ໃນເວລາ 09:00 ໂມງ ວັນທີ 20 ມີນາ 2018 ທີ່ສະຖານທູດຫວຽດນາມ ຢູ່ນະຄອນຫຼວງວຽງຈັນ, ສະຫາຍ ທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍການນຳຂັ້ນສູງຂອງລາວ ໄດ້ຕາງໜ້າ ພັກ, ລັດຖະບານ, ສະພາແຫ່ງຊາດ ແລະ ສູນກາງແນວລາວສ້າງຊາດ ເຂົ້າວາງພວງມາລາ ແລະ ຂຽນປື້ມໄຫວ້ອາໄລ ຕໍ່ການເສຍຊີວິດ ຂອງ ສະຫາຍ ຟານ ວັນ ຄາຍ, ອະດີດຄະນະບໍລິຫານງານສູນກາງພັກຄອມມູນິດຫວຽດນາມ ສະໄໝ ທີ V, VI, VII, VIII, IX; ອະດີດກໍາມະການກົມການເມືອງສູນກາງພັກຄອມມູນິດຫວຽດນາມ ສະໄໝ ທີ VII, VIII, IX; ອະດີດຄະນະປະຈຳກົມການເມືອງສະໄໝທີ VIII; ອະດີດນາຍົກລັດຖະມົນຕີ ແຫ່ງ ສສ.ຫວຽດນາມ, ທັງເປັນອະດີດສະມາຊິກສະພາແຫ່ງຊາດຫວຽດນາມ ສະໄໝ ທີ VIII, IX, X, XI.

ໃນໂອກາດເດີນທາງເຂົ້າຮ່ວມກອງປະຊຸມສຸດຍອດ ສະໄຫມພິເສດ ອາຊຽນ-ອົດສະຕຣາລີ ທີ່ ຊິດນີ, ປະເທດອົດສະຕຣາລີ ລະຫວ່າງວັນທີ 15-19 ມີນາ 2018, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ໄດ້ຕ້ອນຮັບການເຂົ້າຢ້ຽມຂ່ຳນັບຂອງພີ່ນ້ອງຄົນເຊື້ອຊາດລາວ ທີ່ດຳລົງຊີວິດ ຢູ່ ອົດສະຕຣາລີ ນໍາໂດຍ ທ່ານ ນາງ ໄພວັນ ພູມິນ ພົນເສນາ, ກຳມະການສູນກາງແນວລາວສ້າງຊາດ ປະຈຳ ອົດສະຕຣາລີ ປະມານເກືອບ 50 ທ່ານ, ໃນຕອນແລງຂອງວັນທີ 16 ມີນາ 2018.

ໃນວັນທີ 18 ມີນາ 2018, ສະພາການຄ້າ ແລະ ອຸດສາຫະກຳ ລາວ ແລະ ອົດສະຕຣາລີ ໄດ້ຮ່ວມກັນຈັດກອງປະຊຸມພາກທຸລະກິດ ລາວ-ອົດສະຕຣາລີ ຂຶ້ນທີ່ ຊິດນີ, ປະເທດ ອົດສະຕຣາລີ, ເພື່ອເປັນເວທີສົ່ງເສີມການຄ້າ-ການລົງທຶນ ລະຫວ່າງສອງປະເທດ, ພ້ອມທັງເປັນການສ້າງໂອກາດອັນໃຫມ່ ໃຫ້ແກ່ນັກທຸລະກິດ ລາວ ແລະ ອົດສະຕຣາລີ ໄດ້ມີການພົບປະແລກປ່ຽນດ້ານທຸລະກິດເຊິ່ງກັນ ແລະ ກັນ, ຊຶ່ງໃຫ້ກຽດເຂົ້າຮ່ວມໃນກອງປະຊຸມຄັ້ງນີ້ໂດຍ ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ; ທ່ານ ນາງ ຈູລີ ບິຊອບ (Julie Bishop), ລັດຖະມົນຕີກະຊວງການຕ່າງປະເທດ ແຫ່ງ ອົດສະຕຣາລີ; ມີບັນດາລັດຖະມົນຕີ, ຮອງລັດຖະມົນຕີ ທີ່ກ່ຽວຂ້ອງ ແລະ ບັນດານັກທຸລະກິດຂອງທັງສອງຝ່າຍເຂົ້າຮ່ວມ ປະມານ 100 ທ່ານ.