ພະນະທ່ານ,

          ເນື່ອງ​ໃນ​ໂອກາດວັນ​ສ້າງ​ຕັ້ງ​ສາຍ​ພົວພັນ​ການ​ທູດ ລະຫວ່າງ ສາທາລະນະ​ລັດ ປະຊາທິປະ​ໄຕ ປະຊາຊົນລາວ ແລະ ມາເລເຊຍ ຄົບຮອບ 50ປີ,​ ໃນ​ນາມ​ລັດຖະບານແລະ​ ປະຊາຊົນແຫ່ງສາທາລະນະ​ລັດປະຊາທິປະ​ໄຕປະຊາຊົນ​ລາວ   ກໍຄືໃນ​ນາມ​ສ່ວນ​ຕົວ, ຂ້າ​ພະ​ເຈົ້າຂໍ​ສົ່ງ​ຄໍາ​ຊົມ​ເຊີຍ​ອັນ​ອົບ​ອຸ່ນ ​ແລະ ພອນ​ໄຊ​ອັນ​ປະ​ເສີດ​ມາ​ຍັງ ພະນະທ່ານ ແລະ ຜ່ານພະນະທ່ານ​ໄປ​ຍັງ​ລັດຖະບານ ​ແລະ ປະຊາຊົນມາເລເຊຍ ທຸກ​ຖ້ວນ​ໜ້າ.

         ຂ້າ​ພະ​ເຈົ້າ ​​ມີ​ຄວາມ​ປິ​ຕິ​ຍິນ​ດີ ​ເປັນ​ຢ່າງ​ຍິ່ງ​ທີ່​ເຫັນ​ວ່າ ຕະຫຼອດ​ໄລຍະ 50ປີ, ສາຍ​ພົວພັນ​ມິດຕະພາບ​ອັນ​ເປັນ​ມູນ​ເຊື້ອ ແລະ ການ​ຮ່ວມ​ມື ລະຫວ່າງ​ສອງ​ປະ​ເທດພວກ​ເຮົາ ​ໄດ້​ຮັບ​ການ​ຂະຫຍາຍຕົວຢ່າງ​ບໍ່​ຢຸດ​ຢັ້ງ. ຂ້າພະ​ເຈົ້າເຊື່ອ​ໝັ້ນ​ຢ່າງ​ໜັກ​ແໜ້ນວ່າ ດ້ວຍ​ການ​ຮ່ວມ​ມື​ກັນ​ຢ່າງ​ໃກ້ຊິດ​ຂອງ​ສອງ​ຝ່າຍ, ສາຍ​ພົວພັນ​ອັນ​ເປັນ​ມູນ​ເຊື້ອ​ທີ່ດີງາມ​ດັ່ງກ່າວ ຈະນັບ​ມື້​ນັບ​ໄດ້​ຮັບ​ການຂະຫຍາຍຕົວຍິ່ງໆ​ຂຶ້ນ ເພື່ອ​ຜົນ​ປະ​ໂຫຍ​ດລວມຂອງສອງປະເທດ ແລະ ​ປະຊາຊົນ​ສອງ​ຊາດ​ພວກ​ເຮົາ ກໍ​ຄື​​ ເພື່ອສັນ​ຕິ​ພາບ, ສະຖຽນ​ລະ​ພາບ ​ແລະ ການ​ຮ່ວມ​ມື ​ເພື່ອ​ການພັດທະນາໃນພາກ​ພື້ນ ​ແລະ ​ໃນ​ໂລກ.

​ໃນໂອກາດອັນສະຫງ່າລາສີ ແລະ ​ມີ​ຄວາມ​ໝາຍສຳຄັນຍິ່ງນີ້, ຂ້າພະ​ເຈົ້າຂໍ​ອວຍ​ພອນໃຫ້ສາຍ​ພົວພັນ​ມິດຕະພາບ ອັນເປັນມູນເຊື້ອ ​ແລະ ການ​ຮ່ວມ​ມື​ອັນ​ແໜ້ນ​ແຟ້ນ ລະຫວ່າງ​ສອງ​ປະ​ເທດພວກ​ເຮົາ ຈົ່ງ​ໝັ້ນຄົງ​ຂະໜົງແກ່ນ ແລະ ແຕກດອກອອກຜົນຍິ່ງໆຂຶ້ນ ​ແລະ ຂໍ​ອວຍພອນ​ໃຫ້ ພະນະທ່ານ ຈົ່ງ​ມີ​ພະ​ລາ​ນາ​ໄມ​ສົມບູນ, ມີ​ຄວາມ​ຜາ​ສຸກແລະໄດ້​ຮັບ​ຜົນ​ສຳ​ເລັດ​ອັນ​​ໃຫຍ່​ຫຼວງໃນ​ພາລະກິດ ອັນ​ສູງ​ສົ່ງ​ຂອງພະນະທ່ານ.

