ໂດຍຕອບສະໜອງຕາມຄໍາເຊີນຂອງ ພະນະທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແຫ່ງ ສປປ ລາວ, ພະນະທ່ານ ສົມຄິດ ຈາຕຸສີພິທັກ, ຮອງນາຍົກລັດຖະມົນຕີ ແຫ່ງ ຣາຊະອານາຈັກໄທ ແລະ ຄະນະ, ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ,ໃນລະຫວ່າງວັນທີ 23-25 ພຶດສະພາ 2017.
ໃນຕອນເຊົ້າຂອງວັນທີ24 ພຶດສະພາ 2017, ກອງປະຊຸມພົບປະສອງຝ່າຍທາງການ ທີ່ນໍາພາໂດຍ ພະນະທ່ານຮອງນາຍົກ ສົມດີ ດວງດີ ແລະ ພະນະທ່ານ ສົມຄິດ ຈາຕຸສີພິທັກ ໄດ້ຈັດຂື້ນ ທີ່ ໂຮງແຮມແລນມາກ ແມ່ຂອງ ຣີເວີຊາຍ, ໂດຍສອງຝ່າຍ ໄດ້ແລກປ່ຽນຄໍາຄິດຄໍາເຫັນ ແລະ ປຶກສາຫາລື ກ່ຽວກັບ ການສົ່ງເສີມການເປັນຄູ່ຮ່ວມມື ເພື່ອການພັດທະນາແບບຍືນຍົງ (Partnership for Sustainable Development), ການສົ່ງເສີມການເຊື່ອມໂຍງ, ການຄ້າ-ການລົງທຶນ, ແລະ ການທ່ອງທ່ຽວ. ໃນນີ້, ສອງຝ່າຍ ໄດ້ເຫັນດີຈະຂະຫຍາຍການຮ່ວມມືດ້ານເສດຖະກິດ ລະຫວ່າງສອງປະເທດ ເພື່ອຄວາມຈະເລີນເຕີບໂຕແບບຍືນຍົງຂອງ ລາວ-ໄທ ແລະ ພາກພື້ນລຸ່ມແມ່ນໍ້າຂອງ ໃນຖານະເປັນຄູ່ຮ່ວມມືເພື່ອການພັດທະນາແບບຍືນຍົງ ລາວ-ໄທ, ໂດຍຝ່າຍໄທ ພ້ອມຈະສະໜັບສະໜູນນະໂຍບາຍພັດທະນາເສດຖະກິດ-ສັງຄົມ ຂອງ ສປປ ລາວ ເພື່ອນໍາພາປະເທດຊາດໃຫ້ລຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2020; ຈະຮ່ວມກັນດໍາເນີນໂຄງການເພື່ອການພັດທະນາດ້ານຊັບພະຍາກອນມະນຸດ, ກະສິກໍາ, ການທ່ອງທ່ຽວ, ການສຶກສາ ແລະ ສາທາລະນະສຸກ ຕາມແຜນການຮ່ວມມືວິຊາການ ລາວ-ໄທ; ຈະຮ່ວມກັນສ້າງແຜນແມ່ບົດການເຊື່ອມໂຍງ ລະຫວ່າງສອງປະເທດ ແລະ ລະຫວ່າງອະນຸພາກພື້ນລຸ່ມແມ່ນໍ້າຂອງ ເພື່ອເຊື່ອມໂຍງພຶ້ນຖານໂຄງລ່າງຄົມມະນາຄົມ-ຂົນສົ່ງ ທັງຖະໜົນຫົນທາງ, ຂົວ, ລົດໄຟ, ທ່າເຮືອ ແລະ ການອໍານວຍຄວາມສະດວກໃຫ້ແກ່ການຂົນສົ່ງຂ້າມຊາຍແດນ ເພື່ອສົ່ງເສີມການຄ້າ ແລະ ການລົງທຶນຕາມເຂດຊາຍແດນ ແລະ ການທ່ອງທ່ຽວສອງຝ່າຍ, ຊຶ່ງຈະກໍານົດເອົາຈຸດຜ່ານຊາຍແດນ ສະຫວັນນະເຂດ-ມຸກດາຫານ ເປັນເຂດແຈ້ງກວດສິນຄ້າຮ່ວມກັນ (Common control area) ເພື່ອໃຫ້ສາມາດຈັດຕັ້ງປະຕິບັດພາຍໃນປີ 2017 ນີ້; ເຫັນດີຈະເລັ່ງການສ້າງຂົວມິດຕະພາບ ລາວ-ໄທ ແຫ່ງທີ 5 ລະຫວ່າງ ແຂວງ ບໍລິຄໍາໄຊ ແລະ ຈັ່ງຫວັດ ບຶງການ; ແລະ ຈະສົ່ງເສີມການເຊື່ອມໂຍງພາກພື້ນລະຫວ່າງ ກໍາປູເຈຍ, ລາວ, ມຽນມາ, ຫວຽດນາມ ແລະ ໄທ (CLMVT), ແລະ ສະໜັບສະໜູນໃຫ້ມີການສ້າງແຜນຍຸດທະສາດການເຊື່ອມໂຍງຂົງເຂດດັ່ງກ່າວໃນດ້ານຕ່າງໆ ພາຍໃຕ້ຂອບການຮ່ວມມືຍຸດທະສາດການຮ່ວມມືເສດຖະກິດ ແມ່ນໍ້າອີຣະວະດີ-ແມ່ນໍ້າເຈົ້າພຣະຍາ-ແມ່ນໍ້າຂອງ ຫລື ACMECS.
