ກອງປະຊຸມໃຫຍ່ຜູ້ແທນ ຄັ້ງທີ IV ຂອງອົງຄະນະພັກກະຊວງການຕ່າງປະເທດໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 5 ພະຈິກ 2020, ທີ່ ສູນການຮ່ວມມື ແລະ ຝຶກອົບຮົມສາກົນ (ICTC), ນະຄອນຫຼວງ ວຽງຈັນ, ຊຶ່ງຈະໄດ້ດໍາເນີນໄປເປັນເວລາ 1 ວັນເຄິ່ງ, ພາຍໃຕ້ການເປັນປະທານຂອງ ສະຫາຍ ສະເຫຼີມໄຊ ກົມມະສິດ, ກໍາມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໂດຍການໃຫ້ກຽດເຂົ້າຮ່ວມຂອງ ສະຫາຍທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະ ມົນຕີ ແຫ່ງ ສປປລາວ, ມີບັນດາແຂກທີ່ຖືກເຊີນຈາກກະຊວງ ແລະ ອົງການອ້ອມຂ້າງສູນກາງຈຳນວນໜຶ່ງ, ບັນດາສະຫາຍສະມາຊິກພັກອາວຸໂສບຳນານ, ບັນດາສະຫາຍຕາງໜ້າຈາກອົງການຈັດຕັ້ງມະຫາຊົນ ແລະ ບັນດາສະຫາຍຜູ້ແທນສົມບູນ ເຂົ້າຮ່ວມທັງໝົດ 221 ສະຫາຍ, ຍິງ 58 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກ-ພະນັກງານ ແລະ ນັກສຶກສາທັງໝົດ ທີ່ຂຶ້ນກັບກະຊວງການຕ່າງປະເທດ ຈໍານວນ 2.550 ສະຫາຍ ທັງພາຍໃນ ແລະ ຕ່າງປະເທດ.
ໃນໂອກາດນີ້, ສະຫາຍ ສະເຫຼີມໄຊ ກົມມະສິດ ໄດ້ຜ່ານບົດລາຍງານການເມືອງ ເພື່ອສະຫຼຸບຕີລາຄາຜົນຂອງ ການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນ ຄັ້ງທີ III ຂອງອົງຄະນະພັກກະຊວງການຕ່າງປະເທດ, ຊຶ່ງໄດ້ສະ ຫຼຸບຕີລາຄາວ່າ: ໃນໄລຍະ 5 ປີ ຜ່ານມາ ຄະນະພັກ-ຄະນະນໍາກະຊວງການຕ່າງປະເທດ ໄດ້ເດັດດ່ຽວເສີມຂະຫຍາຍ ມູນເຊື້ອປະຕິວັດ ແລະ ເຊີດຊູຄວາມຮັບຜິດຊອບໃນການນໍາເອົາແນວທາງນະໂຍບາຍ, ມະຕິຄໍາສັ່ງ ແລະ ການຊີ້ນໍາ ຂອງກົມການເມືອງສູນການພັກກໍ່ຄືມະຕິຂອງກອງປະຊຸມໃຫຍ່ ຄັ້ງທີ III ຂອງອົງຄະນະພັກກະຊວງການຕ່າງປະເທດ ມາຈັດຕັ້ງປະຕິບັດຢ່າງຕັ້ງໜ້າ ແລະ ດ້ວຍຄວາມຮັບຜິດຊອບສູງ, ຊຶ່ງກະຊວງການຕ່າງປະເທດ ໄດ້ສືບຕໍ່ເຄື່ອນໄຫວ ວຽກງານຢູ່ໃນທ່າບຸກໂດຍຍຶດໝັ້ນຕາມແນວທາງນະໂຍບາຍການຕ່າງປະເທດ “ສັນຕິພາບ ເອກະລາດ ມິດຕະພາບ ແລະ ການຮ່ວມມື” ຢ່າງສະເໝີຕົ້ນ ສະເໝີປາຍ; ສົ່ງເສີມການພົວພັນຮ່ວມມືກັບຕ່າງປະເທດແບບ ຫຼາຍທິດ, ຫຼາຍຝ່າຍ, ຫຼາຍລະດັບ ບົນພື້ນຖານເຄົາລົບເອກະລາດ, ອໍານາດອະທິປະໄຕຂອງກັນ ແລະ ກັນ ແລະ ຕ່າງຝ່າຍຕ່າງມີຜົນປະໂຫຍດ; ຕັ້ງໜ້າປະຕິບັດຄໍາຂວັນ “ການທູດປ້ອງກັນເຫດ ແລະ ບຸກທະລຸ ເພື່ອປົກປັກ ຮັກສາ ແລະ ພັດທະນາປະເທດຊາດ” ແລະ ປະຕິບັດຕາມທິດນໍາເພີ່ມມິດ ຫຼຸດຜ່ອນສັດຕູ, ທັງຕໍ່ສູ້ທັງຍາດແຍ່ງ ເຮັດໃຫ້ການພົວພັນຮ່ວມມືສາກົນສືບຕໍ່ໄດ້ຮັບການເປີດກວ້າງ, ເພື່ອນມິດຂອງ ສປປ ລາວ ນັບມື້ນັບເພີ່ມຂຶ້ນ. ການ ເຄື່ອນໄຫວຢ່າງຕັ້ງໜ້າໃນວຽກງານການຕ່າງປະເທດ ທັງໃນຂອບສອງຝ່າຍ ແລະ ຫຼາຍຝ່າຍສາມາດປະກອບສ່ວນເຂົ້າ ໃນການສ້າງສະພາບແວດລ້ອມພາຍນອກທີ່ເອື້ອອໍານວຍໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດ ຊາດ, ຮັບປະກັນຄວາມໝັ້ນຄົງຂອງລະບອບ, ຮັກສາໄດ້ເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນ, ສາມາດຂົນຂວາຍຍາດແຍ່ງການຮ່ວມມື ແລະ ການຊ່ວຍເຫຼືອຈາກສາກົນເພື່ອປະກອບສ່ວນເຂົ້າໃນການພັດທະນາເສດ ຖະກິດ-ສັງຄົມ, ພ້ອມກັນນັ້ນ ກໍ່ເຮັດໃຫ້ບົດບາດ ຂອງ ສປປ ລາວ ນັບມື້ນັບສູງເດັ່ນຂຶ້ນຢູ່ໃນເວທີພາກພື້ນ ແລະ ສາກົນ.
ມາຮອດປັດຈຸບັນ ສປປ ລາວ ໄດ້ມີສາຍພົວພັນການທູດທັງໝົດກັບ 143 ປະເທດ, ທຽບໃສ່ປີ 2015 ແມ່ນ ເພີ່ມຂຶ້ນ 5 ປະເທດ, ມີສາຍພົວພັນກັບ 139 ພັກການເມືອງ ຈາກ 85 ປະເທດໃນໂລກ, ມີສໍານັກງານຜູ້ຕາງໜ້າ ແຫ່ງ ສປປ ລາວ ປະຈໍາຢູ່ ຕ່າງປະເທດ ຈໍານວນ 40 ແຫ່ງ, ແຈກຢາຍຢູ່ 27 ປະເທດ ໃນໂລກ, ໃນນັ້ນ ປະກອບມີສະ ຖານເອກອັກຄະລັດຖະທູດ 26 ແຫ່ງ, ສໍານັກງານຜູ້ຕາງໜ້າຖາວອນ 3 ແຫ່ງ, ສະຖານກົງສຸນໃຫຍ່ 10 ແຫ່ງ, ຫ້ອງ ການກົງສຸນ 1 ແຫ່ງ ແລະ ມີກົງສຸນກິດຕິມະສັກຂອງ ສປປ ລາວ ຢູ່ 17 ປະເທດ. ໃນ 5 ປີຜ່ານມາ ໄດ້ສ້າງຕັ້ງສະ ຖານກົງສຸນໃຫຍ່ເພີ່ມ 2 ແຫ່ງ ຄື: ຢູ່ ນະຄອນຊາງຊາ, ສປ ຈີນ ແລະ ແຂວງຊຽງແຕງ, ຣາຊະອານາຈັກ ກໍາປູເຈຍ. ມາ ຮອດປັດຈຸບັນ ມີສະຖານທູດຂອງຕ່າງປະເທດ ປະຈຳຢູ່ ສປປ ລາວ 28 ແຫ່ງ, ສະຖານກົງສຸນໃຫຍ່ 6 ແຫ່ງ, ອົງການ ຈັດຕັ້ງສາກົນທີ່ຂຶ້ນກັບລັດຖະບານ 18 ອົງການ ແລະ ມີກົງສຸນກິດຕິມະສັກ 18 ປະເທດ ປະຈໍາຢູ່ ສປປ ລາວ.
