ໃນຕອນບ່າຍຂອງ ວັນທີ 30 ກັນຍາ 2020 ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນ ເຂົ້າຮ່ວມກອງປະຊຸມທາງໄກ ລັດຖະມົນຕີຕ່າງປະເທດອາຊຽນ ສາມຝ່າຍ ແບບເປີດກວ້າງ ຮ່ວມກັບ ລັດຖະມົນຕີຕ່າງປະເທດ ອັງກິດ ວ່າດ້ວຍບັນຫາ ໂຄວິດ-19 (ASEAN Foreign Ministers’ Troika Open-Ended Meeting with the UnitedKingdom Foreign Secretary on Covid-19)ພາຍໃຕ້ການເປັນປະທານຂອງ ທ່ານ Pham Binh Minh, ຮອງນາຍົກລັດຖະມົນຕີ, ລັດຖະມົນຕີຕ່າງປະເທດ ສສ. ຫວຽດນາມ. ເຂົ້າຮ່ວມໃນກອງປະຊຸມຄັ້ງນີ້ ຍັງມີ ບັນດາລັດຖະມົນຕີຕ່າງປະເທດອາຊຽນ, ທ່ານເລຂາທິການໃຫ່ຍອາຊຽນ ແລະ ວິຊາການທີ່ກ່ຽວຂ້ອງຈໍານວນນຶ່ງ.
ກອງປະຊຸມໄດ້ຕີລາຄາສູງ ແລະ ຮັບຊາບຕໍ່ການແຈ້ງສະພາບການ ກໍຄືມາດຕະການຂອງແຕ່ລະປະເທດ ສະມາຊິກອາຊຽນ ແລະ ອັງກິດ ໃນການສະກັດກັ້ນ, ເຝົ້າລະວັງ, ຄວບຄຸມ ແລະ ແກ້ໄຂ ບັນຫາການແຜ່ລະບາດຂອງຂອງພະຍາດໂຄວິດ-19. ພ້ອມນີ້, ບັນດາ ທ່ານ ລັດຖະມົນຕີ ຍັງໄດ້ແລກປ່ຽນວິໄສທັດ ກໍ່ຄືບົດຮຽນທີ່ດີໃນການຕອບໂຕ້ ແລະ ຮັບມືກັບພະຍາດລະບາດດັ່ງກ່າວ ລວມທັງມາດຕະການແກ້ໄຂຜົນກະທົບທາງດ້ານເສດຖະກິດ; ພິເສດ, ໄດ້ຢືນຢັນຈະສືບຕໍ່ ຮ່ວມມືກັນເພື່ອໃຫ້ສາມາດຜ່ານຜ່າວິກິດການດັ່ງກ່າວໃນເວລາອັນໄວ.
ໃນໂອກາດນີ້, ທ່ານ ລັດຖະມົນຕີ ສະເຫຼີມໄຊ ກົມມະສິດ, ກໍໄດ້ແຈ້ງສະພາບການຫລ້າສຸດ ກ່ຽວກັບ ການແຜ່ລະບາດ ຂອງ ພະຍາດໂຄວິດ-19 ຢູ່ ສປປ ລາວ, ເຊິ່ງໂດຍພື້ນຖານແມ່ນສາມາດຄວບຄຸມໄດ້ ແລະ ປະສົບຜົນສໍາເລັດອັນຈົບງາມ, ແຕ່ຍັງໄດ້ສືບຕໍ່ມາດຕະການ ໃນການປ້ອງກັນ ແລະ ເຝົ້າລະວັງ ເພື່ອປ້ອງກັນຄວາມສ່ຽງ ທີ່ຈະເກີດການແຜ່ລະບາດ ຮອບສອງ ເຊັ່ນ: ການຮັກສາໄລຍະຫ່າງ ແລະ ການສືບຕໍ່ປິດບັນດາດ່ານເຂົ້າ-ອອກທັງໝົດ ຍົກເວັ້ນກໍລະນີສຸກເສີນ.
ສໍາລັບທິດທາງໃນຕໍ່ໜ້າ ການຮ່ວມມື ອາຊຽນ-ອັງກິດ ໃນການ ຮັບມື ແລະ ແກ້ໄຂ ພະຍາດໂຄວິດ-19, ທ່ານ ລັດຖະມົນຕີ ສະເຫຼີມໄຊ ກົມມະສິດ ໄດ້ສະເໜີໃຫ້ ກອງປະຊຸມ ພິຈາລະນາ: 1. ສືບຕໍ່ແລກປ່ຽນຂໍ້ມູນຂ່າວສານ ແລະ ການຮ່ວມມືກັນໃນ ການຄົ້ນຄວ້າ-ພັດທະນາ ແລະ ຜຼິດຢາປົວພະຍາດ ກໍ່ຄື ຢາວັກແຊັງຕ້ານໂຄວິດ-19 ແລະ ການຮັບປະກັນ ໃນການເຂົ້າເຖິງ ຢາປົວພະຍາດ ກໍຄື ຢາວັກແຊັງ ດັ່ງກ່າວ ຢ່າງເທົ່າທຽມກັນ ແລະ ໃນລາຄາທີ່ເໝາະສົມ ໃນເວລາທີ່ມີຢາດັັ່ງກ່າວແລ້ວ; 2. ການຟື້ນຟູເສດຖະກິດ ຫຼັງໂຄວິດ-19 ໂດຍສະເພາະ ການສົ່ງເສີມທາງດ້ານການຄ້າ ແລະ ການລົງທືນ ລະຫວ່າງ ອາຊຽນ ແລະ ອັງກິດ ໂດຍແນະນໍາໃຫ້ ລັດຖະມົນຕີເສດຖະກິດ ເລີ່ມປຶກສາຫາລື ຊອກຊ່ອງທາງ ໃນການສ້າງ ເຂດການຄ້າເສລີ ອາຊຽນ-ອັງກິດ; 3. ການຫັນເປັນເສດຖະກິດດີຈີຕອນ ໂດຍສຸມໃສ່ສົ່ງເສີມ ຈຸລະວິສາຫະກິດ, ທຸລະກິດຂະໜາດນ້ອຍ ແລະ ຂະໜາດກາງ (MSMEs) ເພື່ອໃຫ້ສາມາດເຮັດທຸລະກິດ ຜ່ານທາງເອເລັກໂຕຼນິກ ຮ່ວມກັນໄດ້; ແລະ 4. ສືບຕໍ່ຮ່ວມມື ດ້ານການສຶກສາ ແລະ ການໄປມາຫາສູ່ ລະຫວ່າງ ປະຊາຊົນ ກັບ ປະຊາຊົນ ໂດຍສະເພາະ ການສະໜອງທຶນສຶກສາ ແລະ ການແລກປ່ຽນດ້ານສີລະປະ-ວັດທະນະທໍາ.