ໃນໂອກາດເດີນທາງຢ້ຽມຢາມ ສປປ ລາວ ຢ່າງເປັນທາງການ ຂອງທ່ານ Enrique A. Manalo, ລັດຖະມົນຕີການຕ່າງປະເທດ ຟີລິບປີນ, ໃນຕອນເຊົ້າຂອງວັນທີ 04 ສິງຫາ 2023, ສະຖາບັນການຕ່າງປະເທດ ຮ່ວມກັບ ສະຖານເອກອັກຄະລັດຖະທູດ ແຫ່ງ ຟີລິບປິນ ປະຈໍາ ສປປ ລາວ ໄດ້ຈັດປາຖະກະຖາຂຶ້ນພາຍໃຕ້ຫົວຂໍ້: “ຮັດແໜ້ນການພົວພັນ ລາວ - ຟິລິບປິນ ໂດຍຖືເອົາປະຊາຊົນເປັນໃຈກາງ” (Closer Together: People at the Center of Laos – Philippines Relations), ທີ່ ສູນການຮ່ວມມືສາກົນ ແລະ ການຝືກອົບຮົມ (ICTC), ໂດຍການໃຫ້ກຽດບັນຍາຍຂອງລັດຖະມົນຕີກະຊວງການຕ່າງປະເທດ ຟີລິບປິນ, ມີບັນດາຄະນະນໍາ ຂອງກະຊວງການຕ່າງປະເທດ, ບັນດາທ່ານທູດອາວຸໂສບໍານານ, ອະດີດເອກອັກຄະລັດຖະທູດລາວ ປະຈໍາ ຟີລິບປີນ, ບັນດາທຸຕານຸທູດຕ່າງປະເທດ ປະຈໍາ ສປປ ລາວ, ບັນດາທ່ານຫົວໜ້າກົມ, ຄະນະກົມ, ຄະນະພະແນກ ຈາກກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ, ບັນດາກະຊວງຂະແໜງການອ້ອມຂ້າງສູນກາງ ລວມທັງສະມາຄົມມິດຕະພາບລາວ-ຟິລີບປີນ ທັງໝົດປະມານ 150 ທ່ານ. ຈຸດປະສົງຂອງການຈັດປາຖະກະຖາໃນຄັ້ງນີ້ ແມ່ນເພື່ອເປັນການເຜີຍແຜ່ນະໂຍບາຍການຕ່າງປະເທດຂອງ ຟີລິບປິນ ແລະ ຕີລາຄາທົບທວນການພົວພັນຮ່ວມມືສອງຝ່າຍ ລະຫວ່າງ ສປປ ລາວ ແລະ ຟິລິບປິນ ຕະຫຼອດໄລຍະ 68 ປີ ໂດຍຖືເອົາຜົນປະໂຫຍດຂອງປະຊາຊົນສອງຊາດເປັນສໍາຄັນ. ນອກນັ້ນ, ຍັງເປັນໜຶ່ງໃນກິດຈະກໍາການເຄື່ອນໄຫວຢ້ຽມຢາມ ສປປ ລາວ ຢ່າງເປັນທາງການ ເພື່ອເຂົ້າຮ່ວມກອງປະຊຸມຄະນະກໍາມະທິການ ວ່າດ້ວຍການຮ່ວມມື ລາວ-ຟີລິບປິນ, ຄັ້ງທີ II ໃນລະຫວ່າງ ວັນທີ 03–05 ສິງຫາ 2023.
