ໃນວັນທີ 17 ພະຈິກ 2016, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນ. ຣີນາ ບິດເຕີ (Ms. Rina Bitter) ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສະຫະລັດ ອາເມລິກາ ຄົນໃໝ່ ປະຈຳ ສປປ ລາວ.
ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ທ່ານ ນາງ ຣີນາ ບິດເຕີ (Ms. Rina Bitter) ທີ່ໄດ້ຖືກແຕ່ງຕັ້ງມາດຳລົງຕຳແໜ່ງ ເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສະຫະລັດ ອາເມລິກາ ຄົນໃໝ່ ປະຈຳ ສປປ ລາວ ຊຶ່ງຈະເປັນການປະກອບສ່ວນສຳຄັນເຂົ້າໃນການເພີ່ມທະວີສາຍພົວພັນ ແລະ ການຮ່ວມມື ລະຫວ່າງສອງປະເທດໃຫ້ມີບາດກ້າວຂະຫຍາຍຕົວຍິ່ງຂຶ້ນ. ໃນໂອກາດດັ່ງກ່າວ, ທ່ານລັດຖະມົນຕີກະຊວງການຕ່າງປະເທດ ໄດ້ກ່າວເຖິງຜົນສຳເລັດໃນການຢ້ຽມຢາມລັດຖະກິດ ຂອງປະທານາທິບໍດີ ບາຣັກ ໂອບາມາ ແຫ່ງ ສະຫະລັດ ອາເມລິກາ ຢູ່ ສປປ ລາວ ແລະ ໃນການຢ້ຽມຢາມດັ່ງກ່າວ ຜູ້ນຳສອງປະເທດໄດ້ອອກຖະແຫຼງການເປັນຄູ່ຮ່ວມມືແບບກວມລວມທີ່ໄດ້ເປັນການເປີດສັງກາດໃໝ່ ທັງເປັນມິດໝາຍອັນດີໃນການເພີ່ມທະວີຮ່ວມມືລະຫວ່າງສອງປະເທດໃນອານາຄົດ.
ທ່ານ ນາງ ຣີນາ ບິດເຕີ (Ms. Rina Bitter) ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສະຫະລັດ ອາເມລິກາ ຄົນໃໝ່ ປະຈຳ ສປປ ລາວ ໄດ້ສະແດງຄວາມຂອບໃຈຕໍ່ ທ່ານລັດຖະມົນຕີກະຊວງການຕ່າງປະເທດ ໃນການຕ້ອນຮັບ ແລະ ຍັງໄດ້ກ່າວຕື່ມວ່າ ໃນໄລຍະການປະຕິບັດໜ້າທີ່ການທູດຢູ່ລາວ ທ່ານຈະຕັ້ງໜ້າປະຕິບັດປະກອບສ່ວນເຂົ້າໃນການເພີ່ມທະວີສາຍພົວພັນ ແລະ ການຮ່ວມມືລະຫວ່າງສອງປະເທດ ໃຫ້ມີຄວາມເຂັ້ມແຂງ ແລະ ມີບາດກ້າວຂະຫຍາຍຕົວຍິ່ງຂຶ້ນ.
ທ້າຍສຸດ, ທ່ານລັດຖະມົນຕີກະຊວງການຕ່າງປະເທດ, ໄດ້ອວຍພອນໄຊໃຫ້ແກ່ທ່ານເອກອັກຄະລັດຖະທູດ ຈົ່ງປະສົບຜົນສຳເລັດໃນການປະຕິບັດໜ້າທີ່ການທູດຂອງຕົນຢູ່ ສປປ ລາວ.