ໃນຕອນຄໍ່າວັນທີ 27 ກໍລະກົດ 2018 ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ Lim Jock Hoi, ເລຂາທິການໃຫຍ່ອາຊຽນ ພ້ອມດ້ວຍຄະນະ ໃນໄລຍະເດີນທາງມາມອບເຄື່ອງຊ່ວຍເຫຼືອ ໃຫ້ແກ່ຜູ້ປະສົບໄພທີ່ໄດ້ຮັບຜົນກະທົບຈາກເຫດການອຸບັດຕິເຫດໂຄງການເຂື່ອນໄຟຟ້າ ເຊປຽນ-ເຊນໍ້ານ້ອຍ ທີ່ ແຂວງອັດຕະປື.
ທ່ານ Lim Jock Hoi, ເລຂາທິການໃຫຍ່ອາຊຽນ ແລະ ໃນນາມຜູ້ປະສານງານຫຼັກຂອງອາຊຽນເພື່ອຊ່ວຍເຫລືອດ້ານມະນຸດສະທຳ ແລະ ບັນເທົາທຸກສຸກເສີນ ໄດ້ຕາງໜ້າອາຊຽນມອບເຄື່ອງຊ່ວຍເຫລືອໃຫ້ ສປປ ລາວ ເຊຶ່ງລວມມີ: ເຮືອອາລູມິນຽມ, ຈັກເຮືອອາລູມິນຽມ, ເຕັນທີ່ຢູ່ອາໄສສຳລັບຄອບຄົວ, ເຄື່ອງປະຖົມພາຍາບານ, ເຄື່ອງໃຊ້ປະຈຳວັນ, ມຸ້ງ ແລະ ເຄື່ອງໃຊ້ຈຳເປັນອື່ນໆ ລວມທັງໝົດ 12,807 ອັນ, ເຊິ່ງລວມມູນຄ່າ 180,693.30 ໂດລາສະຫະລັດ.
ນອກຈາກນີ້, ທ່ານ ເລຂາທິການໃຫຍ່ອາຊຽນ ພ້ອມດ້ວຍຄະນະ ກໍໄດ້ສືບຕໍ່ລົງໄປຕິດຕາມເບິ່ງປະຊາຊົນຢູ່ເຂດທີ່ໄດ້ຮັບຜົນກະທົບຕົວຈິງ ຢູ່ ເມືອງສະໜາມໄຊ, ແຂວງອັດຕະປື ໃນວັນທີ 28 ກໍລະກົດ 2018.
ໃນໂອກາດດັ່ງກ່າວ, ທ່ານ ລັດຖະມົນຕີ ສະເຫຼີມໄຊ ໄດ້ສະແດງຄວາມຂອບໃຈຕໍ່ຄວາມເປັນຫ່ວງໄຍຂອງທ່ານເລຂາທິການໃຫຍ່ ແລະ ການຊ່ວຍເຫຼືອຂອງຄອບຄົວອາຊຽນ ໂດຍຜ່ານສູນປະສານງານອາຊຽນ ເພື່ອຊ່ວຍເຫລືອດ້ານມະນຸດສະທຳ (AHA Centre).