ໃນຕອນເຊົ້າຂອງວັນທີ 03 ພະຈິກ 2020 ທີ່ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອໍາລາຂອງ ທ່ານ ຊິນ ຊອງ ຊຸນ, ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສ.ເກົາຫລີ ປະຈໍາ ສປປ ລາວ, ໃນໂອກາດສໍາເລັດການປະຕິບັດໜ້າທີ່ການທູດຢູ່ ສປປ ລາວ ແລະ ຈະເດີນທາງກັບຄືນປະເທດຢ່າງຖາວອນໃນເດືອນພະຈິກ 2020 ນີ້.
ໃນໂອກາດນີ້, ທ່ານ ສະເຫຼີມ ໄຊກົມມະສິດ ໄດ້ສະແດງຄວາມຍິນດີ ແລະ ຊົມເຊີຍທ່ານຊິນຊອງຊຸນຕໍ່ຜົນສໍາເລັດທີ່ຍາດມາໄດ້ໃນການປະຕິບັດໜ້າທີ່ການທູດ ຢູ່ ສປປ ລາວ ຕະຫຼອດໄລຍະເວລາ 2 ປີ 8 ເດືອນ ໂດຍສະເພາະ ແມ່ນການປະກອບສ່ວນຢ່າງຫ້າວຫັນເຂົ້າໃນການສົ່ງເສີມ, ຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ສ.ເກົາຫລີ ໃນໄລຍະຜ່ານມາ. ພິເສດແມ່ນ ການສົ່ງເສີມການຮ່ວມມືທາງດ້ານການເມືອງ, ເສດຖະກິດ, ການພັດທະນາຊັບພະຍາກອນມະນຸດ, ສາທາລະນະສຸກ, ການທ່ອງທ່ຽວ ແລະ ດ້ານຕ່າງໆໃຫ້ນັບມື້ນັບຂະຫຍາຍຕົວ ແລະ ເຂົ້າສູ່ລວງເລິກ.
ນອກຈາກນັ້ນ, ທ່ານຊິນຊອງຊຸນຍັງມີຜົນງານທີ່ພົ້ນເດັ່ນໃນການຂົນຂວາຍການຊ່ວຍເຫຼືອຈາກລັດຖະ ບານ ສ.ເກົາຫລີ ແກ່ ສປປ ລາວ ໃນດ້ານການເກັບກູ້ລະເບີດບໍ່ທັນແຕກ, ການສຶກສາ ແລະ ການຊ່ວຍເຫຼືອທຶນຮອນ ພ້ອມດ້ວຍອຸປະກອນການແພດແກ່ ສປປ ລາວ ເພື່ອຮັບມືກັບການແຜ່ລະບາດຂອງເຊື້ອພະຍາດໂຄວິດ-19 ຢູ່ ສປປ ລາວ ລວມທັງການຊ່ວຍເຫຼືອ ສປປ ລາວ ເພື່ອຮັບມືກັບໄພພິບັດທໍາມະຊາດ ເປັນຕົ້ນແມ່ນໄພພິບັດນໍ້າຖ້ວມຢູ່ແຂວງອັດຕະປືໃນປີ 2018 ແລະ ຢູ່ບັນດາແຂວງພາກກາງ ແລະ ພາກໃຕ້ຂອງສປປລາວ ໃນປີ 2019 ຜ່ານມາ. ພິເສດ,ໃນໂອກາດສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ.ເກົາຫລີ ຄົບຮອບ 25 ປີ ໃນປີ 2020 ນີ້, ທ່ານທູດ ໄດ້ຫ້າວຫັນໃນການຮ່ວມມືກັບຝ່າຍລາວ ຈັດກິດຈະກໍາຕ່າງໆ ລວມທັງ ການປາຖະກະຖາ ກ່ຽວກັບ ສາຍພົວພັນການທູດ ສປປ ລາວ ແລະ ສ.ເກົາຫລີ ແນ່ໃສ່ເພື່ອລະລຶກເຖິງວັນສໍາຄັນດັ່ງກ່າວ ແລະ ເປັນການເຜີຍແຜ່ສາຍພົວພັນອັນດີ ແລະ ການຮ່ວມມືທີ່ມີຜົນສໍາເລັດສູງລະຫວ່າງ ສອງປະເທດ ຕະຫຼອດ 25 ປີ ຜ່ານມາ ໃຫ້ແກ່ ພະນັກງານ, ນັກຮຽນຮູ້, ປັນຍາຊົນ ແລະ ປະຊາຊົນທັງສອງປະເທດໃຫ້ຮັບຮູ້ ແລະ ເຂົ້າໃຈ.
ໃນໂອກາດດຽວກັນນີ້, ທ່ານ ສະເຫຼີມໄຊ ກົມມະສິດ ໄດ້ຕາງໜ້າລັດຖະບານ ສປປ ລາວ ມອບຫຼຽນກາມິດຕະພາບໃຫ້ແກ່ ທ່ານ ຊິນ ຊອງ ຊຸນ ເພື່ອເປັນການສັນລະເສີນ ແລະ ຈາລຶກຄຸນງາມຄວາມດີທີ່ທ່ານໄດ້ອຸທິດເຫື່ອແຮງ ແລະ ສະຕິປັນຍາເຂົ້າໃນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດໃຫ້ມີບາດກ້າວຂະຫຍາຍຕົວ ແລະ ແໜ້ນແຟ້ນຄືດັ່ງທີ່ກ່າວມາຂ້າງເທິງຕະຫຼອດໄລຍະການປະຕິບັດໜ້າທີ່ການທູດຢູ່ ສປປ ລາວ.
ພ້ອມດຽວກັນນີ້, ທ່ານ ຊິນ ຊອງ ຊຸນ ກໍ່ໄດ້ສະແດງຄວາມຂອບໃຈລັດຖະບານ ແລະ ປະຊາຊົນລາວ ໂດຍສະເພາະກະຊວງການຕ່າງປະເທດ ທີ່ໄດ້ອໍານວຍຄວາມສະດວກໃຫ້ແກ່ການເຄື່ອນໄຫວຂອງຕົນ ຢ່າງມີຜົນສໍາເລັດຢ່າງຈົບງາມ ແລະ ສະແດງຄວາມຮູ້ບຸນຄຸນຢ່າງສູງ ມາຍັງລັດຖະບານ ແລະ ປະຊາຊົນລາວທີ່ໄດ້ມອບຫຼຽນກາມິດຕະພາບອັນມີກຽດ ໃຫ້ແກ່ທ່ານ ແລະ ຢືນຢັນຈະສືບຕໍ່ໃນການເປັນຂົວຕໍ່ເພື່ອປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດ ສປປ ລາວ ແລະ ສ.ເກົາຫລີ ໃຫ້ສືບຕໍ່ມີບາດກ້າວຂະຫຍາຍຕົວ ແລະ ແໜ້ນແຟ້ນຍິ່ງໆຂຶ້ນໃນອະນາຄົດ.