ໃນຕອນເຊົ້າວັນທີ 2 ທັນວາ 2016, ທີ່ທຳນຽບປະທານປະເທດ, ການນຳພັກ-ລັດ ປະກອບມີ ທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ພ້ອມພັນລະຍາ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ພ້ອມພັນລະຍາ, ທ່ານນາງ ປານີ ຢາທໍ່ຕູ້, ປະທານສະພາແຫ່ງຊາດ ພ້ອມສາມີ ແລະ ບັນດາທ່ານລັດຖະມົນຕີ, ຮອງລັດຖະມົນຕີ, ພ້ອມພັນລະຍາ ໄດ້ເປັນກຽດຕ້ອນຮັບ ການເຂົ້າຢ້ຽມຂໍ່ານັບອວຍພອນ ຂອງບັນດາທູຕານຸທູດ ແລະ ອົງການຈັດຕັ້ງສາກົນ ປະຈຳລາວ ນຳໂດຍ ທ່ານ ດາໂຕະ ທັນໄຕຮິງ, ເອກອັກຄະລັດຖະທູດອາວຸໂສ ແຫ່ງ ປະເທດມາເລເຊຍ ປະຈຳລາວ. ໃນໂອກາດ ວັນສະຖາປະນາ ສປປ ລາວ ຄົບຮອບ 41 ປີ (2/12/1975-2/12/2016) ແລະ ປີໃໝ່ສາກົນ 2017.
ທ່ານທູດອາວຸໂສ ໄດ້ກ່າວຊົມເຊີຍ ຕໍ່ຜົນງານຂອງການເລືອກຕັ້ງ ສະມາຊິກສະພາ ທີ່ໄດ້ນໍາໄປສູ່ ການເລືອກຕັ້ງການນໍາຂອງປະເທດ ຢ່າງຈົບງາມໃນຕົ້ນປີນີ້. ພ້ອມກັນນັ້ນ, ກໍຊົມເຊີຍຕໍ່ຜົນສໍາເລັດ ອັນໂດດເດັ່ນຂອງ ສປປ ລາວ ຕະຫລອດໄລຍະ 41 ປີຜ່ານມາ ໃນການພັດທະນາ ເສດຖະກິດ-ສັງຄົມ ແລະ ການແກ້ໄຂຄວາມທຸກຍາກ ທີ່ສາມາດບັນລຸໝາກຜົນ ໃນປີ 2016 ຂອງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ທີ່ຊີ້ໃຫ້ເຫັນວ່າ ສປປ ລາວ ສາມາດບັນລຸຜົນສຳເລັດ ອັນໂດດເດັ່ນຫລາຍດ້ານ ໂດຍສະເພາະ ການຮັກສາຈັງຫວະ ການຂະຫຍາຍຕົວ ດ້ານເສດຖະກິດຢ່າງຕໍ່ເນື່ອງ, ມີສະຖຽນລະພາບ ທາງການເມືອງ ແລະ ສັງຄົມ, ມີຄວາມເປັນລະບຽບຮຽບຮ້ອຍ ເຊິ່ງຮັບປະກັນໃຫ້ປະຊາຊົນລາວ ທຸກເຜົ່າສາມາດ ມີສິດອັນຊອບທຳ ແລະ ເສລີພາບ ໃນການເຂົ້າຮ່ວມ ພັດທະນາປະເທດຊາດ ໄດ້ຢ່າງຫ້າວຫັນ. ພ້ອມນີ້ ປີ 2016 ຍັງຖືເປັນປີໜຶ່ງ ແຫ່ງຄວາມສໍາເລັດ ຂອງການທູດລາວ ໄດ້ຕ້ອນຮັບການມາຢ້ຽມຢາມ ທີ່ສໍາຄັນຂອງບັນດາຜູ້ນໍາໂລກ ທີ່ໄດ້ມາເຂົ້າຮ່ວມ ກອງປະຊຸມ ສຸດຍອດອາຊຽນ ແລະ ກອງປະຊຸມສຸດຍອດ ທີ່ກ່ຽວຂ້ອງອື່ນໆ. ສິ່ງທີ່ເຫັນໄດ້ກໍແມ່ນ ການເປັນປະທານອາຊຽນຂອງ ສປປ ລາວ. ສໍາເລັດການຮ່າງ ແລະ ຮັບຮອງເອົາເອກະສານ ທີ່ສໍາຄັນສອງສະບັບ ຄື: ແຜນແມ່ບົດ ການເຊື່ອມຈອດອາຊຽນ 2025 ແລະ ແຜນງານຂໍ້ລິເລີ່ມ ເພື່ອການເຊື່ອມໂຍງອາຊຽນ ສະບັບທີ III. ເຊິ່ງສຸມໃສ່ການເພີ່ມທະວີ ການເຊື່ອມຈອດພາກພື້ນ ແລະ ການຫລຸດຜ່ອນຄວາມຫລຸດໂຕນ ດ້ານການພັດທະນາ ຢູ່ໃນພາກພື້ນ.
