ສປປ ລາວ ໄດ້ຕິດຕາມສະພາບການ ຢູ່ ແຫລມເກົາຫລີ ຢ່າງໃກ້ຊິດ ແລະ ມີຄວາມຍິນດີທີ່ເຫັນວ່າ ສະພາບການຢູ່ແຫລມເກົາຫລີ ມີການປັບປຸງໃຫ້ດີຂຶ້ນໃນທາງທີ່ສ້າງສັນ ແລະ ພັດທະນາໄປໃນທາງບວກ, ເຊິ່ງເປັນນິມິດໝາຍທີ່ດີ ແກ່ການແກ້ໄຂບັນຫາຮ່ວມກັນ ເພື່ອປົກປັກຮັກສາສັນຕິພາບ ແລະ ສະຖຽນລະພາບຂອງພາກພື້ນ ແລະ ສາກົນ ກໍຄືໃນແຫລມເກົາຫລີ.

ກະຊວງການຕ່າງປະເທດ ແຫ່ງ ສປປ ລາວ ສະ​ແດງຄວາມເປັນຫ່ວງ ຕໍ່ກັບການປະກາດ​ພຽງຝ່າຍດຽວໃຫ້ນະ​ຄອນເຢຣູຊາເລັມ ເປັນເມືອງຫລວງຂອງປະເທດອິດສະຣາແອນ ຂອງ ປະທານາທິບໍດີ ສະຫະລັດອາເມລິກາ. ສປປ ລາວ ຍາມໃດກໍສະໜັບສະໜູນ ການຕໍ່ສູ້ອັນເປັນທຳຂອງປະຊາຊົນປາແລັດສະຕິນ ໂດຍສະເພາະແມ່ນສິດທິທີ່ຕັດແຍກອອກບໍ່ໄດ້ ໃນການຕັດສິນຊະຕາກຳດ້ວຍຕົນເອງ ແລະ ການສ້າງຕັ້ງລັດເອກະລາດ ​ຢູ່ເທິງຜືນແຜ່ນດິນອັນຄົບຖ້ວນຂອງປາແລັດສະຕິນ. ສປປ ລາວ ເຊື່ອໝັ້ນວ່າ ທາງອອກພຽງໜຶ່ງດຽວ ແມ່ນຄວາມເປັນເອກະພາບກັນ​ພາຍ​ໃນວົງຄະນາຍາດສາກົນ ຕໍ່ກັບບັນຫານີ້ ເພື່ອສ້າງສະພາບ​ແວດ​ລ້ອມທີ່ເອື້ອອຳນວຍ ໃຫ້ແກ່ການສ້າງຕັ້ງທັງສອງລັດ ປາ​ແລັດ​ສະ​ຕິນ ແລະ ອິດ​ສະ​ຣາ​ແອນ ໃຫ້ຢູ່ຮ່ວມກັນໂດຍສັນຕິ ເຊິ່ງ​ໄດ້​ກຳ​ນົດ​ຢູ່ໃນ​ຍັດ​ຕິ​ຂອງ​ສະ​ພາ​ຄວາມ​ໝັ້ນ​ຄົງ ແລະ ຍັດ​ຕິ​ທີ່​ກ່ຽວ​ຂ້ອງ​ຂອງ​ອົງ​ການສະ​ຫະ​ປະ​ຊາ​ຊາດ ​ຕໍ່​ບັນ​ຫາ​ດັ່ງ​ກ່າວ.

ສ​ປ​ປ ລາວ ສະ​ແດງ​ຄວາມ​ເປັນ​ຫວ່ງ​ຢ່າງ​ຍິ່ງ ຮ່ວມ​ກັບ​ວົງ​ຄະ​ນາ​ຍາດ​ສາ​ກົນ ຕໍ່​ເຫດ​ການ​ທົດ​ລອງ​ ລະ​ເບີດ​ນິວ​ເຄຼັຍ/ໄຮ​ໂດ​ຼ​ເຈນ ຢູ່​ໃຕ້​ດິນ​ ໂດຍ ສ​ປ​ປ ເກົາ​ຫລີ ໃນ​ວັນ​ທີ 3 ກັນ​ຍາ 2017 ເຊິ່ງ​ການ​ທົດ​ລອງ​ດັ່ງ​ກ່າວ​ ເປັນ​ການຂັດ​ກັບ​ຍັດ​ຕິ​ຂອງ​ສະ​ພາ​ຄວາມ​ໝັ້ນ​ຄົງ ສ​ປຊ ແລະ ອາດ​ຈະ​ເຮັດ​ໃຫ້​ຄວາມ​ເຄັ່ງ​ຕຶງ​ໃນ​ແຫຼມ​ເກົາ​ຫລີ​ເພີ່ມ​ຂຶ້​ນ, ຮຽກ​ຮ້ອງ​ໃຫ້​ທຸກ​ຝ່າຍ​ທີ່​ກ່ຽວ​ຂ້ອງ​ໃຊ້​ຄວາມ​ອົດ​ກັ້ນ ແລະ ພະ​ຍາ​ຍາມ​ຮ່ວມ​ກັນ ເພື່ອ​ປົກ​ປັກ​ຮັກ​ສາ​ສັນ​ຕິ​ພາບ ແລະ ຄວາມ​ໝັ້ນ​ຄົງ​ໃນ​ພາກ​ພຶ້ນ ແລະ ສາ​ກົນ. ສ​ປ​ປ ລາວ ຢືນ​ຢັນ​ທັດ​ສະ​ນະ​ອັນ​ສະ​ເໝີ​ຕົ້​ນ​ສະ​ເໝີ​ປາຍ ໃນ​ການ​ສະ​ໜັບ​ສະ​ໜູນ​ໃຫ້​ແຫຼມ​ເກົາ​ຫລີ​ ມີ​​​ສັນ​ຕິ​ພາບ, ສະຖຽນ​ລະ​ພາບ ແລະ ເປັນ​ເຂດ​ປອດ​ອາ​ວຸດ​ນິວ​ເຄຼັຍ, ພ້ອມ​ທັງ​ແກ້​ໄຂ​ບັນ​ຫາ​ຂໍ້​ຄັດ​ແຍ່ງ​ໂດຍ​ສັນ​ຕິ​ວິ​ທີ ແລະ ຜ່ານ​ການ​ເຈ​ລະ​ຈາ​ແບບ​ສ້າງ​ສັນ.