ໃນ​ຕອນ​ບ່າຍວັນທີ 23 ມັງກອນ 2019, ສະຖານທູດໄດ້ຕາງຫນ້າໃຫ້ ສູນກາງແນວລາວສ້າງຊາດ ຈັດພິທີມອບໃບຍ້ອງຍໍໃຫ້ແກ່ບັນດາບຸກຄົນ ແລະ ອົງການຕ່າງໆ ຂອງ ສ.ເກົາຫລີ ທີ່ໄດ້ປະກອບສ່ວນຊ່ວຍເຫລືອຢາປົວພະຍາດ ແລະ ອຸປະກອນການແພດ ລວມມູນຄ່າປະມານ 620.406.704 ວອນ ຫລື ປະມານ 550.000 ໂດລາ ສະຫະລັດ ໃຫ້ແກ່ເມືອງສະຫນາມໄຊ, ແຂວງອັດຕະປື. ການຊ່ວຍເຫລືອດັ່ງກ່າວແມ່ນມູນນິທິ Korea Love Sharing Community ແລະ ມູນນິທິ Good Partners ໄດ້ຮ່ວມກັນລະດົມການປະກອບສ່ວນຈາກບຸກຄົນ ແລະ ອົງການຕ່າງໆດັ່ງກ່າວ, ເຊິ່ງເຄື່ອງຊ່ວຍເຫລືອແມ່ນໄດ້ສົ່ງໄປລາວແລ້ວ ໂດຍຜ່ານ ສູນກາງແນວລາວສ້າງຊາດ ໃນເດືອນພະຈິກ 2018 ທີ່ຜ່ານມາ ເພື່ອນຳໄປມອບຕໍ່ໃຫ້ເມືອງສະຫນາມໄຊ.

ໃນຕອນເຊົ້າຂອງວັນທີ 24 ມັງກອນ 2019, ທີ່ ອົງການສະຫະປະຊາຊາດ, ນະຄອນຫລວງວຽນ, ສາທາລະນະລັດ ໂອຕຣິດ, ທ່ານ ສີທົງ ຈິດໂຍທິນ, ເອກອັກຄະລັດຖະທູດ ໄດ້ຍື່ນສານແຕ່ງຕັ້ງຕໍ່ ທ່ານ Dazhu Yang, ຮອງຜູ້ອໍານວຍການໃຫຍ່ອົງການພະລັງງານປະລະມະນູສາກົນ (International Atomic Energy Agency) ເພື່ອດຳລົງຕຳແໜ່ງເປັນ ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ອົງການພະລັງງານປະລະມະນູສາກົນ (IAEA), ສປຊ.

ໃນຕອນເຊົ້າຂອງວັນທີ 22 ມັງກອນ 2019, ທີ່ອົງການສະຫະປະຊາຊາດ, ນະຄອນຫລວງວຽນ, ສາທາລະນະລັດໂອຕຣິດ, ທ່ານສີທົງຈິດໂຍທິນ, ເອກອັກຄະລັດຖະທູດ ໄດ້ຍື່ນສານແຕ່ງຕັ້ງຕໍ່ທ່ານ       LI Yong, ຜູ້ອໍານວຍການໃຫຍ່ ອົງການສະຫະປະຊາຊາດ ເພື່ອການພັດທະນາອຸດສາຫະກໍາ (United Nations Industrial Development Organization)ເພື່ອດຳລົງຕຳແໜ່ງເປັນ ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ອົງການ ສປຊ ເພື່ອການພັດທະນາອຸດສາຫະກໍາ (UNIDO).