ພະນະທ່ານ
ທອງລຸນ ສີສຸລິດ
ປະທານປະເທດ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ນະຄອນຫຼວງວຽງຈັນ
ພະນະທ່ານ,
ໃນນາມລັດຖະບານ, ປະຊາຊົນ ບັງກະລາເທດ ແລະ ໃນນາມສ່ວນຕົວ, ຂ້າພະເຈົ້າ ມີຄວາມຍິນດີເປັນຢ່າງຍິ່ງ ສົ່ງຄໍາຊົມເຊີຍຢ່າງຈິງໃຈ ແລະ ພອນໄຊອັນອົບອຸ່ນ ມາຍັງ ພະນະທ່ານ ແລະ ຜ່ານພະນະທ່ານ ໄປຍັງ ປະຊາຊົນເພື່ອນມິດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເນື່ອງໃນໂອກາດອັນສະຫງ່າລາສີ ສະເຫຼີມສະຫຼອງວັນຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.
ບັງກະລາເທດ ແລະ ສາທາລະນະລັດ ປະຊາທິປະໄຕ ປະຊາຊົນລາວ ມີສາຍພົວພັນມິດຕະພາບອັນອົບອຸ່ນ ບົນພື້ນຖານການເຄົາລົບເຊິ່ງກັນ ແລະ ກັນ, ມີມໍລະດົກດ້ານວັດທະນະທຳ ແລະ ເປົ້າໝາຍໃນການພັດທະນາດ້ານເສດຖະກິດ-ສັງຄົມ ຄ້າຍຄືກັນ. ຂ້າພະເຈົ້າ ເຊື່ອໝັ້ນວ່າ ສາຍພົວພັນມິດຕະພາບທີ່ມີຢູ່ແລ້ວນັ້ນ ຈະໄດ້ຮັບການສືບຕໍ່ຂະຫຍາຍຕົວຢ່າງເລິກເຊິ່ງໃນຕໍ່ໜ້າ ແລະ ກ້າວໄປສູ່ການເປັນຄູ່ຮ່ວມມືຢ່າງໃກ້ຊິດ ແລະ ການໄປມາຫາສູ່ກັນຂອງປະຊາຊົນສອງຊາດ.
ຂ້າພະເຈົ້າ ຂໍຖືໂອກາດນີ້ອວຍພອນໃຫ້ ພະນະທ່ານ ຈົ່ງມີພະລານາໄມສົມບູນ, ມີຄວາມຜາສຸກ ແລະ ມີອາຍຸຍືນຍາວ ແລະ ໃຫ້ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ສືບຕໍ່ມີຄວາມສະຫງົບ, ຄວາມກ້າວໜ້າ ແລະ ວັດທະນະຖາວອນ.
ດ້ວຍຄວາມນັບຖືຢ່າງສູງ,
ເອັມດີ. ອັບດຸລ ຮາມິດ
ປະທານາທິບໍດີ
ແຫ່ງ ສາທາລະນະລັດ ປະຊາຊົນ ບັງກະລາເທດ
ພະນະທ່ານ
ປອ. ພັນຄຳ ວິພາວັນ
ນາຍົກລັດຖະມົນຕີ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ນະຄອນຫຼວງວຽງຈັນ
ພະນະທ່ານ,
ເນື່ອງໃນໂອກາດອັນສະຫງ່າລາສີຂອງ ວັນຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ຂ້າພະເຈົ້າ ຂໍສົ່ງຄຳຊົມເຊີຍຢ່າງຈິງໃຈ ແລະ ພອນໄຊອັນອົບອຸ່ນ ມາຍັງ ພະນະທ່ານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເພື່ອນມິດ.
ບັງກະລາເທດ ແລະ ສາທາລະນະລັດ ປະຊາທິປະໄຕ ປະຊາຊົນລາວ ມີສາຍພົວພັນອັນອົບອຸ່ນ ແລະ ຈິງໃຈ. ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງທີ່ເຫັນວ່າ ສອງປະເທດຂອງພວກເຮົາ ມີສາຍພົວພັນມິດຕະພາບອັນດີເລີດ. ສອງປະເທດພວກເຮົາ ມີທ່າແຮງອັນໃຫຍ່ຫຼວງ ເພື່ອເພີ່ມທະວີສາຍພົວພັນມິດຕະພາບຂອງພວກເຮົາໃນລວງເລິກ ແລະ ກວ້າງຂວາງໃນຫຼາຍຂົງເຂດ ເພື່ອຜົນປະໂຫຍດຮ່ວມກັນ ຂອງປະຊາຊົນສອງຊາດເພື່ອນມິດພວກເຮົາ. ຂ້າພະເຈົ້າ ເຊື່ອໝັ້ນເປັນຢ່າງຍິ່ງວ່າ ສາຍພົວພັນມິດຕະພາບ ແລະ ການຮ່ວມມືອັນຍາວນານ ລະຫວ່າງສອງປະເທດພວກເຮົາ ຈະໄດ້ຮັບການຮັດແໜ້ນຍິ່ງໆຂຶ້ນໃນຕໍ່ໜ້າ.
ຂ້າພະເຈົ້າ ຂໍຖືໂອກາດນີ້ອວຍພອນໃຫ້ ພະນະທ່ານ ຈົ່ງມີພະລານາໄມສົມບູນ, ມີຄວາມຜາສຸກ, ມີຄວາມກ້າວໜ້າ ແລະ ຂໍໃຫ້ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ມີຄວາມຜາສຸກ.
ດ້ວຍຄວາມເຄົາລົບ ແລະ ນັບຖືຢ່າງສູງ,
ຊີກ ຮາຊີນາ
ນາຍົກລັດຖະມົນຕີ
ແຫ່ງ ສາທາລະນະລັດ ປະຊາຊົນ ບັງກະລາເທດ