຫັນໃຈ ແລະ ເສົ້າສະຫລົດໃຈຢ່າງສຸດຊຶ້ງ ຜ່ານສະຫາຍ ມາຍັງພັກ, ລັດຖະບານ ແລະ ປະຊາຊົນຈີນອ້າຍນ້ອງ ໂດຍສະເພາະບັນດາຄອບຄົວ ຂອງຜູ້ເສຍຊີວິດໃນຄັ້ງນີ້. ພັກ, ລັດຖະບານ ແລະ ປະຊາຊົນລາວ ຂໍແບ່ງປັນຄວາມທຸກໂສກ ແລະ ຂໍເປັນກໍາລັງໃຈໃຫ້ ພັກ, ລັດຖະບານ ແລະ ປະຊາຊົນຈີນອ້າຍນ້ອງ ເພື່ອປ້ອງກັນ ແລະ ຕໍ່ສູ້ກັບການລະບາດຂອງເຊື້ອພະຍາດດັ່ງກ່າວ ຮ່ວມກັບວົງຄະນາຍາດສາກົນ ໃຫ້ມີຜົນສໍາເລັດສູງສຸດ.

ຂ້າພະເຈົ້າ ຕີລາຄາສູງຕໍ່ການຊີ້ນໍາ-ນໍາພາລະດັບສູງ ແລະ ທັນການຂອງ ພັກ ແລະ ລັດຖະບານ ສປ ຈີນ ເພື່ອສຸມທຸກກໍາລັງແຮງເຂົ້າ ໃນການຄວບຄຸມການລະບາດ ຂອງເຊື້ອໄວຣັສໂຄໂລນາ ດັ່ງກ່າວ ຈົນສາມາດເຮັດໃຫ້ການລະບາດຖືກຈໍາກັດລົງ. ພ້ອມດຽວກັນ ກໍ່ເຊື່ອໝັ້ນຢ່າງໜັກແໜ້ນນວ່າ ພາຍໃຕ້ການຊີ້ນໍາ-ນໍາພາ ແລະ ການເອົາໃຈໃສ່ຢ່າງໃກ້ຊິດ ຂອງບັນດາສະຫາຍການນຳຂັ້ນສູນກາງ ກໍຄືທ້ອງຖິ່ນ, ສປ ຈີນ ຈະສາມາດຜ່ານຜ່າຄວາມທຸກຍາກໃນຄັ້ງນີ້ ແລະ ຟື້ນຟູສະພາບດັ່ງກ່າວ ໃຫ້ກັບຄືນສູ່ສະພາບປົກກະຕິໂດຍໄວ.

ນະຄອນຫຼວງວຽງຈັນ, ວັນທີ 28 ມັງກອນ 2020

ທອງລຸນ ສີສຸລິດ

ນາຍົກລັດຖະມົນຕີ

ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