ໃນວັນທີ 22 ມິຖຸນາ 2021, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມຄະນະ ໄດ້ສໍາເລັດການເຂົ້າຮ່ວມກອງປະຊຸມປຶກສາຫາລື ລະດັບສູງ ດ້ານນະໂຍບາຍ ໃນໂອກາດຄົບຮອບ 25 ປີ ອາເຊັມ ຜ່ານລະບົບທາງໄກ ໃນຫົວຂໍ້: “ສ້າງຄວາມເຂັ້ມແຂງໃຫ້ແກ່ການຮ່ວມມືອາຊີ-ເອີຣົບ ໃນໂລກແຫ່ງການປ່ຽນແປງ”, ທີ່ ກະຊວງການຕ່າງປະເທດ. ເຂົ້າຮ່ວມກອງປະຊຸມຄັ້ງນີ້ ມີບັນດາລັດຖະມົນຕີຕ່າງປະເທດອາເຊັມ, ນັກວິທະຍາກອນ ແລະ ຜູ້ຊ່ຽວຊານ ຈາກບັນດາອົງການຈັດຕັ້ງສາກົນ ແລະ ສະຖາບັນຕ່າງໆ ເຊັ່ນ: ສະຫະປະຊາຊາດ, ເວທີເສດຖະກິດໂລກ ແລະ ອື່ນໆ ເຂົ້າຮ່ວມ.

ກອງປະຊຸມຄັ້ງນີ້ ໄດ້ປຶກສາຫາລືແລກປ່ຽນແນວທາງນະໂຍບາຍ ແລະ ຄໍາຄິດເຫັນ ກ່ຽວກັບ ການຮ່ວມມືລະຫວ່າງສອງພາກພື້ນ ອາຊີ ແລະ ເອີຣົບ ໃນສະພາບທີ່ໂລກມີການປ່ຽນແປງຢ່າງໄວວາ ແລະ ສ້າງວິໄສທັດໃຫ້ແກ່ການຮ່ວມມື ອາຊີ-ເອີຣົບ ທີ່ເຂັ້ມແຂງ ໃນທົດສະວັດຕໍ່ໜ້າ. ນອກຈາກນີ້, ຍັງໄດ້ປຶກສາຫາລື ໃນຫຼາຍໆຫົວຂໍ້ສໍາຄັນ ໃນຫຼາຍຂົງເຂດ ເພື່ອສົ່ງເສີມ ແລະ ຮັດແໜ້ນການຮ່ວມມືກັນ ລະຫວ່າງສອງພາກພື້ນ ຈາກການສົ່ງເສີມການຮ່ວມມືທາງດ້ານການຄ້າ-ການລົງທຶນ ໄປສູ່ການຮ່ວມມືດ້ານການເຊື່ອມຈອດ ແລະ ການພັດທະນາແບບຍືນຍົງ.

ໃນກອງປະຊຸມຄັ້ງນີ້, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ກ່າວຄໍາເຫັນໃນພາກເປີດກອງປະຊຸມ ໂດຍເນັ້ນໃສ່ ການຮ່ວມມືລະຫວ່າງສອງພາກພື້ນ ອາຊີ-ເອີຣົບ ໃນໄລຍະຫຼາຍກວ່າ 2 ທົດສະວັດ ຜ່ານມາ, ເຊິ່ງເຫັນວ່າ ຂອບການຮ່ວມມືດັ່ງກ່າວ ຍັງສືບຕໍ່ເປັນເວທີປຶກສາຫາລືທີ່ສໍາຄັນ ເພື່ອສົ່ງເສີມຄວາມເຂົ້າໃຈລະຫວ່າງປະຊາຊົນສອງພາກພື້ນ ບົນພື້ນຖານຄວາມເທົ່າທຽມກັນ ແລະ ມີຜົນປະໂຫຍດຮ່ວມກັນ ແລະ ໄດ້ຍົກໃຫ້ເຫັນຜົນສໍາເລັດຈາກບັນດາໂຄງການ ແລະ ກິດຈະກໍາຕ່າງໆ ຂອງກອງທຶນອາຊີ-ເອີຣົບ ທີ່ໄດ້ປະກອບສ່ວນເຂົ້າໃນຂອບການຮ່ວມມືອາເຊັມ ແລະ ການເພີ່ມທະວີການຮ່ວມມືໃນ 3 ເສົາຄໍ້າທາງດ້ານການເມືອງ-ຄວາມໝັ້ນຄົງ, ເສດຖະກິດ ແລະ ການພັດທະນາແບບຍືນຍົງ ແລະ ວັດທະນະທໍາ-ສັງຄົມ. ໃນໂອກາດນີ້, ໄດ້ສະແດງຄວາມຂອບໃຈຕໍ່ບັນດາປະເທດສະມາຊິກອາເຊັມ ທີ່ໃຫ້ການຊ່ວຍເຫຼືອ ແລະ ການສະໜັບສະໜູນໃນການສະໜອງວັກແຊັງຕ້ານໂຄວິດ-19 ໂດຍຜ່ານໂຄງການ COVAX ແລະ ກອງທຶນອາຊີ-ເອີຣົບ, ສະໜອງອຸປະກອນການແພດ ແລະ ນໍາສົ່ງຊ່ຽວຊານ ເພື່ອມາຊ່ວຍຕ້ານການແຜ່ລະບາດຂອງພະຍາດໂຄວິດ-19 ທີ່ ສປປ ລາວ ແລະ ໄດ້ເນັ້ນເຖິງການສືບຕໍ່ສົງເສີມການຮ່ວມມືລະຫວ່າງ ຄູ່ຮ່ວມມືອາເຊັມ ໃນການສ້າງຄວາມເຂັ້ມແຂງໃຫ້ແກ່ການເຊື່ອມຈອດແບບຍືນຍົງ ຂອງອາຊີ-ເອີຣົບ.