ສ​ປ​ປ ລາວ ຕີລາຄາສູງ ຕໍ່​ຄວາມພະຍາຍາມຂອງຜູ້ນໍາ ສ​ປ​ປ ເກົາ​ຫຼີ ແລະ ສ.ອາ​ເມ​ຣິ​ກາ ໃນການຈັດການ​ພົບ​ປະສຸດຍອດ ຄັ້ງ​ທີ 2 ລະ​ຫວ່າງຜູ້​ນຳສອງປະເທດ, ຊຶ່ງໄດ້ຈັດຂຶ້ນ ທີ່ ນະຄອນຫຼວງຮ່າໂນ້ຍ, ສສ. ຫວຽດນາມ, ແຕ່ວັນທີ 27-28 ກຸມພາ 2019. ພ້ອມກັນນັ້ນ, ກໍຂໍຊົມເຊີຍການເປັນເຈົ້າພາບທີ່ດີເລີດຂອງລັດຖະບານ ແລະ ປະຊາຊົນ ສສ. ຫວຽດນາມ, ເຊິ່ງເປັນການປະກອບສ່ວນທີ່ສໍາຄັນ ເຂົ້າໃນຂະບວນການສ້າງສັນຕິພາບໃນພາກພື້ນ ແລະ ໃນໂລກ ເຖິງແມ່ນວ່າ ສອງຝ່າຍຈະບໍ່ສາມາດບັນລຸຂໍ້ຕົກລົງໃດໆຮ່ວມກັນກໍຕາມ. ສ​ປ​ປ ລາວ ເຫັນວ່າ​ ​ການ​ພົບ​ປະ​ຄັ້ງ​ນີ້ ໄດ້ສ້າງຄວາມໄວ້ເນື້ອເຊື່ອໃຈ ແລະ ເຂົ້າໃຈຊຶ່ງກັນ ແລະ ກັນຕື່ມ ລະຫວ່າງຜູ້ນໍາ ສປປ ເກົາຫຼີ ແລະ ສ.ອາເມລິກາ, ເຊິ່ງຈະເປັນພື້ນຖານສໍາຄັນໃຫ້ແກ່ການເຈລະຈາສ້າງສາຍພົວພັນແບບໃໝ່ ລະຫວ່າງສອງປະເທດ, ກໍຄື​ການ​ສ້າງ​ແຫຼມ​ເກົາ​ຫຼີໃຫ້​ເປັນ​ເຂດປອດ​ອາ​ວຸດ​ນິວ​ເຄລຍ ໃນອະນາຄົດ.

ສ​ປ​ປ ລາວ ສະ​ແດງ​ຄວາມຍິນ​ດີ ຕໍ່​​​ຜົນສໍາເລັດ ຂອງ ການ​ພົບ​ປະ​ຄັ້ງທີ 3 ລະ​ຫວ່າງ ປະທານ ກິມ ຈອງອຸນ ແຫ່ງ ສ​ປ​ປ ເກົາ​ຫລີ ແລະ ປະທານາທິບໍດີ ມູນ ແຈ-ອິນ ແຫ່ງ ສ. ເກົາຫຼີ ແຕ່ວັນທີ    18-20 ກັນຍາ 2018 ທີ່ ນະຄອນຫຼວງ ພຽງຢາງ. ສ​ປ​ປ ລາວ ເຫັນວ່າ ​ການ​ພົບ​ປະ​ຂອງຜູ້ນຳ ສອງເກົາຫຼີ ໃນຄັ້ງ​ນີ້ ບໍ່ພຽງແຕ່​​ເປັນການ​ປະກອບສ່ວນທີ່ສຳຄັນເຂົ້າ​ໃນ​ການສືບຕໍ່ສົ່ງເສີມ​​ການ​ພົວ​ພັນຮ່ວມ​ມືທີ່ດີ ລະ​ຫວ່າງ ສອງເກົາຫຼີ ໃຫ້ດີຍິ່ງໆຂື້ນ ແຕ່ຍັງເປັນການຢໍ້າຄືນອີກເທື່ອໜຶ່ງເຖິງຄວາມພະຍາຍາມຂອງສອງເກົາຫຼີ ໃນການຮັກສາສັນຕິພາບ, ຄວາມໝັ້ນຄົງຢ່າງຖາວອນ ແລະ ເຮັດໃຫ້ແຫຼມເກົາຫຼີເປັນເຂດປອດອາວຸດນິວເຄລຍ.

ສ​ປ​ປ ລາວ ສະ​ແດງ​ຄວາມ​ຍິນ​ດີ ຕໍ່​ຜົນ​ສຳ​ເລັດ​ຂອງການ​ພົບ​ປະສຸດຍອດຄັ້ງ​ປະ​ຫວັດ​ສາດ ລະ​ຫວ່າງ ຜູ້​ນຳ ສ​ປ​ປ ເກົາ​ຫລີ ແລະ ສ. ອາ​ເມ​ຣິ​ກາ​ ໃນ​ວັນ​ທີ 12 ມີຖຸນາ 2018, ທີ່ ປະ​ເທດ ສິງ​ກະ​ໂປ. ສ​ປ​ປ ລາວ ເຫັນວ່າ​ຜົນ​ການ​ພົບ​ປະ​ຄັ້ງ​ນີ້ ຈະເປັນ​ບາດ​ລ້ຽວ​ໃໝ່​ແຫ່ງ​ການ​ພົວ​ພັນ​ ລະ​ຫວ່າງ ສອງ​ປະ​ເທດ, ເຊິ່ງ​ຈະປະ​ກອບ​ສ່ວນ​ສຳ​ຄັນ​ເຂົ້າ​ໃນ​ການ​ປົກ​ປັກ​ຮັກ​ສາ​ສັນ​ຕິ​ພາບ ແລະ ສະ​ຖຽນ​ລະ​ພາບ ໃນ​ແຫລມ​ເກົາ​ຫລີ ແລະ ໃນໂລກ, ກໍຄື​ການ​ສ້າງ​ແຫລມ​ເກົາ​ຫລີ ໃຫ້​ເປັນ​ເຂດປອດ​ອາ​ວຸດ​ນິວ​ເຄ​ລຍ.