ໃນວັນທີ 28 ກັນຍາ 2018, ທີ່ສຳນັກງານໃຫຍ່ຂອງອົງການສະຫະປະຊາຊາດ (ສປຊ) ທີ່ ນິວຢອກ, ສະຫະລັດອາເມລິກາ, ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ທ່ານ ນິໂກລາ ເຣັນຊີ, ລັດຖະມົນຕີກະຊວງການຕ່າງປະເທດ ແລະ ການເມືອງ ແຫ່ງ ສາທາລະນະລັດ ຊັງມາຣິໂນ ໄດ້ຮ່ວມກັນລົງນາມສັນຍາວ່າດ້ວຍ ການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ຊັງມາຣິໂນ ໂດຍມີນັກການທູດ ຂອງທັງສອງຝ່າຍ ເຂົ້າຮ່ວມເປັນສັກຄີພິຍານ. ຈຸດປະສົງຂອງການສ້າງຕັ້ງສາຍພົວພັນການທູດດັ່ງກ່າວແມ່ນເພື່ອພັດທະນາ ແລະ ເພີ້ມທະວີມິດຕະພາບ ແລະ ການຮ່ວມມືດ້ານການເມືອງ, ເສດຖະກິດ-ສັງຄົມ ແລະ ວັດທະນາທຳ ລະຫວ່າງສອງປະເທດ ແລະ ປະຊາຊົນສອງຊາດ. ສັນຍາດັ່ງກ່າວ ຈະມີຜົນບັງຄັບໃຊ້ນັບແຕ່ວັນທີທີ່ໄດ້ຮັບແຈ້ງເປັນລາຍລັກອັກສອນສະບັບສຸດທ້າຍຂອງຄູ່ສັນຍາ ກ່ຽວກັບການສຳເລັດຂັ້ນຕອນພາຍໃນຂອງຕົນທີ່ຈຳເປັນໃນການມີຜົນບັງຄັບໃຊ້, ເຊິ່ງຈະເຮັດໃຫ້ສປປລາວມີສາຍພົວພັນການທູດກັບ141 ປະເທດ ຈາກຈຳນວນປະເທດສະມາຊິກອົງການສະຫະປະຊາຊາດທັງຫມົດ 193 ປະເທດໃນທົ່ວໂລກ.
ປະເທດຊັງມາຣິໂນ ເຂົ້າເປັນສະມາຊິກ ຂອງອົງການ ສປຊ ໃນວັນທີ 02 ມີນາ 1992 ແລະ ເປັນປະເທດນ້ອຍອັນດັບທີສາມ ໃນທະວີບເອີຣົບ, ບໍ່ມີຊາຍແດນຕິດກັບທະເລ ໂດຍອ້ອມຮອບດ້ວຍປະເທດອິຕາລີ, ມີເນື້ອທີ່ ທັງຫມົດ 61,2 ກີໂລຕາແມັດ ມີປະຊາກອນ 33,562 ຄົນ, ໃນນັ້ນ 97 ເປີເຊັນ ນັບຖືສາສະໜາ ກາໂຕລິກ, ພາສາທາງການແມ່ນພາສາອິຕາລີ, ນະຄອນຫລວງແມ່ນ ຊັງມາຣິໂນ, ໄດ້ຮັບເອກະລາດຈາກຈັກກະພັດໂຣມັນ ໃນວັນທີ 03 ກັນຍາ ປີ ຄສ (AD) 301, ບໍ່ໄດ້ເປັນສະມາຊິກສະຫະພາບເອີຣົບ ແຕ່ໃຊ້ເງິນສະກຸນເອີໂຣ. ອົງການຫລັກຂອງປະເທດ ປະກອບດ້ວຍ: ອົງການນິຕິບັນຍັດ, ອົງການບໍລິຫານ ແລະ ອົງການຕຸລາການ. ລະບອບການເມືອງ ປະກອບດ້ວຍ 02 ພັກໃຫຍ່ ຄື: ພັກສັງມາຕິນີ ກຣິດຕະຈັກ ປະຊາທິປະໄຕ (San Matinees Christian Democratic Party) ແລະ ພັກປະຊາທິປະໄຕສັງຄົມນິຍົມ(Party of Socialist Democratic). ຊັງມາຣິໂນເປັນປະເທດທີ່ມີເສດຖະກິດໃນລະດັບທີ່ໜັ້ນທ່ຽງສູງ, ລາຍໄດ້ສະເລ່ຍ 55,449 ໂດລາ/ຄົນ, ມີອັດຕາການຫວ່າງງານຕໍ່າທີ່ສຸດໃນເອີຣົບ, ບໍ່ມີໜີ້ສິນແລະຂະແໜງເສດຖະກິດທີ່ສຳຄັນແມ່ນການບໍລິການດ້ານການເງິນແລະທະນາຄານ, ອຸດສາຫະກຳແລະທ່ອງທ່ຽວ, ມີສາຍພົວພັນການທູດກັບ 95 ປະເທດ.