ນະຄອນຫຼວງ​ວຽງ​ຈັນ, ວັນ​ທີ 06 ພະຈິກ 2020

ພະ​ບາດສົມ​ເດັດ,

ເນື່ອງ​ໃນ​ໂອກາດອັນ​ສະ​ຫງ່າ​ລາ​ສີແຫ່ງ ​ວັນ​ປະກາດ​ເອ​ກະລາດ ​ແຫ່ງຣາຊະ​ອານາຈັກ​ ກໍາປູ​ເຈຍຄົບຮອບ 67 ປີ,ໃນ​ນາມ​ປະຊາຊົນ​ລາວ ແລະໃນ​ນາມ​ສ່ວນ​ຕົວ, ຂ້າພະ​ເຈົ້າຂໍ​ສະ​ແດງ​ຄໍາ​ຊົມເຊີຍອັນ​ອົບອຸ່ນ ​ແລະພອນ​ໄຊ​ອັນ​ປະ​ເສີດ ມາ​ຍັງພະ​ບາດ ​ສົມ​ເດັດແລະປະຊາຊົນ ແຫ່ງ ຣາ​ຊະ​ອາ​ນາ​ຈັກ ​ກໍາປູ​ເຈຍ ທຸກ​ຖ້ວນ​ໜ້າ.

ຂ້າພະ​ເຈົ້າເຊື່ອໝັ້ນຢ່າງໜັກແໜ້ນວ່າ​​ສາຍ​ພົວພັນ​ມິດຕະພາບ, ຄວາມ​ສາມັກຄີ​ ແລະ​ ການ​ຮ່ວມ​ມື ທີ່​ມີ​ມາ​ແຕ່​ດົນ​ນານ ຖານ​ບ້ານ​ໃກ້​ເຮືອນ​ຄຽງທີ່​ດີກໍຄື ການເປັນ​ຄູ່​ຮ່ວມ​ມື​ຍຸດ​ທະ​ສາດ​ຮອບ​ດ້ານ ແລະ ໝັ້ນ​ຄົງ​ຍາວ​ນານ ລະຫວ່າງ​ ສອງ​ປະ​ເທດແລະ ​ປະຊາຊົນ​ສອງ​ຊາດ​ພວກ​ເຮົາຈະ​ສືບ​ຕໍ່ໄດ້​ຮັບ​ການ​ເສີມ​ຂະຫຍາຍແລະແໜ້ນ​ແຟ້ນ​ຍິ່ງໆ​ຂຶ້ນໃນ​ອະ​ນາ​ຄົດເພື່ອ​ຜົນ​ປະ​ໂຫຍດ​ລວມ​ຂອງ​ປະ​ຊາ​ຊົນ​ສອງ​ຊາດ​ພວກ​ເຮົາ.

ຂ້າ​ພະ​ເຈົ້າເຊື່ອໝັ້ນວ່າ ພາຍໃຕ້ ພະບໍຣົມໂພທິສົມພານ ຂອງ ພະບາດ ສົມເດັດ, ປະຊາຊົນກຳປູເຈຍທັງຊາດ ຈະສືບຕໍ່ມີຄວາມຮົ່ມເຢັນເປັນສຸກ ແລະ ມີຄວາມຈະເລີນວັດທະນະຍິ່ງໆຂຶ້ນໄປ.

ຂ້າພະເຈົ້າ ຂໍ​ສົ່ງພະ​ພອນ​ແດ່ພະ​ບາດ​ສົມ​ເດັດຊົງ​ມີ​ພະ​ລາ​ນາ​ໄມ​ສົມບູນ, ມີ​ຄວາມ​ຜາ​ສຸກ ​ແລະປະສົບຜົນສໍາເລັດໃນພາລະກິດອັນມີກຽດສູງສົ່ງຂອງພະອົງ.