ທາງດ້ານການຄ້າ ແລະ ການລົງທຶນ, ສອງຝ່າຍ ໄດ້ເຫັນດີຈະສົ່ງເສີມເພີ່ມປະລິມານການຄ້າສອງຝ່າຍໃຫ້ສູງກວ່າ 10 ຕື້ ໂດລາ ສະຫະລັດ ໃນປີ 2024 ໂດຍນໍາໃຊ້ຜົນປະໂຫຍດຈາກທຸກກົນໄກຂອງລັດ ແລະ ພາກເອກະຊົນ, ຊຶ່ງປະເທດໄທໄດ້ເປັນຄູ່ຮ່ວມມືການຄ້າສໍາຄັນຂອງ ສປປ ລາວ ມາຫລາຍກວ່າ 40 ປີ ແລະ ມູນຄ່າການຄ້າສອງຝ່າຍໃນແຕ່ລະໄລຍະ ມີທ່າອ່ຽງເພີ່ມຂື້ນຢ່າງຕໍ່ເນື່ອງ ຈາກ 2,2 ຕື້ ໂດລາ ສະຫະລັດ ໃນສົກປີ 2010-2011 ເພີ່ມເປັນ 5,8 ຕື້ ໂດລາ ສະຫະລັດ ໃນສົກປີ 2015-2016. ພ້ອມນັ້ນ, ສອງຝ່າຍ ກໍ່ເຫັນດີຈະສົ່ງເສີມການຮ່ວມມືດ້ານການສ້າງຕັ້ງກອງທຶນ ໃນການພັດທະນາພື້ນຖານໂຄງລ່າງ (Infrastructure Fund) ເພື່ອສົ່ງເສີມໂຄງການພັດທະນາພື້ນຖານໂຄງລ່າງ ຢູ່ ສປປ ລາວ ແລະ ສະໜັບສະໜູນນະໂຍບາຍການພັດທະນາພະລັງງານຂອງລາວ.
ໃນດ້ານການສົ່ງເສີມການໄປມາຫາສູ່ ລະຫວ່າງປະຊາຊົນສອງປະເທດ, ສອງຝ່າຍ ໄດ້ເຫັນດີຈະສ້າງແຜນແມ່ບົດດ້ານການທ່ອງທ່ຽວຂ້າມຊາຍແດນຮ່ວມກັນ ພາຍໃຕ້ຄວາມຄິດ ສອງປະເທດ ໜຶ່ງຈຸດໝາຍປາຍທາງ (Two Countries, One Destination), ໂດຍມອບໃຫ້ຂະແໜງການທ່ອງທ່ຽວຂອງສອງປະເທດ ນໍາໄປປຶກສາຫາລືລາຍລະອຽດໃນຂັ້ນຕໍ່ໄປ. ນອກຈາກນັ້ນ ກໍ່ໄດ້ປຶກສາຫາລືການຮ່ວມມືດ້ານພະລັງງານ ແລະ ຕະຫລາດຫລັກຊັບ.
ການພົບປະຫາລືຄັ້ງນີ້ ໄດ້ດໍາເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ ຄວາມເຂົ້າອົກເຂົ້າໃຈກັນ ແລະ ມີຜົນສໍາເລັດດ້ວຍຄວາມຈົບງາມ, ຊຶ່ງຈະເປັນການສືບຕໍ່ຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືທີ່ດີຖານບ້ານໃກ້ເຮືອນຄຽງ ລະຫວ່າງ ສປປ ລາວ ແລະ ຣາຊະອານາຈັກໄທ ໃຫ້ເຕີບໃຫຍ່ຂະຫຍາຍຕົວ ແລະ ເຂັ້ມແຂງຍິ່ງໆຂື້ນ, ອັນເປັນການປະກອບສ່ວນໃຫ້ແກ່ການຮ່ວມມືດ້ານການຄ້າ ແລະ ການລົງທຶນຂອງພາກເອກະຊົນສອງປະເທດ ລາວ-ໄທ, ໃຫ້ເພີ່ມຂື້ນທັງບໍລິມາດ ແລະ ປະສິດທິພາບ ເພື່ອຜົນປະໂຫຍດຂອງສອງປະເທດ ກໍ່ຄືພາກພື້ນ.