ພະນະ​ທ່ານ ທອງ​ລຸນ ສີ​ສຸ​ລິດ, ປະທານປະເທດ ​ແຫ່ງ ສປປ ລາວ ​ໄດ້ເຂົ້າ​ຮ່ວມ​ກອງ​ປະຊຸມ​ສາກົນ ວ່າດ້ວຍອະນາຄົດ​ຂອງ​ອາຊີ ຄັ້ງ​ທີ 27 ​ໃນ​ຮູບ​ແບບ​ກອງ​ປະຊຸມ​ທາງ​ໄກ, ພາ​ຍ​ໃຕ້​ຫົວຂໍ້: “ບົດບາດໃໝ່ຂອງອາຊີ ໃນໂລກທີ່    ແບ່ງຂົ້ວ (Redefining Asia’s role in a divided world)”, ​​ຈັດ​ຂຶ້ນໂດຍສໍານັກຂ່າວໜັງສືພິມເສດຖະກິດຍີ່ປຸ່ນ (NIKKEI), ໃນ​ວັນ​ທີ 26-27 ພຶດສະພາ 2022, ​ທີ່​ນະຄອນຫຼວງໂຕ​ກຽວ, ປະ​ເທດ​ຍີ່​ປຸ່ນ​. ໃນກອງປະຊຸມຄັ້ງນີ້ ໄດ້ມີການນຳ, ອະດີດການນຳຂອງບັນດາປະເທດໃນພາກພື້ນອາຊີ ກໍ່ຄືຜູ້ເຂົ້າຮ່ວມຈາກພາກລັດ, ພາກທຸລະກິດ, ສື່ມວນຊົນ, ນັກຄົ້ນຄວ້າ ເຂົ້າຮ່ວມຢ່າງຫຼວງຫຼາຍ. ຈຸດປະສົງຂອງກອງປະຊຸມແມ່ນ ເພື່ອແລກປ່ຽນທັດສະນະຕໍ່ກັບສະພາບການທີ່ເກີດຂຶ້ນໃນປະຈຸບັນ ແລະ ຊຸກຍູ້ບົດບາດຂອງອາຊີຕໍ່ໂລກຄືແນວໃດ ດ້ວຍເປົ້າໝາຍອັນດຽວກັນ ແລະ ສອດຄ່ອງກັນ.

ໃນ​ກອງປະຊຸມຄັ້ງນີ້​​ ພະນະ​ທ່ານ ປະທານປະເທດ ໄດ້ກ່າວປາ​ໄສຜ່ານ​ສື່​ອີ​ເລັກ​ໂຕຼນິກ (Online) ​​​ເຊິ່ງມີ          ​ເນື້ອ​ໃນ​ສ່​ອງ​ແສງ​ໃຫ້​ເຫັນ​ເຖິງສະພາບ​ການປະຈຸ​ບັນ​ທີ່​ໂລກ​ກຳລັງ​ປະ​ເຊີນ​ກັບ​ຄວາມ​ຫຍຸ້ງຍາກ, ສັບສົນ, ຄວາມ​ຂັດ​ແຍ່ງ, ​ແບ່ງ​ຂົ້ວ ​ເຊິ່ງສະພາບ​ການ​ທີ່​ທ້າ​ທາຍ​ດັ່ງກ່າວ​ມັນ​ຮຽກຮ້ອງ​ໃຫ້​ປະຊາ​ຄົມ​ໂລກ​ກໍ່​ຄື​ພາກ​ພື້ນ​ອາຊີໃນຖານະເປັນຫົວຈັກ ຂັບເຄື່ອນທີ່ສຳຄັນຕໍ່ການຂະຫຍາຍຕົວຂອງເສດຖະກິດໂລກ ທັງເປັນຜູ້ລິເລີ່ມສ້າງຕັ້ງຫລາຍກົນໄກການຮ່ວມມືໃໝ່ທີ່ກວ້າງຂວາງ ແລະ ຮອບດ້ານ ຄວນສືບຕໍ່ຍົກສູງບົດບາດຂອງຕົນໃນການປະກອບສ່ວນເຂົ້າໃນການແກ້ໄຂບັນຫາ ແລະ ສິ່ງທ້າທາຍດັ່ງກ່າວ ແນໃສ່ເພື່ອປົກປ້ອງ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມໝັ້ນຄົງ, ສ້າງຄວາມໄວ້ເນື້ອເຊື່ອໃຈກັນ, ເຄົາລົບເຊິ່ງກັນ ແລະ ກັນ, ສ້າງສັນ ພ້ອມ​ທັງສ້າງ​ສະພາບ​ແວດ​ລ້ອມ​ທີ່​ເອື້ອ​ອຳນວຍ​ໃຫ້​ແກ່ການພັດທະນາ, ການ​ເຊື່ອມ​ໂຍງ, ການ​ເຊື່ອມ​ຈອດ ແລະ ການຮ່ວມມືຕ່າງຝ່າຍຕ່າງມີຜົນປະໂຫຍດ. ພ້ອມກັນນີ້,  ພະນະທ່ານ ປະທານປະເທດ ກໍ່ໄດ້ຍົກໃຫ້ເຫັນວ່າ ອາຊີ  ຄວນ​ສືບ​ຕໍ່ຮ່ວມແຮງຮ່ວມໃຈກັນ ໃນການເພີ່ມທະວີການຮ່ວມມື ແລະ ຄວາມພະຍາຍາມໃນການຮັບປະກັນສັນຕິພາບ ແລະ ສະຖຽນລະພາບ ດ້ວຍການແກ້ໄຂບັນຫາຂໍ້ຂັດແຍ່ງຕ່າງໆ        ໂດຍສັນຕິວິທີໂດຍຜ່ານການເຈລະຈາ ແລະ ປຶກສາຫາລືແບບສ້າງສັນ ບົນພື້ນຖານ ຂອງການເຄົາລົບນັບຖືເຊິ່ງກັນ    ແລະ ກັນ, ເພີ່ມທະວີການຊ່ວຍເຫຼືອເຊິ່ງກັນ ແລະ ກັນ ພ້ອມ​ທັງ ສືບຕໍ່ຮ່ວມມືກັນ ຟື້ນຟູສະພາບເສດຖະກິດ-ສັງຄົມ  ອັນເນື່ອງມາຈາກຜົນກະທົບຂອງການແຜ່ລະບາດຂອງພະຍາດໂຄວິດ-19 ແລະ ໄດ້ຖືໂອກາດນີ້ສະແດງຄວາມ ຂອບໃຈຕໍ່ປະເທດເພື່ອນມິດ, ບັນດາຄູ່ຮ່ວມພັດທະນາ ແລະ ອົງການຈັດຕັ້ງສາກົນ ໂດຍສະເພາະ ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າໃນການປະກອບສ່ວນອັນສຳຄັນເຂົ້າໃນການ ພັດທະນາເສດຖະກິດ-ສັງຄົມຂອງ ສປປ ລາວ​.

ພະນະ​ທ່ານ ທອງ​ລຸນ ສີ​ສຸ​ລິດ, ປະທານປະເທດ ​ແຫ່ງ ສປປ ລາວ ​ໄດ້ເຂົ້າຮ່ວມກອງປະຊຸມສາກົນ​ວ່າອະນາຄົດ​ຂອງ​ອາຊີ​ລວມ​ຄັ້ງນີ້ເປັນ ຄັ້ງທີ 6, ນັບແຕ່ເຄີຍດໍາລົງຕໍາແໜ່ງເປັນຮອງນາຍົກລັດຖະມົນຕີ, ລັດຖະມົນຕີກະຊວງ      ການຕ່າງປະເທດ ແລະ ນາຍົກລັດຖະມົນຕີ ແຫ່ງ ສປປ ລາວ, ເຊິ່ງການປາໄສຂອງ​ພະນະ​ທ່ານແຕ່ລະຄັ້ງ ໄດ້ສະແດງໃຫ້ເຫັນເຖິງ ວິໄສທັດທີ່ສອດຄ່ອງກັບສະພາບການຕົວຈິງ ແລະ ປິ່ນອ້ອມຫົວຂໍ້ຂອງກອງປະຊຸມໃນແຕ່ລະຄັ້ງ. ພ້ອມນີ້,   ຍັງເປັນການ​​​ປະກອບສ່ວນ​ເຂົ້າ​ໃນ​ການ​ຮັດ​ແໜ້ນ​ສາຍ​ພົວພັນ​ມິດຕະພາບ ແລະ ການຮ່ວມມືອັນດີງາມທີ່ມີມາແຕ່       ດົນນານ ກໍຄືການເປັນຄູ່ຮ່ວມ​ມື​ຍຸດທະສາດ ລະຫວ່າງ ສປປ ລາວ ​ແລະ ຍີ່ປຸ່ນ ໃຫ້​ກວ້າງຂວາງແໜ້ນແຟ້ນ ​ແລະ              ​ເລິກ​ເຊິ່ງຂຶ້ນ​ກວ່າ​ເກົ່າ.