ດ້ວຍ​ຄວາມ​ນັບຖື​ຢ່າງ​ສູງ,

ບຸນຍັງ ວໍລະຈິດ

ປະທານປະເທດ

ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ພະ​ບາດ ສົມ​ເດັດ ພະບໍຣົມມມະນຽດ ໂນໂຣດົມ ສີຫາໂມນີ

ພະ​ມະຫາ​ກະສັດ ​ແຫ່ງຣາຊະ​ອານາຈັກກໍາປູ​ເຈຍ

ທີ່ນະຄອນຫຼວງ​ພະນົມ​ເປັນ

ນະຄອນຫຼວງ​ວຽງ​ຈັນ, ວັນ​ທີ04ພະຈິກ 2020

ສົມ​ເດັດ,

​          ໃນ​ນາມ​ລັດຖະບານ ​ແຫ່ງສາທາລະນະ​ລັດປະຊາທິປະ​ໄຕປະຊາຊົນ​ລາວກໍຄື​ໃນ​ນາມ​ສ່ວນ​ຕົວ, ຂ້າພະ​ເຈົ້າ​ ຂໍ​ສະ​ແດງ​ຄໍາ​ຊົມ​ເຊີຍ​ອັນ​ອົບ​ອຸ່ນ ​ແລະພອນ​ໄຊ​ອັນ​ປະ​ເສີດມາ​ຍັງ​ລັດຖະບານ ​ແລະປະຊາຊົນ​ ແຫ່ງ ຣາຊະອານາຈັກ ກໍາປູ​ເຈຍທຸກ​ຖ້ວນ​ໜ້າ​ເນື່ອງ​ໃນ​ໂອກາດ ​ວັນ​ປະກາດ​ເອ​ກະລາດ ​ແຫ່ງຣາຊະ​ອານາຈັກກໍາປູ​ເຈຍຄົບຮອບ 67ປີ.

ຂ້າພະ​ເຈົ້າມີຄວາມເຊື່ອໝັ້ນຢ່າງໜັກແໜ້ນວ່າ ສາຍ​ພົວພັນ​ມິດຕະພາບ, ຄວາມ​ສາມັກຄີ ທີ່ເປັນ​ມູນ​ເຊື້ອອັນດີງາມ​ມາ​ແຕ່​ບູຮານ​ນະ​ການແລະ​ ການ​ຮ່ວມ​ມື​ຖານ​ບ້ານ​ໃກ້​ເຮືອນ​ຄຽງອັນດີງາມກໍຄື ການເປັນ​ຄູ່​ຮ່ວມ​ມື​ຍຸດ​ທະ​ສາດ​ຮອບ​ດ້ານແລະໝັ້ນ​ຄົງ​ຍາວ​ນານລະຫວ່າງ ​ສອງປະ​ເທດ​​ພວກ​ເຮົາຈະສືບຕໍ່ໄດ້ຮັບການເພີ່ມ​ພູນ​ຄູນ​ສ້າງ ແລະ ແຕກດອກອອກຜົນຍິ່ງໆຂຶ້ນໃນ​ອະນາຄົດ ເພື່ອຜົນປະໂຫຍດຮ່ວມກັນ ຂອງປະຊາຊົນສອງຊາດພວກເຮົາ ທັງເປັນການປະ ກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາ ຢູ່ໃນພາກພື້ນ ແລະ ໃນໂລກ.

ຂ້າພະເຈົ້າ ຂໍຖືໂອກາດອັນສະຫງ່າລາສີນີ້, ​ອວຍພອນ​ໃຫ້ສົມ​ເດັດຈົ່ງ​ມີ​ສຸຂະພາບ​ເຂັ້ມ​ແຂງ, ມີ​ຄວາມ​ຜາ​ສຸກ ​ແລະປະສົບ​ຜົນ​ສໍາ​ເລັດໃຫຍ່ຫຼວງກວ່າເກົ່າ​ ໃນ​ພາລະ​ກິດ​ອັນ​ສູງ​ສົ່ງ​ ຂອງ​ສົມ​ເດັດ.

ດ້ວຍ​ຄວາມ​ນັບຖື​ຢ່າງ​ສູງ,

ທອງ​ລຸນ ສີສຸລິດ

ນາຍົກລັດຖະມົນຕີ

ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ສົມ​ເດັດອັກຄະມະຫາ​ ເສນາ​ ບໍດີ ​ເຕ​ໂຈຮຸນ ​​​ແຊນ                            

