ໃນຕອນເຊົ້າຂອງວັນທີ 29 ຕຸລາ 2020, ທີ່ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ Ina MARCIULIONYTE, ເອກອັກຄະລັດຖະທູດ​ສະຫະພາບເອີຣົບ (ອີຢູ) ຄົນໃໝ່ ປະຈຳ ສປປ ລາວ.

ໃນໂອກາດດ່ັງກ່າວ, ທ່ານລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ທ່ານທູດທີ່ໄດ້ຖືກແຕ່ງຕັ້ງມາດຳລົງຕໍາແໜ່ງເປັນເອກອັກຄະລັດຖະ​ທູດສະຫະພາບເອີຣົບ ປະຈຳ ສປປ ລາວ, ພ້ອມທັງໄດ້ຕີລາຄາສູງຕໍ່ສາຍພົວພັນ​ມິດ​ຕະ​ພາບ ແລະ ການ​ຮ່ວມ​ມື​ທີ່​ດີ ລະ​ຫວ່າງ ສປປ ລາວ ແລະ ອີຢູ    ນັບ​ແຕ່​ສອງຝ່າຍໄດ້​ສ້າງ​ຕັ້ງ​ສາຍ​ພົວ​ພັນ​ການ​ທູດ​ນຳ​ກັນມາ ຕັ້ງແຕ່ວັນທີ 21.11.1975, ຊຶ່ງປີນີ້ກໍ່ວຽນຈົບຄົບຮອບ 45 ປີພໍດີ. ພ້ອມກັນນັ້ນ,​ ທ່ານ ລັດຖະມົນຕີກະຊວງການຕ່າງປະເທດ ກໍ່ໄດ້ທົບທວນຄືນ ແລະ ຕີລາຄາສູງຕໍ່ການ​ຊ່ວຍ​ເຫຼືອ​ຂອງ​ ອີຢູ ແກ່ ສ​ປ​ປ ລາວ ທີ່ສຸມ​ໃສ່​ຂະ​ແໜງ​​ບຸລິ​ມະ​ສິດຂອງແຜນພັດທະນາເສດຖະກິດ-ສັງຄົມແຫ່ງຊາດ ໃນໄລຍະຜ່ານມາຮອດປັດຈຸບັນ ​ເປັນຕົ້ນແມ່ນການຊ່ວຍເຫຼືອໃນແຜນງານ Joint Programing ຂອງ ອີຢູ ແລະ ບັນດາປະເທດສະມາຊິກ, ຊຶ່ງມີມູນຄ່າທັງໝົດ 500 ລ້ານເອີໂຣ ເພື່ອຊ່ວຍພັດທະນາໃນວຽກງານການສຶກສາຂັ້ນພື້ນຖານ, ໂພຊະນາການ, ການຄໍ້າປະກັນດ້ານສະບຽງ ອາຫານ, ການປົກຄອງທີ່ດີ, ສິດທິມະນຸດ ແລະ ສ້າງລັດທີ່​ປົກ​ຄອງ​ດ້ວຍກົດໝາຍ, ​ວຽກການເກັບກູ້ລະເບີດບໍ່ທັນແຕກ (​UXO), ການພັດທະນາຂອງພາກເອກະຊົນ ແລະ ວຽກຂອງ​ອົງ​ການ CSO,ຊຶ່ງໄດ້ປະກອບສວ່ນຢ່າງສຳຄັນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມການພັດທະນາແຫ່ງຊາດ ຊຶ່ງອີງໃສ່ເປົ້າໝາຍການພັດທະນາແບບຍືນຍົງຂອງອົງການສະຫະປະຊາຊາດຂອງລັດຖະບານ ສປປ ລາວ ແນໃສ່ນໍາເອົາປະເທດອອກຈາກກຸ່ມປະເທດດ້ອຍພັດທະນາ ກ້າວສູ່ການພັດທະນາແບບຍືນຍົງເທື່ອລະກ້າວ. ​

ພ້ອມດຽວກັນນີ້, ທ່ານ​ລັດ​ຖະ​ມົນ​ຕີ​ ຍັງໄດ້​ຕາງໜ້າໃຫ້ລັດຖະບານ ແຫ່ງ ປປ ລາວ ສະ​ແດງ​ຄວາມ​ຮູ້​ບຸນ​ຄຸນຢ່າງສູງ​ຕໍ່​ການ​ຊ່ວຍ​ເຫຼືອ​ອັນ​ລ້ຳ​ຄ່າຂອງ​ ອີຢູ ທີ່ໄດ້ປະກອບສ່ວນໃນການຈັດຕັ້ງປະຕິບັດ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມຂອງ ສປປ ລາວ ໄດ້ຮັບການພັດທະນາ ແລະ ປະສົບຜົນສຳເລັດເປັນຢ່າງດີ, ເຮັດໃຫ້ລະດັບຊີວິດການເປັນຢູ່ຂອງປະຊາຊົນລາວບັນດາເຜົ່າໄດ້ຮັບການປັບປຸງໃຫ້ດີຂຶ້ນຢ່າງບໍ່ຢຸດຢັ້ງ. ຄຽງຄູ່ກັນນັ້ນ, ສອງ​ຝ່າຍ ​ຍັງໄດ້​ປຶກ​ສາ​ຫາ​ລື​ທິດ​ທາງ​ແຜນ​ການ​ຮ່ວມ​ມື​ ລາວ-ອີຢູ ໃນ​ຕໍ່​ໜ້າ,​ ໂດຍເລັ່ງໃສ່ບໍ່ພຽງແຕ່ດ້ານການສຶກສາ ແລະ ສາທາລະນະສຸກ,    ຫາກຍັງມີດ້ານການ​ລົງ​ທຶນ ແລະ ​ດ້ານ​ການ​ຄ້າຢູ່ ສ​ປ​ປ ລາວ ​ໃຫ້​ຫຼາຍ​ຂຶ້ນ ໃນ​ອະ​ນາ​ຄົດ ໂດຍສະເພາະແມ່ນການສົ່ງອອກກາເຟຂອງລາວ ແລະ ​ອາ​ຫານ​ແປ​ຮູບ ໄປ​ຍັງ​ຕະ​ຫຼາດ​ເອີ​ຣົ​ບ ກໍ່ຄືການຮ່ວມມື​​ດ້ານການຄ້າທາງອີເລັກໂທຣນິກ          (E-commerce)ກັບ ສປປ ລາວ.​ໃນຕອນທ້າຍຂອງການພົບປະ, ທ່ານລັດຖະມົນຕີກະຊວງການຕ່າງປະເທດ      ໄດ້ອວຍພອນໃຫ້ທ່ານທູດມີສຸຂະພາບເຂັ້ມແຂງ, ປະສົບຜົນສຳເລັດອັນຈົບງານໃນການປະຕິບັດໜພາລະກິດອັນສູງສົ່ງຂອງຕົນໃນໄລຍະດຳລົງຕໍາແໜ່ງເປັນເອກອັກຄະລັດຖະທູດສະຫະພາບເອີຣົບປະຈຳສປປລາວ.