ໃນວັນທີ 04 ສິງຫາ 2021, ທີ່ ຫ້ອງວ່າການປະທານປະເທດ, ພະນະທ່ານ ທອງລຸນສີສຸລິດ, ປະທານປະເທດແຫ່ງສປປລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ພະນະທ່ານອິກນາຊີໂອ ກາດສິດສ, ຮອງປະທານາທິບໍດີ, ລັດຖະມົນຕີກະຊວງການຕ່າງປະເທດແຫ່ງສະມາພັນທະລັດສະວິດພ້ອມດ້ວຍຄະນະ ໃນໂອກາດມາຢ້ຽມຢາມທາງການຢູ່ສປປລາວໃນວັນທີ3-4 ສິງຫາ 2021.
ໃນໂອກາດດັ່ງກ່າວ,ພະນະທ່ານ ປະທານປະເທດ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ພະນະທ່ານ ອິກນາຊີໂອ ກາດສິດສ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມທາງການຢູ່ ສປປ ລາວ ໃນຄັ້ງນີ້,ຊຶ່ງເປັນມິດໝາຍອັນດີ ໃຫ້ແກ່ການຮັດແໜ້ນສາຍພົວພັນມິດຕະພາບແລະ ການຮ່ວມມືທີ່ເປັນມູນເຊື້ອອັນດີງາມ ລະຫວ່າງ ລາວ-ສະວິດ ໃຫ້ແໜ້ນແຟ້ນຍິ່ງໆຂຶ້ນບົນພື້ນຖານຄວາມເຂົ້າອົກເຂົ້າໃຈ ແລະ ໄວ້ເນື້ອເຊື່ອໃຈເຊິ່ງກັນ ແລະ ກັນ ລະຫວ່າງ ການນຳຂັ້ນສູງຂອງສອງປະເທດ. ພ້ອມນັ້ນ, ພະນະທ່ານ ປະທານປະເທດ ກໍໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈ ຕໍ່ການຊ່ວຍເຫຼືອອັນລໍ້າຄ່າຂອງລັດຖະບານ ແລະ ປະຊາຊົນສະວິດ ໃຫ້ແກ່ ສປປ ລາວ ໃນໄລຍະຜ່ານມາ ທັງໃນຂອບສອງຝ່າຍ ແລະ ຫຼາຍຝ່າຍ ເປັນຕົ້ນ ຂົງເຂດກະສິກຳ ແລະ ຄ້ຳປະກັນສະບຽງອາຫານ; ການປົກຄອງ ແລະ ການມີສ່ວນຮ່ວມຂອງປະຊາຊົນ; ອາຊີວະສຶກສາ, ການຈ້າງງານ ແລະ ການພັດທະນາສີມືແຮງງານ.ໃນໂອກາດດຽວກັນ, ພະນະທ່ານ ຮອງປະທານາທິບໍດີ, ລັດຖະມົນຕີກະຊວງການຕ່າງປະເທດແຫ່ງສະມາພັນທະລັດສະວິດ ກໍ່ໄດ້ສະແດງຄວາມຂອບໃຈໃນການຕ້ອນຮັບອັນອົບອຸ່ນຄັ້ງນີ້ ພ້ອມທັງສະແດງຄວາມເຫັນດີເປັນເອກະພາບ ກ່ຽວກັບ ການຕີລາຄາສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືມາແຕ່ຍາວນານ ລະຫວ່າງ ລາວ-ສະວິດ.
ໃນວັນດຽວກັນ, ພະນະທ່ານ ຮອງປະທານາທິບໍດີ, ລັດຖະມົນຕີກະຊວງການຕ່າງປະເທດແຫ່ງສະມາພັນທະລັດສະວິດ ກໍໄດ້ພົບປະກັບ ພະນະທ່ານສອນໄຊສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນແຫ່ງ ສປປ ລາວ, ທີ່ ກະຊວງແຜນການ ແລະ ການລົງທຶນ. ສອງຝ່າຍ ໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ສອງປະເທດ ຊຶ່ງມີລັກສະນະຕັ້ງໜ້າພ້ອມທັງມີຈຸດສຸມ ແລະ ມີລະດັບການຈັດຕັ້ງປະຕິບັດຢ່າງເປັນລະບົບ ແລະ ມີເປົ້າໝາຍໃນການຫຼຸດຜ່ອນຄວາມທຸກຍາກຂອງ ສປປ ລາວ. ໃນໂອກາດດັ່ງກ່າວນີ້, ສອງຝ່າຍໄດ້ລົງນາມຮ່ວມກັນໃນສັນຍາ ວ່າດ້ວຍການຮ່ວມມືດ້ານເຕັກນິກ, ວັດທະນະທຳ, ເສດຖະກິດແລະການເງິນແລະການຊ່ວຍເຫຼືອດ້ານມະນຸດສະທຳລະຫວ່າງລັດຖະບານສປປລາວແລະລັດຖະບານສະວິດໄລຍະປີ2022-2025ລວມມູນຄ່າປະມານ 65 ລ້ານໂດລາສະຫະລັດ, ຊຶ່ງເປັນການຊ່ວຍເຫຼືອໃນຂອບໃໝ່ເພື່ອໃຫ້ສອດຄ່ອງກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ສະໄໝທີ 9.
ໃນໂອກາດຢ້ຽມຢາມ ສປປ ລາວ ໃນຄັ້ງນີ້, ພະນະທ່ານຮອງປະທານາທິບໍດີ, ລັດຖະມົນຕີກະຊວງການຕ່າງປະເທດແຫ່ງສະມາພັນທະລັດສະວິດພ້ອມດ້ວຍຄະນະຍັງໄດ້ໄປຢ້ຽມຢາມສູນຈໍາກັດບໍລິເວນ (ຫຼັກ 27) ແລະ ຢ້ຽມຊົມສະຖານທີ່ທ່ອງທ່ຽວທາງດ້ານວັດທະນະທຳທີ່ສຳຄັນຕ່າງໆໃນນະຄອນຫຼວງວຽງຈັນ ເຊັ່ນ: ພະທາດຫຼວງວຽງຈັນ, ພິພິທະພັນ ຫໍພະແກ້ວ ແລະ ຫໍພິພິທະພັນ ວັດສີສະເກດ.
*******************