ໃນໂອກາດເດີນທາງຢ້ຽມຢາມປະເທດຍີ່ປຸ່ນ ເພື່ອເຂົ້າຮ່ວມກອງປະຊຸມສຸດຍອດອາຊຽນ-ຍີ່ປຸ່ນ ຄົບຮອບ 50 ປີ ແຫ່ງມິດຕະພາບ ແລະ ການຮ່ວມມື ໃນລະຫວ່າງວັນທີ 16-18 ທັນວາ 2023 ທີ່ ນະຄອນຫຼວງໂຕກຽວ,  ໃນວັນທີ 16 ທັນວາ 2023, ພະນະທ່ານ ສອນໄຊ ສີພອນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະສອງຝ່າຍກັບ ພະນະທ່ານ ກິຊິດະ ຟຸມິໂອະ, ນາຍົກລັດຖະມົນຕີ ແຫ່ງ ປະເທດຍີ່ປຸ່ນ, ເຊິ່ງການພົບປະໄດ້ດໍາເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ ແລະ ການຮ່ວມມືທີ່ດີເພື່ອພ້ອມກັນສືບຕໍ່ຊຸກຍູ້ສົ່ງເສີມຂະແໜງການກ່ຽວຂ້ອງຂອງສອງຝ່າຍ ລາວ ແລະ ຍີ່ປຸ່ນ ຈັດຕັ້ງປະຕິບັດແຜນປະຕິບັດງານຮ່ວມ ລາວ-ຍີ່ປຸ່ນ 2021-2025 (Lao-Japan Action Plan 2021-2025) ທີ່ສອງລັດຖະບານໄດ້ຮັບຮອງຮ່ວມກັນ ໃນເດືອນເມສາ 2021 ທີ່ຜ່ານມາ, ຄຽງຄູ່ກັບການສະໜັບສະໜູນຂອງລັດຖະບານຍີ່ປຸ່ນ ສໍາລັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 9 ຂອງ ສປປ ລາວ ໃຫ້ສໍາເລັດຜົນຕາມຄາດໝາຍ.

ສອງຝ່າຍ ຍັງໄດ້ເຫັນດີເປັນເອກະພາບໃນການສືບຕໍ່ຮ່ວມມືກັນຢ່າງໃກ້ຊິດ ເພື່ອຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານຂອງສອງປະເທດ, ໂດຍສະເພາະ ການເປັນຄູ່ຮ່ວມຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ ໃຫ້ໄດ້ຮັບການພັດທະນາຂຶ້ນຢ່າງບໍ່ຢຸດຢັ້ງ. ຝ່າຍລາວ ໄດ້ສະແດງຄວາມພ້ອມສໍາລັບການເປັນປະທານອາຊຽນ 2024 ແລະ ສະແດງຄວາມຂອບໃຈລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນໄລຍະຜ່ານມາ ເພື່ອພັດທະນາບັນດາຂົງເຂດທີ່ເປັນບູລິມະສິດ ເປັນຕົ້ນແມ່ນ ການພັດທະນາຊັບພະຍາກອນມະນຸດ, ສາທາລະນະສຸກ, ພື້ນຖານໂຄງລ່າງ, ການເກັບກູ້ລະເບີດບໍ່ທັນແຕກທີ່ຕົກຄ້າງ (UXO) ແລະ ອື່ນໆ, ລວມທັງການຊ່ວຍເຫຼືອ ລົດເກັງ Toyota Camry ຈໍານວນ 33 ຄັນ ແລະ ອຸປະກອນ IT ຈໍນວນໜຶ່ງ ເພື່ອຮັບໃຊ້ເຂົ້າໃນວຽກງານພະລາທິການສໍາລັບການເປັນປະທານອາຊຽນ 2024 ຂອງ ສປປ ລາວ, ພິເສດແມ່ນການອະນຸມັດໂຄງການປັບປຸງສະໜາມກິລາເຈົ້າອານຸວົງ ໃນເດືອນພະຈິກ 2023 ທີ່ຜ່ານມາ, ເຊິ່ງຄາດຄະເນຈະສໍາເລັດ ແລະ ມອບຮັບໂຄງການໃນປີ 2025, ອັນຈະກາຍເປັນສັນຍາລັກທີ່ສໍາຄັນສໍາລັບການພົວພັນ ແລະ ການຮ່ວມມື ລາວ-ຍີ່ປຸ່ນ ຖັດຈາກ ຊ້າງ ແລະ ດອກຊາກຸຣະ.

ສອງຝ່າຍ ຍັງໄດ້ເຫັນດີເປັນເອກະພາບໃນການສົ່ງເສີມການຮ່ວມມືດ້ານພະລັງງານສະອາດ, ສືບຕໍ່ສົ່ງເສີມການໄປມາຫາສູ່ຂອງປະຊາຊົນສອງຊາດ ລາວ ແລະ ຍີ່ປຸ່ນ, ໂດຍສະເພາະ ການຈັດປີທ່ອງທ່ຽວລາວ 2024 ໃຫ້ມີບັນຍາກາດຄຶກຄື້ນ ແລະ ການກະກຽມສະເຫລີມສະຫລອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ຍີ່ປຸ່ນ ຄົບຮອບ 70 ປີ ໃນປີ 2025 ທີ່ຈະມາເຖິງນີ້ ໃຫ້ມີເນື້ອໃນ ແລະ ສໍາເລັດຜົນຕາມຄາດໝາຍ. ນອກຈາກນັ້ນ, ສອງຝ່າຍ ຍັງໄດ້ແລກປ່ຽນຄໍາຄິດເຫັນກ່ຽວກັບບັນຫາພາກພື້ນ ແລະ ສາກົນທີ່ສອງຝ່າຍມີຄວາມສົນໃຈຮ່ວມກັນ, ເພື່ອສົ່ງເສີມການພັດທະນາຂອງຂົງເຂດ ແລະ ພາກພື້ນ, ໂດຍສະເພາະ ການສືບຕໍ່ສົ່ງເສີມການຮ່ວມມືໃນຂອບ ອາຊຽນ-ຍີ່ປຸ່ນ ໃຫ້ມີບາດກ້າວຂະຫຍາຍຕົວໃໝ່.