ໃນໂອກາດນີ້, ທ່ານ ບຸນຍັງ ວໍລະຈິດ ກໍໄດ້ກ່າວຄໍາປາໃສ ສະແດງຄວາມຂອບໃຈ ຕໍ່ທ່ານທູດອາວຸໂສ ທີ່ໄດ້ຊົມເຊີຍຕໍ່ຜົນສຳເລັດ ທີ່ລັດຖະບານລາວ ໄດ້ນຳພາປວງຊົນລາວທັງຊາດ ຍາດໄດ້ຜົນງານການພັດ ທະນາ ເສດຖະກິດ-ສັງຄົມ ຕະຫລອດ 1 ປີ ຜ່ານມາ. ໃນປີ 2016 ເປັນປີທີ່ມີ ຄວາມໝາຍສໍາຄັນພິເສດ ສໍາລັບ ສປປ ລາວ ເພາະເປັນປີທີ່ມີຫລາຍເຫດການ ປະຫວັດສາດສໍາຄັນເກີດຂຶ້ນ ເຊັ່ນ: ສໍາເລັດການດໍາເນີນ ກອງປະຊຸມໃຫຍ່ ຄັ້ງທີ X ຂອງພັກປະຊາຊົນ ປະຕິວັດລາວ, ໄດ້ສໍາເລັດການເລືອກຕັ້ງ ສະພາແຫ່ງຊາດ ຊຸດທີ 8 ແລະ ສະພາຂັ້ນແຂວງ, ນະຄອນຫລວງວຽງຈັນ; ສປປ ລາວ ຍັງໄດ້ຮັບກຽດ ເປັນປະທານໝູນວຽນຂອງອາຊຽນ. ພ້ອມນັ້ນ, ພັກ-ລັດຖະບານ ໄດ້ເອົາໃຈໃສ່ນໍາພາ ປວງຊົນລາວທັງຊາດ ປຸກລະດົມກໍາລັງແຮງ ຂອງທຸກພາກສ່ວນເສດຖະກິດ ເຂົ້າໃນການຈັດຕັ້ງຜັນຂະຫຍາຍ ມະຕິກອງປະຊຸມຄັ້ງທີ X ຂອງພັກ ແລະ ແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 ເຂົ້າສູ່ຊີວິດຕົວຈິງ ກໍຄື ການສູ້ຊົນບັນລຸເປົ້າໝາຍ ການພັດທະນາແບບຍືນຍົງຂອງ ສປຊ. ນອກນັ້ນ, ຍັງໄດ້ກໍານົດຍຸດທະສາດ ການພັດທະນາເສດຖະກິດ-ສັງຄົມ ແຕ່ນີ້ຮອດປີ 2025 ແລະ ວິໄສທັດຮອດປີ 2030 ແນໃສ່ເຮັດໃຫ້ປະເທດລາວ ກາຍເປັນປະເທດ ກໍາລັງພັດທະນາ ທີ່ມີລາຍຮັບປານກາງສູງ ຕາມທິດພັດທະນາເສດຖະກິດ ພູມປັນຍາ, ສີຂຽວ ແລະ ຍືນຍົງ.