ອົງຄະນະພັກກະຊວງການຕ່າງປະເທດ ປະກອບດ້ວຍ 1 ຄະນະພັກຮາກຖານ ແລະ ມີ 57 ໜ່ວຍພັກເອ ກະລາດຂຶ້ນກັບ ທັງຢູ່ພາຍໃນ ແລະ ຕ່າງປະເທດ, ມີສະມາຊິກພັກພະນັກງານກະຊວງການຕ່າງປະເທດທັງໝົດ 785 ສະຫາຍ (ຍິງ 208 ສະຫາຍ) ກວມເອົາ 79% ຂອງຈໍານວນລັດຖະກອນຂອງກະຊວງທັງໝົດ. ນອກນີ້, ອົງຄະນະພັກກະຊວງການຕ່າງປະເທດ ຍັງໄດ້ຮັບຜິດຊອບຄຸ້ມຄອງສະມາຊິກພັກຈາກຂະແໜງການອື່ນທີ່ປະຕິບັດ ໜ້າທີ່ ຢູ່ສໍານັກງານຜູ້ຕາງໜ້າ ແຫ່ງ ສປປ ລາວ ປະຈໍາຢູ່ ຕ່າງປະເທດ ຈໍານວນ 109 ສະຫາຍ, ຍິງ 11 ສະຫາຍ ແລະ ຄຸ້ມຄອງສະມາຊິກພັກ-ນັກສຶກສາລາວ ຢູ່ຕ່າງປະເທດ ທັງໝົດ 1.685 ສະຫາຍ, ຍິງ 314 ສະຫາຍ.
ຕະຫຼອດໄລຍະ 5 ປີຜ່ານມາ ຖັນແຖວພະນັກງານ-ລັດຖະກອນກະຊວງການຕ່າງປະເທດ ໄດ້ເຕີບໃຫຍ່ ຂະຫຍາຍຕົວທັງທາງດ້ານປະລິມານ ແລະ ຄຸນນະພາບ, ຊຶ່ງປະຈຸບັນມີພະນັກງານ-ລັດຖະກອນທັງໝົດ 933 ສະຫາຍ (ຍິງ 340 ສະຫາຍ) ໃນນັ້ນ ປະຈໍາການຢູ່ຕ່າງປະເທດ 269 ສະຫາຍ, ຍິງ 65 ສະຫາຍ.
ນອກນັ້ນ, ກອງປະຊຸມໃຫຍ່ຄັ້ງນີ້ ຍັງໄດ້ຮັບຮອງເອົາແຜນການເຄື່ອນໄຫວຊີ້ນຳໆພາໃນໄລຍະ 5 ປີ ຕໍ່ໜ້າ. ພ້ອມດຽວກັນນັ້ນ, ກອງປະຊຸມຍັງຈະໄດ້ປ່ອນບັດຄັດເລືອກເອົາ ຄະນະບໍລິຫານພັກກະຊວງການຕ່າງປະເທດຊຸດໃໝ່. ຫຼັງຈາກນັ້ນ, ກອງປະຊຸມຍັງຈະໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາຈາກ ສະຫາຍ ທອງລຸນ ສີສຸລິດ, ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປລາວ ຕື່ມອີກ.