                                                                                   ດ້ວຍຄວາມນັບຖືຢ່າງສູງ

                                                                                        ທອງລຸນ ສີສຸລິດ

ພະນະທ່ານ ດາໂຕະ ສຣິ ນາຈິບ ຕຸນ ອັບດູນ ຣາຊັກ                                

ນາຍົກລັດຖະມົນຕີ ​ແຫ່ງມາເລເຊຍ         

ທີ່ນະຄອນຫຼວງ​ກົວລາລຳເປີ

----------------------------------------------------------------------------------------------------------------------------------------------

ພະນະ​ທ່ານ,

          ​ເນື່ອງ​ໃນ​ໂອກ​າດ ວັນ​ສ້າງ​ຕັ້ງ​ສາຍ​ພົວພັນ​ການ​ທູດລະຫວ່າງສາທາລະນະ​ລັດປະຊາທິປະ​ໄຕປະຊາຊົນລາວແລະມາເລເຊຍຄົບຮອບ50ປີ, ຂ້າພະ​ເຈົ້າຕາງໜ້າ​ໃຫ້​ຄະນະ​ນໍາ ​ແລະພະນັກງານ​ກະຊວງ​ການ​ຕ່າງປະ​ເທດ ​ແຫ່ງສປປລາວຂໍ​ສົ່ງ​ຄໍາ​ຊົມ​ເຊີຍ​ອັນ​ອົບ​ອຸ່ນ ​ແລະພອນ​ໄຊ​ອັນ​ປະ​ເສີດ​ມາ​ຍັງພະນະ​ທ່ານ ​ແລະ ​ໂດຍ​ຜ່ານ​ພະນະທ່ານ ​ໄປ​ຍັງ​ຄະນະ​ນໍາ ​ແລະພະນັກງານ​ກະຊວງ​ການ​ຕ່າງປະ​ເທດກໍ່ຄືປະຊາຊົນ ມາເລເຊຍທຸກ​ຖ້ວນ​ໜ້າ.

ຂ້າພະເຈົ້າຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືຢ່າງໃກ້ຊິດ ລະຫວ່າງສອງປະເທດ ກໍຄືສອງກະ ຊວງການຕ່າງປະເທດເຮົາ ທີ່ໄດ້ເຕີບໃຫ່ຍຂະຫຍາຍຕົວກວ້າງຂວາງຂຶ້ນຢ່າງບໍ່ຢຸດຢັ້ງ ຕະຫຼອດໄລຍະ 50 ປີທີ່ຜ່ານມາ.ຂ້າພະເຈົ້າເຊື່ອໝັ້ນວ່າ ການພົວພັນຮ່ວມມື ແລະ ເຮັດວຽກຮ່ວມກັນຢ່າງໃກ້ຊິດຂອງພວກເຮົາ ຈະສືບຕໍ່ຮັດແໜ້ນ ແລະເຂັ້ມແຂງຍິ່ງໆຂຶ້ນ ເພື່ອ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດລາວ ແລະ ມາເລເຊຍ ກໍ່ຄືສັນຕິພາບ ແລະ ສະຖຽນລະພາບ ໃນພາກພື້ນ ແລະ ສາກົນ.

          ອີກເທື່ອໜຶ່ງ, ຂ້າພະ​ເຈົ້າຂໍ​ຖື​ໂອກາດ​ອັນສະຫງ່າລາສີນີ້ອວຍພອນ​ແດ່ພະນະ​ທ່ານ, ຄະນະນຳພ້ອມ​ດ້ວຍ​ພະນັກງານ​ລັດຖະກອນກະຊວງ​ການ​ຕ່າງປະ​ເທດ ແລະ ປະຊາຊົນມາເລເຊຍທຸກ​ຖ້ວນ​ໜ້າຈົ່ງ​ມີ​ສຸຂະພາບ​ເຂັ້ມ​ແຂງ, ມີຄວາມຜາສຸກ ​ແລະສືບຕໍ່ໄດ້ຮັບ​ຜົນ​ສໍາ​ເລັດ​ໃນ​ໜ້າ​ທີ່​ວຽກ​ງານ ​ທີ່​ມີ​ກຽດ​ອັນ​ສູງ​ສົ່ງ​ຂອງ​ຕົນ.

                                                                                       ດ້ວຍ​ຄວາມ​ນັບຖື​ຢ່າງ​ສູງ,

                                                                                        ສະເຫຼີມໄຊ ກົມມະສິດ

ພະນະ​ທ່ານດາໂຕະ ສິຣິ ອານິຟາ ອາມານ                                         

ລັດຖະມົນຕີ​ກະຊວງ​ການ​ຕ່າງປະ​ເທດ ​ແຫ່ງມາເລເຊຍ

ທີ່ນະຄອນຫຼວງ​ກົວລາລຳເປີ