ຜ່ານການປະຕິບັດຕົວຈິງ ໃນໜຶ່ງປີຜ່ານມາເຫັນວ່າ ສປປ ລາວ ຍັງສືບຕໍ່ມີສະຖຽນລະພາບ ທາງການເມືອງ ຢ່າງໜັກແໜ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ໂດຍພື້ນຖານ. ເສດຖະກິດແຫ່ງຊາດ ມີການພັດທະນາ ດ້ວຍຈັງຫວະຕໍ່ເນື່ອງ ເຖິງແມ່ນວ່າໃນປີນີ້ ອັດຕາການຈະເລີນເຕີບໂຕ ທາງເສດຖະກິດສາມາດບັນລຸໄດ້ ພຽງແຕ່ 6,9% ກໍຕາມ. ແຕ່ຍອດຜະລິດຕະພັນພາຍໃນ ເຊິ່ງເປັນລາຍຮັບແຫ່ງຊາດ ຍັງສືບຕໍ່ເພີ່ມຂຶ້ນ ເຊິ່ງສະເລ່ຍ 2.027 ໂດລາສະຫະລັດຕໍ່ຫົວຄົນ, ອັນໄດ້ເຮັດໃຫ້ຊີວິດການເປັນຢູ່ ຂອງປະຊາຊົນລາວບັນດາເຜົ່າ ໄດ້ຮັບການປົວແປງໃຫ້ດີຂຶ້ນ ເທື່ອລະກ້າວ ເຊິ່ງເປັນເງື່ອນໄຂສະດວກພື້ນຖານ ເພື່ອເຮັດໃຫ້ ສປປ ລາວ ຫລຸດພົ້ນອອກຈາກ ສະຖານະພາບດ້ອຍພັດທະນາ ໃນປີ 2020 ຕາມຄາດໝາຍທີ່ວາງໄວ້.
ໃນປີ 2016 ສປປ ລາວ ໄດ້ເປັນເຈົ້າການເຄື່ອນໄຫວ ຢ່າງຕັ້ງໜ້າໃນເວທີພາກພື້ນ ແລະ ສາກົນ ໂດຍຢຶດໝັ້ນ ການຈັດຕັ້ງປະຕິບັດແນວທາງ ການຕ່າງປະເທດສັນຕິພາບ, ເອກະລາດ, ມິດຕະພາບ ແລະ ການຮ່ວມມືກັບທຸກປະເທດ ໃນໂລກຢ່າງສະເໝີຕົ້ນສະເໝີປາຍ. ຍ້ອນມີການປະສານງານ ແລະ ການຮ່ວມມືທີ່ແໜ້ນແຟ້ນ ພາຍໃນອາຊຽນ ກໍຄື ລະຫວ່າງ ອາຊຽນກັບບັນດາ ປະເທດຄູ່ເຈລະຈາ ຈຶ່ງຊ່ວຍໃຫ້ ສປປ ລາວ ປະສົບຜົນສໍາເລັດ ໃນການເປັນເຈົ້າພາບ ຈັດກອງປະຊຸມສຸດຍອດສໍາຄັນອື່ນໆ.
ພ້ອມກັນນີ້, ທ່ານປະທານປະເທດ ຍັງໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວ ບັນດາເຜົ່າ ສະແດງຄວາມຮູ້ບຸນຄຸນ ຢ່າງເລິກເຊິ່ງ ແລະ ຄວາມຂອບໃຈຢ່າງຈິງໃຈ ມາຍັງທ່ານທູດ ແລະ ຜູ້ຕາງໜ້າ ອົງການຈັດຕັ້ງສາກົນ ແລະ ຜ່ານບັນດາທ່ານ ໄປຍັງບັນດາປະເທດ ແລະ ອົງການ ຈັດຕັ້ງສາກົນຕ່າງໆ ທີ່ໄດ້ໃຫ້ການ ສະໜັບສະໜູນ ແລະ ຊ່ວຍເຫລືອພາລະກິດພັດທະນາ ເສດຖະກິດ-ສັງຄົມ ຂອງ ສປປ ລາວ ຕະຫລອດໄລຍະທີ່ຜ່ານມາ.