ນາຍົກລັດຖະມົນຕີ ​ແຫ່ງຣາຊະ​ອານາຈັກກໍາປູ​ເຈຍ                  

ທີ່ນະຄອນຫຼວງ​ພະນົມ​ເປັນ

ນະຄອນຫຼວງ​ວຽງ​ຈັນ, ວັນ​ທີ04 ພະຈິກ 2020

ພະນະ​ທ່ານ,

        ເນື່ອງ​ໃນ​ໂອກາດ ​ວັນ​ປະກາດ​ເອ​ກະລາດ ​ແຫ່ງຣາຊະ​ອານາຈັກ​ ກໍາປູ​ເຈຍຄົບຮອບ 67 ປີ, ​​ໃນ​ນາມ​ກະຊວງ​ການ​ຕ່າງປະ​ເທດ ​ແຫ່ງສາທາລະນະ​ລັດ​ ປະຊາທິປະ​ໄຕ​ ປະຊາຊົນ​ລາວກໍ​ຄື​ໃນ​ນາມ​ສ່ວນ​ຕົວ, ຂ້າພະ​ເຈົ້າ​ ມີ​ຄວາມຍິນ​ດີ​ເປັນ​ຢ່າງ​ຍິ່ງສົ່ງ​ຄໍາຊົມ​ເຊີຍ​ອັນ​ອົບ​ອຸ່ນແລະພອນ​ໄຊ​ອັນ​ປະ​ເສີດມາ​ຍັງ​ ພະນະ​ທ່ານແລະຜ່ານ ​ພະນະ​ທ່ານ ​ໄປ​ຍັງ​ພະນັກງານກະຊວງ​ການ​ຕ່າງປະ​ເທດ ​ແລະຮ່ວມ​ມື​ສາກົນ ​ແຫ່ງຣາຊະ​ອານາຈັກກໍາປູ​ເຈຍທຸກ​ຖ້ວນ​ໜ້າ.

        ຂ້າພະ​ເຈົ້າ ​ເຊື່ອ​ໝັ້ນ​ວ່າສາຍ​ພົວພັນ​ມິດຕະພາບ, ຄວາມ​ສາມັກຄີ​​ ແລະ ການຮ່ວມມື ທີ່ມີມາແຕ່ດົນນານ ຖານບ້ານໃກ້ເຮືອນຄຽງທີ່ດີ​​ແລະ ການເປັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງ ​ສອງ​ປະ​ເທດກໍ​ຄືສອງ​ກະຊວງ​ການ​ຕ່າງປະ​ເທດ​ ຂອງ​ພວກ​ເຮົາຈະ​ສືບ​ຕໍ່ໄດ້ຮັບການ​ຮັດ​ແໜ້ນ ​ແລະ ​ເສີມຂະຫຍາຍ​ຢ່າງ​ບໍ່​ຢຸດ​ຢັ້ງ ​ເພື່ອ​​ຜົນ​ປະ​ໂຫຍ​ດລວມຂອງສອງປະເທດ ກໍ​ຄື ຄວາມເຂັ້ມແຂງຂອງ​​ຄອບຄົວ​ອາ​ຊຽນ.

        ຂ້າພະ​ເຈົ້າຂໍ​ຖື​ໂອກາດ​ອັນ​ສະຫງ່າ​ລາສີ​ນີ້​ ອວຍພອນ​ໃຫ້ ​ພະນະ​ທ່ານພ້ອມ​ດ້ວຍ​ພະນັກງານ​ກະຊວງ​ການ​ຕ່າງປະ​ເທດ ​ແລະຮ່ວມ​ມື​ສາກົນ ​​ແຫ່ງຣາຊະ​ອານ​າຈັກ​ກໍາປູ​ເຈຍຈົ່ງ​ມີ​ສຸຂະພາບເຂັ້ມແຂງແລະປະສົບ​ຜົນ​ສໍາ​ເລັດ​ໃນ​ພາລະ​ກິດ​ອັນ​ສູງ​ສົ່ງ​ ຂອງ​ຕົນ.

        ດ້ວຍ​ຄວາມ​ນັບຖື​ຢ່າງ​ສູງ,

   ສະເຫຼີມໄຊ ກົມມະສິດ

   ລັດຖະມົນຕີກະຊວງການຕ່າງປະເທດ

   ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ພະນະ​ທ່ານ ປຣາກ ໂຊຄົນ,                                              

ຮອງນາຍົກລັດຖະມົນຕີ,                           

ລັດຖະມົນຕີ​ກະຊວງ​ການ​ຕ່າງປະ​ເທດແລະຮ່ວມ​ມື​ສາກົນ ​

ແຫ່ງຣາຊະ​ອານາຈັກກໍາປູ​ເຈຍ

ທີ່ນະຄອນຫຼວງ​ພະນົມ​ເປັນ