ໃນໂອກາດນີ້, ທ່ານ Enrique A. Manalo, ລັດຖະມົນຕີກະຊວງການຕ່າງປະເທດ ຟິລິບປິນ ໄດ້ຕີລາຄາສູງ ຕໍ່ການພົວພັນຮ່ວມມື ການສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ແລະ ມິດຕະພາບອັນຍາວນານ ລະຫວ່າງ ສອງປະເທດ ລາວ-ຟີລິບປິນ ທີ່ໄດ້ຮັບການພັດທະນາ ແລະ ຮັດແໜ້ນໃຫ້ມີຄວາມແໜ້ນແຟ້ນຂຶ້ນຕາມລໍາດັບ, ຊຶ່ງເຫັນໄດ້ຈາກການແລກປ່ຽນ-ຢ້ຽມຢາມຂອງການນຳຂັ້ນສູງ ລະຫວ່າງສອງປະເທດ ຢ່າງເປັນປົກກະຕິ, ການສົ່ງເສີມການຮ່ວມມື ລະຫວ່າງສອງກະຊວງການຕ່າງປະເທດ ແລະ ບັນດາຂະແໜງການຕ່າງໆອ້ອມຂ້າງສູນກາງຢ່າງ ຮອບດ້ານ ເຊັ່ນ: ການຮ່ວມມືປ້ອງການຊາດ-ປ້ອງກັນຄວາມສະຫງົບ, ເສດຖະກິດການຄ້າ-ລົງທຶນ, ການສຶກສາ ແລະ ພັດທະນາຊັບພະຍາກອນມະນຸດ, ວັດທະນະທຳ-ສັງຄົມ ແລະ ທ່ອງທ່ຽວ, ການຕ້ານການຄ້າຢາເສບຕິດ ແລະ ອື່ນໆ ເພື່ອເຮັດໃຫ້ບັນດາປະເທດພາຍໃນພາກພື້ນ ກໍຄື ປະຊາຊົນຂອງທັງສອງປະເທດ ມີຄວາມປອດໄພ ແລະ ພັດທະນາຢ່າງໝັ້ນທ່ຽງເຂັ້ມແຂງ. ພ້ອມດຽວກັນນີ້ລາວ-ຟີລິບປິນ ຍັງໄດ້ປຶກສາຫາລື ແຜນວຽກໃນຕໍ່ໜ້າຮ່ວມກັນ ເພື່ອ ກະກຽມໃຫ້ແກ່ການເປັນປະທານອາຊຽນ ຂອງ ສປປ ລາວ ໃນປີ 2024 ແລະ ກະກຽມການສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລາວ-ຟີລິບປິນ ຄົບຮອບ 70 ປີ ໃນປີ 2025 ທີ່ຈະມາເຖິງ.
ໃນຕອນທ້າຍຂອງການປາຖະກະຖາ, ທ່ານທູດ ໄມ ໄຊຍະວົງສ໌, ຫົວໜ້າສະຖາບັນການຕ່າງປະ ເທດ, ຜູ້ນໍາພາການປາຖະກະຖາ ແລະ ຕາງໜ້າໃຫ້ກະຊວງການຕ່າງປະເທດ ກໍໄດ້ສະແດງຄວາມຂອບໃຈມາຍັງລັດຖະມົນຕີກະຊວງການຕ່າງປະເທດ ຟິລິບປິນ ພ້ອມດ້ວຍຄະນະທີ່ໄດ້ເສຍເວລາອັນມີຄ່າໃຫ້ກຽດບັນຍາຍທີ່ມີຄວາມໝາຍສໍາຄັນໃນຄັ້ງນີ້ ແລະ ບັນດາຄະນະນໍາກະຊວງ, ບັນດາແຂກທັງໝົດທີ່ເຂົ້າຮ່ວມພິທີໃນຄັ້ງນີ້ ເຮັດໃຫ້ການຮັບຟັງປາຖະກະຖາໃນຄັ້ງນີ້ ມີບັນຍາກາດ ແລະ ເນື້ອໃນຄົບຖ້ວນສົມບູນ, ພ້ອມທັງ ເປັນການເນັ້ນໃຫ້ເຫັນເຖິງການພົວພັນການທູດ ແລະ ການຮ່ວມມື ລະຫວ່າງ ລາວ - ຟີລິບປິນ ຈະສືບຕໍ່ຮັດແໜ້ນ ແລະ ຜັນຂະຫຍາຍ ໃຫ້ເປັນຮູບປະທໍາຂຶ້ນເທື່ອລະກ້າວ.