ໃນຕອນເຊົ້າ ຂອງວັນທີ 29 ຕຸລາ 2020 ທີ່ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອໍາລາ ຂອງ ທ່ານ ຊ໋ອງ ເບີນາດ ຄາຣາສໂກ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ອົດສະຕຣາລີ ປະຈໍາ ສປປ ລາວ ໃນໂອກາດທີ່ສໍາເລັດການປະຕິບັດໜ້າທີ່ການທູດ ຢູ່ ສປປ ລາວ.

ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີ ແລະ ຊົມເຊີຍທ່ານ ທ່ານ ຊ໋ອງ ເບີນາດ ຄາຣາສໂກ ຕໍ່ຜົນສໍາເລັດໃນການປະຕິບັດໜ້າທີ່ການທູດ ຢູ່ ສປປ ລາວ ຕະຫຼອດໄລຍະ 3 ປີ ຜ່ານມາ, ເຊິ່ງໄດ້ປະກອບ ສ່ວນອັນສໍາຄັນເຂົ້າໃນການຊຸກຍູ້ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ອົດສະຕຣາລີ ກໍຄື​ການພັດທະນາ​ເສດຖະກິດ​-ສັງຄົມ ຂອງ ສປປ ລາວ ໃຫ້ຂະຫຍາຍຕົວຍິ່ງໆຂຶ້ນ. ໃນນັ້ນ, ຜົນງານອັນພົ້ນເດັ່ນ ແມ່ນການປະກອບສ່ວນຊຸກຍູ້ການຊ່ວຍເຫຼືອທາງ​ການເພື່ອ​ການ​ພັດທະນາ (ຫຼື ODA) ຂອງອົດສະຕຣາລີ ແກ່ ສປປ ລາວ ສະເລ່ຍ 40-50 ລ້ານໂດລາອົດສະຕຣາລີ ໃນແຕ່ລະປີ, ລວມທັງການ​ຊ່ວຍ​ເຫຼືອ ແກ່ ສປປ ລາວ ໃນເຫດການຕ່າງໆ ເຊັ່ນ: ເຫດການໄພພິບັດນໍ້າຖ້ວມຢູ່ບັນດາແຂວງອັດຕະປື ໃນປີ 2018; ​ເຫດການ​ໄພ​ນໍ້າ​ຖ້ວມ​ແຂວງ​ພາກ​ກາງ ​ແລະ ພາກ​ໃຕ້ ​ໃນ​ປີ 2019 ​ແລະ ພິ​ເສດ​ແມ່ນການຊ່ວຍເຫຼືອລັດຖະບານ​ລາວ ​ໃນ​ການປ້ອງ​ກັນ, ຄວບ​ຄຸມ ​ແລະ ​ແກ້​ໄຂ​ການລະບາດ​ຂອງ​ພະຍາດ​ອັກ​ເສບ​ປອດ ຈາກ​ເຊື້ອ​ຈຸລະ​ໂລກສາຍ​ພັນ​ໃໝ່ ຫຼື ໂຄວິດ-19 ໃນມູນຄ່າ 4,8 ລ້ານໂດລາອົດສະຕຣາລີ ລວມທັງການປະກອບສ່ວນ ຊຸກຍູ້ ແລະ ອໍານວຍຄວາມສະດວກໃນການແລກປ່ຽນການຢ້ຽມຢາມ ຂອງການນໍາຂັ້ນສູງຂອງສອງປະເທດ.

ໃນໂອກາດດຽວກັນນີ້, ທ່ານ ສະເຫຼີມໄຊ ກົມມະສິດ ໄດ້ຕາງໜ້າລັດຖະບານ ແລະ ປະຊາຊົນລາວ ປະດັບຫຼຽນກາມິດຕະພາບ ໃຫ້ແກ່ ທ່ານ ຊ໋ອງ ເບີນາດ ຄາຣາສໂກ ເພື່ອສະແດງຄວາມຍ້ອງຍໍຊົມເຊີຍ ແລະ ຈາລຶກຜົນງານຄວາມດີ ທີ່ທ່ານໄດ້ອຸທິດເຫື່ອແຮງ ແລະ ສະຕິປັນຍາ ເຂົ້າໃນການເສີມຂະຫຍາຍສາຍພົວພັັນມິດຕະພາບ ແລະ ການຮ່ວມມືອັນດີງາມ ລະຫວ່າງສອງປະເທດ ລາວ ແລະ ອົດສະຕຣາລີ ໃຫ້ແໜ້ນແຟ້ນຍິ່ງໆຂຶ້ນ ຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປ ລາວ.

ໃນໂອກາດນີ້, ທ່ານ ຊ໋ອງ ເບີນາດ ຄາຣາສໂກ ກໍ່ໄດ້ສະແດງຄວາມຂອບໃຈຢ່າງຈິງໃຈ ຕໍ່ລັດຖະບານ ແລະ ປະຊາຊົນລາວ, ໂດຍສະເພາະກະຊວງການຕ່າງປະເທດລາວ ທີ່ໄດ້ອໍານວຍຄວາມສະດວກ ໃຫ້ແກ່ການເຄື່ອນໄຫວປະຕິບັດວຽກງານການທູດ ຂອງຕົນ ຢູ່ ສປປ ລາວ ​ໃຫ້ມີປະສິດທິຜົນ​ເປັນ​ຢ່າງ​ດີ.​ ທ່ານ ​ຍັງ​ໄດ້​ສະ​ແດງ​ຄວາມຮູ້ສຶກ​​ເປັນກຽດ​​ຢ່າງ​ສູງ ທີ່ ລັດຖະບານ ແລະ ປະຊາຊົນລາວ ມອບຫຼຽນກາມິດຕະພາບອັນ​ຊົງ​ກຽດ​ໃຫ້​ແກ່ຕົນ ແລະ ຢືນຢັນຈະສືບຕໍ່ປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ຂອງສອງປະເທດ ອົດສະຕຣາລີ-ລາວ ໃຫ້ນັບມື້ນັບຈະເລີນງອກງາມຍິ່ງໆຂຶ້ນ ໃນອະນາຄົດ.