ໃນຕອນຄໍ່າຂອງວັນທີ 19 ພະຈິກ 2020, ໄດ້ມີການ​ຈັດພິທີສະເຫຼີມສະຫຼອງວັນຄົບຮອບ 45 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫະພາບເອີຣົບ (ອີຢູ) ຂຶ້ນຢ່າງເປັນທາງການ ທີ່ ຫໍພິພິທະພັນແຫ່ງຊາດ, ນະຄອນຫຼວງວຽງຈັນ, ໂດຍການເປັນກຽດເຂົ້າຮ່ວມໃນພິທີດັ່ງກ່າວມີ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແລະ ທ່ານ ນາງ ອີນາ ມາຈູລໍນິແຕ, ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສະຫະພາບເອີຣົບ ປະຈໍາ ສປປ ລາວ, ມີບັນດາລັດຖະມົນຕີ, ຮອງລັດຖະມົນຕີ, ເຈົ້າໜ້າທີ່ຂັ້ນສູງຂອງລາວ, ບັນດາທູຕານຸທູດປະຈໍາ ສປປ ລາວ ແລະ ແຂກຖືກເຊີນຈາກພາກສ່ວນຕ່າງໆ ເຂົ້າຮ່ວມຢ່າງພ້ອມພຽງ.

ໃນ​ພິ​ທີທີ່​ມີ​ຄວາມ​ໝາຍ​ສຳ​ຄັນ​ດັ່ງ​ກ່າວ,​ ທ່ານ ສະ​ເຫຼີມ​ໄຊ ກົມ​ມະ​ສິດ ແລະ ທ່ານ ນາງ ອີ​ນາ ມາ​ຈຸ​ລໍ​ນິ​ແຕ ໄດ້​ກ່າ​ວ​ຄຳ​ເຫັນ​ສະ​ແດງ​ຄວາມ​ຊົມ​ເຊີຍ ແລະ ຕີລາຄາ​ສູງຕໍ່ຜົນສຳເລັດ​ຂອງການພົວພັນ​ຮ່ວມ​ມື​ສອງຝ່າຍ ລະຫວ່າງ ສປປ ລາວ ແລະ ອີຢູ ໃນ​ໄລຍະ45 ປີນັບ​ຕັ້ງແຕ່​ສອງຝ່າຍໄດ້​ສ້າງ​ຕັ້ງ​ສາຍ​ພົວ​ພັນ​ການ​ທູດ​ນຳ​ກັນໃນວັນທີ 21 ພະຈິກ 1975 ທີ່​ຜ່ານ​ມາ. ການພົວພັນຮ່ວມມື ລາວ ແລະ ອີຢູ ແມ່ນມີບາດກ້າວຂະຫຍາຍຕົວຢ່າງຕໍ່ເນື່ອງໂດຍສະເພາະ ການຊ່ວຍເຫຼືອໃນແຜນງານ Joint Programingຂອງ ອີຢູ ແລະ ຈາກບັນດາປະເທດສະມາຊິກ,ຊຶ່ງມາເຖິງປະຈຸບັນ ມີມູນຄ່າລວມທັງໝົດ 500 ລ້ານເອີໂຣ ໄດ້ປະກອບສ່ວນເຂົ້າໃນການພັດທະນາວຽກງານການສຶກສາຂັ້ນພື້ນຖານ, ໂພຊະນາການ, ກະສິກຳ ແລະ ການພັດທະນາຊົນນະບົດ, ວຽກງານເກັບກູ້ລະເບີດບໍ່ທັນແຕກ (​UXO), ວຽກສາທາລະນະສຸກ, ການອະນຸລັກສິ່ງແວດລ້ອມ ແລະ ຊີວະນານາພັນ, ການປົກຄອງທີ່ດີ, ​ສ້າງ​ລັດແຫ່ງກົດໝາຍ ແລະ ອົງການຈັດຕັ້ງທາງສັງຄົມ, ການຄ້າ ແລະ ພາກເອກະຊົນ, ວຽກງານສິດທິມະນຸດ ແລະ ຄວາມສະເໝີພາບບົດບາດຍິງ-ຊາຍ, ການຮ່ວມມືທາງດ້ານວັດທະນະທຳ ແລະ ການເຊື່ອມໂຍງ ລວມ​ທັງ ການ​ຊ່ວຍ​ເຫຼືອ​ດ້ານ​ມະ​ນຸດ​ສະ​ທຳ ຊຶ່ງເປັນການປະກອບສວ່ນອັນສຳຄັນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງ ສປປ ລາວ, ການພັດທະນາແຫ່ງຊາດ ໂດຍສອດ​ຄ່ອງ​ກັບ​ເປົ້າ​ໝາຍການພັດທະນາແບບຍືນຍົງຂອງອົງການສະຫະປະຊາຊາດຂອງລັດຖະບານ ສປປ ລາວ ​ເພື່ອແນໃສ່ເຮັດໃຫ້ ສ​ປ​ປ ລາວ ຫຼຸດ​ພົ້ນ​ອອກ​ຈາກປະເທດດ້ອຍພັດທະນາ ​ແລະ ກ້າວສູ່ການພັດທະນາແບບຍືນຍົງເທື່ອລະກ້າວ.​ ນອກຈາກນັ້ນ, ການພົວພັນຮ່ວມມື ລະຫວ່າງ ສປປ ລາວ ແລະ ອີຢູ ກໍ່ຍັງຈະສືບຕໍ່ເສີມຂະຫຍາຍໃນຫຼາຍຂະແໜງການໃນອະນາຄົດ ເຊັ່ນ: ດ້ານ​ເສດຖະກິດ-ການ​ຄ້າ, ການ​ລົງທຶນ, ການທ່ອງທ່ຽວ,ວັດທະນະທຳ ​ແລະ ດ້ານ​ອື່ນໆ, ຊຶ່ງເປັນການປະກອບສ່ວນທີ່ສໍາຄັນເຂົ້າໃນການ​ເສີມຂະຫຍາຍ​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມືທີ່​ມີ​ມາ​ແຕ່ຍາວ​ນານນັ້ນ ໃຫ້ມີ​ຄວາມ​ໝັ້ນຄົງໜັກແໜ້ນ ແລະ ມີໝາກຜົນຕົວຈິງຍິ່ງໆຂຶ້ນ.

ໃນໂອກາດ​ດຽວ​ກັນນີ້, ​ທັງ​ສອງ​ຝ່າຍກໍ່​ໄດ້​ສະແດງ​ຄວາມມຸ້ງ​ຫວັງ​ທີ່​ຈະ​ສືບຕໍ່​ເສີມ​ສ້າງ ແລະ ຮັດ​ແໜ້ນ​ການພົວພັນ​ຮ່ວມ​ມື​ທີ່​ດີ​ໃນ​ປັດຈຸບັນ ລະຫວ່າງ​ ສປປ ລາວ ແລະ ອີຢູ ​ໃຫ້​ເຕີບ​ໃຫຍ່ຂະຫຍາຍຕົວ​ຂຶ້ນສູ່ລະດັບໃໝ່​ໃນຕໍ່ໜ້າ. ພິທີສະເຫລີມສະຫລອງ​ໃນ​ຄັ້ງ​ນີ້ ດຳເນີນ​ໄປ​ດ້ວຍ​ບັນຍາ​ກາດ​ແຫ່ງ​ໄມຕີຈິດມິດຕະພາບ​ອັນ​ອົບອຸ່ນ ແລະ ສ້າງສັນແຕ່ຕົ້ນຕະຫຼອດປາຍ.