ນະຄອນຫຼວງວຽງຈັນ, ວັນທີ 01 ກໍລະກົດ 2016
ພະນະທ່ານ Binali Yildirim,
ນາຍົກລັດຖະມົນຕີ ແຫ່ງ ສາທາລະນະລັດ ຕວກກີ
ທີ່ ອັງຄະລາ
ພວກຂ້າພະເຈົ້າ ໄດ້ຮັບຊາບຂ່າວດ້ວຍຄວາມເສົ້າໂສກ ກ່ຽວກັບ ເຫດການສະຫຍອງຂວັນທີ່ເກີດຂຶ້ນ ຈາກການກະທຳທີ່ໂຫດຮ້າຍປ່າເຖື່ອນ ຕໍ່ກັບເຫດການວາງລະເບີດໂດຍກຸ່ມກໍ່ການຮ້າຍ ຢູ່ສະໜາມບິນ Istanbul Ataturk, ທີ່ ອິສສະຕັນບູລ, ໃນວັນທີ 29 ມິຖຸນາ 2016 ຊຶ່ງເຮັດໃຫ້ມີຜູ້ເສຍຊີວິດ ແລະ ຖືກບາດເຈັບເປັນຈຳນວນຫຼວງຫຼາຍ.
ໃນນາມລັດຖະບານແລະປະຊາຊົນແຫ່ງສາທາລະນະລັດປະຊາທິປະໄຕປະຊາຊົນລາວ, ຂ້າພະເຈົ້າຂໍສະແດງຄວາມເສົ້າສະຫຼົດໃຈ ແລະ ສະແດງຄວາມເຫັນໃຈຢ່າງສຸດຊຶ້ງມາຍັງລັດຖະບານ ແລະ ປະຊາຊົນແຫ່ງສາທາລະນະລັດຕວກກີ ກໍຄືຕໍ່ຄອບຄົວຂອງຜູ້ທີ່ໄດ້ຮັບເຄາະຮ້າຍ ຈາກເຫດການກະທຳອັນຮຸນແຮງດັ່ງກ່າວ.
ສປປ ລາວ ຂໍກ່າວປະນາມຢ່າງແຂງແຮງ ຕໍ່ການກະທຳຂອງກຸ່ມກໍ່ການຮ້າຍຕໍ່ການວາງລະເບີດ ທີ່ ເມືອງອິສສະຕານບູລ ໂດຍມີຈຸດປະສົງແນໃສ່ປະຊາຊົນເປັນຕົ້ນຕໍ. ພ້ອມທັງກຽມພ້ອມໃຫ້ການຮ່ວມມືກັບວົງຄະນາຍາດສາກົນ ໃນການຕໍ່ສູ້ຕ້ານລັດທິກໍ່ການຮ້າຍໃນທຸກຮູບແບບ.
ທອງລຸນ ສີສຸລິດ
ນາຍົກລັດຖະມົນຕີ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