ໃນ​ວັນ​ທີ 3 ຕຸ​ລາ 2020 ທີ່ກະ​ຊວງ​ການ​ຕ່າງ​ປະ​ເທດ, ທ່ານສະ​ເຫຼີມ​ໄຊ ກົມ​ມະ​ສິດ, ​ລັດ​ຖະ​ມົນຕີ​ກະ​ຊວງ​ການ​ຕ່າງ​ປະ​ເທດໄດ້​ໃຫ້​ກຽດ​ຕ້ອນ​ຮັບ​ການ​ເຂົ້າ​ຢ້ຽມຂ່ຳ​ນັບຂອງທ່ານ​ອໍ​ຣ​ຮັນ ອື​ຊຶກ (Mr. Orhan Isik), ເອກ​ອັກ​ຄະ​ລັດ​ຖະ​ທູດ​ວິ​ສາ​ມັນຜູ້​ມີ​ອຳ​ນາດ​ເຕັມແຫ່ງສາ​ທາ​ລະ​ນະ​ລັດຕວັກ​ກີ ຄົນ​ໃໝ່ປະ​ຈຳສປປລາວ.

          ໃນ​ໂອ​ກາດ​ດັ່ງ​ກ່າວ, ທ່ານ​ລັດ​ຖະ​ມົນ​ຕີໄດ້​ສະ​ແດງ​ຄວາມ​ຍິນ​ດີ​ຕ້ອນ​ຮັບ ແລະຊົມ​ເຊີຍທ່ານ​ອໍ​ຣ​ຮັນ ອື​ຊຶກ ທີ່​ຖືກ​ແຕ່ງ​ຕັ້ງ​ໃຫ້​ມາ​ດຳ​ລົງຕຳ​ແໜ່ງ​ເປັນເອກ​ອັກ​ຄະ​ລັດ​ຖະ​ທູດວິ​ສາ​ມັນຜູ້​ມີ​ອຳ​ນາດ​ເຕັມແຫ່ງສາ​ທາ​ລະ​ນະ​ລັດຕວັກ​ກີ ​ ປະ​ຈຳສ​ປ​ປລາວ, ພ້ອມ​ທັງຕີ​ລາ​ຄາ​ສູງຕໍ່ການ​ພົວ​ພັນ​ຮ່ວມ​ມື​ສອງ​ຝ່າຍລະ​ຫວ່າງສ​ປ​ປລາວແລະສ. ຕວັກ​ກີໃນ​ໄລ​ຍະ​​ຜ່ານ​ມາ ເຖິງ ປະ​ຈຸ​ບັນ. ພ້ອມ​ກັນ​ນັ້ນ, ​​ສະ​ເໜີ​ໃຫ້​ທ່ານ​ທູດ ສືບ​ຕໍ່ປະ​ກອບ​ສ່ວນຊຸກ​ຍູ້​ການພົວ​ພັນ​ຮ່ວມ​ມື​ສອງ​ຝ່າຍ ລາວ-ຕວັກ​ກີ ໃຫ້ຂະ​ຫຍາຍ​ຕົວ​ ແລະ ແໜ້ນ​ແຟ້ນ​ຍິ່ງໆ​ຂຶ້ນ ໃນ​ຕໍ່​ໜ້າ ໂດຍ​ສະ​ເພາະ​ການ​​ຮ່ວມ​ມື​ທາງ​ດ້ານການຄ້າ, ການລົງ​ທຶນ ແລະ ການ​ທ່ອງ​ທ່ຽວ, ຊຶ່ງ​ເປັນ​ທ່າ​ແຮງ​ສຳ​ຄັນຕໍ່ການ​ພັດ​ທະ​ນາ​ເສດ​ຖະ​ກິດ-ສັງ​ຄ​ົມ​ ຂອງ​ທັງ​ສອງ​ປະເທດ ເນື່ອງ​ຈາກ​ ສ​ປ​ປ ລາວ ແລະ ສ. ຕວັກ​ກີ ມີ​ທ່າ​ແຮງຫຼາຍ​ດ້ານ, ທັງ​ເປັນ​ປະ​ເທດ​ຂົວ​ຕໍ່​ເຊື່ອມ​ໂຍງ​ກັບ​ບັນ​ດາ​ປະ​ເທດ​ຕ່າງໆ​ໃນ​ພາກ​ພື້ນ​. ນອກ​ຈາກ​ນັ້ນ, ທ່ານ​ລັດ​ຖະ​ມົນ​ຕີ ​ໄດ້ອວຍ​ພອນ​ໃຫ້ ທ່ານທູດ​ອໍ​ຣ​ຮັນ ອື​ຊຶກ ​ມີ​ພະ​ລາ​ນາ​ໄມ​ສົມບູນ, ມີຄວາມຜາ​ສຸກ ແລະ ປະ​ສົບ​ຜົນ​ສຳ​ເລັດໃນ​ການ​ປະ​ຕິ​ບັດ​ໜ້າ​ທີ່​ການ​ທູດອັນສູງ​ສົ່ງ​ຂອງ​ທ່ານຢູ່ສ​ປ​ປລາວ.

          ໃນ​ໂອ​ກາດ​ດຽວ​ກັນ​ນີ້, ທ່ານທູດ​ອໍ​ຣ​ຮັນອື​ຊຶກກໍໄດ້​ສະ​ແດງ​ຄວາມ​ຂອບ​ໃຈ​ຕໍ່ທ່ານ​ລັດ​ຖະ​ມົນ​ຕີທີ່​ໄດ້​​ໃຫ້ກຽດຕ້ອນ​ຮັບ​ທ່ານ​ທູດຢ່າ​ງ​ອົບ​ອຸ່ນໃນ​ຄັ້ງ​ນີ້ ແລະ ທັງໃຫ້​ຄຳ​ໝັ້ນ​ສັນ​ຍາ​ວ່າຈະພະ​ຍາຍາມ​ຢ່າງສຸດ​ຄວາມ​ສາ​ມາດເພື່ອຊຸກ​ຍູ້​ການພົວ​ພັນ​ຮ່ວມ​ມື​ສອງ​ຝ່າຍລາວ-ຕວັກ​ກີໃຫ້ສືບ​ຕໍ່​ໄດ້​ຂະ​ຫຍາຍ​ຕົວ​ຍິ່ງ​ໆຂຶ້ນໃນ​ຕໍ່​ໜ້າ.