ໃນວັນທີ 24 ພຶດສະພາ 2017, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ Donica Pottie ໃນໂອກາດມາດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ການາດາ ປະຈຳ ສປປ ລາວ ຄົນໃຫມ່, ໂດຍມີສະຖານເອກອັກຄະລັດຖະທູດ ຕັ້ງຢູ່ ບາງກອກ, ປະເທດໄທ.

ໃນໂອກາດດັ່ງກ່າວ, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການມາດຳລົງຕຳແໜ່ງເປັນເອກອັກຄະລັດຖະທູດ ແຫ່ງ ການາດາ ປະຈຳລາວ ຄົນໃໝ່​ ແລະ ສະແດງຄວາມຫວັງວ່າ ການມາຮັບຕຳແໜ່ງໃໝ່ຂອງທ່ານ ໃນຄັ້ງນີ້ ຈະຊ່ວຍຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືສອງຝ່າຍ ລາວ-ການາດາ ທີ່ມີມາແຕ່ດົນນານນັ້ນ ໄດ້ຮັບການເສີມຂະຫຍາຍຍິ່ງໆຂຶ້ນ. ທ່ານລັດຖະມົນຕີ ຍັງໄດ້ສະແດງຄວາມຊົມເຊີຍຕໍ່ການເປີດຫ້ອງການຕາງໜ້າການທູດການາດາ ທີ່ ນະຄອນຫຼວງວຽງຈັນ ໃນປີ 2016 ຜ່ານມາ, ຊຶ່ງຖືເປັນບາດກ້າວສຳຄັນ ໃນການຊຸກຍູ້ ແລະ ເພີ່ມທະວີການພົວພັນຮ່ວມມືຂອງສອງປະເທດໃຫ້ຫຼາຍ ແລະ ສະດວກຂຶ້ນ. ພ້ອມກັນນັ້ນ, ທ່ານລັດຖະມົນຕີ ກໍໄດ້ແຈ້ງສະພາບໂດຍຫຍໍ້ ກ່ຽວກັບການພັດທະນາເສດຖະກິດ-ສັງຄົມຂອງ ສປປ ລາວ ແລະ ຜົນສຳເລັດຂອງການເປັນປະທານຈັດກອງປະຊຸມສຸດຍອດ ອາຊຽນ ຄັ້ງທີ 28-29 ແລະ ກອງປະຊຸມປິ່ນອ້ອມຕ່າງໆຂອງ ສປປ ລາວ ໃນປີ 2016 ຜ່ານມາ. ໃນຕອນທ້າຍ, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈ ຕໍ່ລັດຖະບານການາດາ ທີ່ໃຫ້ການຊ່ວຍເຫຼືອ ໃນການເກັບກູ້ລະເບີດບໍ່ທັນແຕກຢູ່ລາວ ແລະ ອວຍພອນໃຫ້ ທ່ານທູດການາດາ ຈົ່ງປະສົບຜົນສໍາເລັດຕະຫຼອດໄລຍະການປະຕິບັດໜ້າທີ່ການທູດຂອງຕົນ ຢູ່ ສປປ ລາວ ໃນຄັ້ງນີ້.

ໃນໂອກາດດຽວກັນ, ທ່ານທູດ Donica Pottie ກໍໄດ້ສະແດງຄວາມຂອບໃຈຕໍ່ທ່ານລັດຖະມົນຕີ ສະເຫຼີມໄຊ ກົມມະສິດ ທີ່ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບໃນຄັ້ງນີ້ ແລະ ຢືນຢັນຈະສືບຕໍ່ຊຸກຍູ້ພາກສ່ວນຕ່າງໆ ໃຫ້ມີການພົວພັນຮ່ວມມືກັນຫຼາຍຂຶ້ນ ໃນໄລຍະປະຕິບັດໜ້າທີ່ການທູດຂອງຕົນ ຢູ່ ສປປ ລາວ.

          ສປປ ລາວ ແລະ ການາດາ, ຊຶ່ງໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 15 ມິຖຸນາ 1974, ໄດ້ມີການພົວພັນ ແລະ ຮ່ວມມືລະຫວ່າງສອງຝ່າຍ ທັງດ້ານການເມືອງ, ເສດຖະກິດ, ດ້ານການຄ້າ, ການລົງທຶນ, ການທ່ອງທ່ຽວ, ວັດທະນະທຳ ແລະ ການຮ່ວມມືໃນຂອບ ຝຣັ່ງໂກໂຟນີ.