ໃນວັນທີ 28 ຕຸລາ 2016, ກະຊວງການຕ່າງປະເທດໄດ້ຈັດກອງປະຊຸມເຜີຍແຜ່ ​ແລະ ຜັນ​ຂະຫຍາຍຜົນສໍາເລັດຂອງການເປັນປະທານອາຊຽນຂອງສປປລາວ ໃນປີ 2016, ​ໂດຍ​ສະ​ເພາະ ຜົນ​ຂອງ​ກອງ​ປະຊຸມ​ສຸດ​ຍອດອາຊຽນ ຄັ້ງ​ທີ 28 ​ແລະ 29 ​ແລະ ກອງ​ປະຊຸມ​ສຸດ​ຍອກ​ອື່ນໆທີ່​ກ່ຽວຂ້ອງ ຊຶ່ງ​ຈັດ​ຂຶ້ນ​ໃນ​ວັນ​ທີ 6-8 ກັນຍາ 2016 ໃຫ້ບັນດາແຂວງພາກເໜືອທີ່ໂຮງແຮມຫຼວງພະບາງວິວ, ແຂວງຫຼວງພະບາງ, ໂດຍການໃຫ້ກຽດເປັນປະທານຮ່ວມຂອງ ທ່ານ ອາລຸນແກ້ວ ກິດຕິຄຸນ, ລັດຖະມົນຕີປະຈໍາສໍານັກງານນາຍົກລັດຖະມົນຕີ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ແລະ ມີນັກວິທະຍາກອນ 2 ທ່ານ ຊຶ່ງແມ່ນຫົວໜ້າເຈົ້າໜ້າທີ່ອາວຸໂສເສົາຄ້ຳປະຊາຄົມເສດຖະກິດອາຊຽນ ແລະ ຫົວໜ້າເຈົ້າໜ້າທີ່ອາວຸໂສເສົາຄ້ຳປະຊາຄົມວັດທະນະທຳ-ສັງຄົມອາຊຽນ. ສໍາລັບຜູ້ເຂົ້າຮ່ວມແມ່ນບັນດາຜູ້ຕາງໜ້າຈາກ 9 ແຂວງພາກເໜືອ ລວມທັງໝົດຈໍານວນ 150 ທ່ານ.

ຈຸດປະສົງຂອງການຈັດກອງປະຊຸມຄັ້ງນີ້ ແມ່ນເພື່ອເຜີຍແຜ່ຜົນສໍາເລັດຂອງການເປັນປະທານອາຊຽນ ຂອງ ສປປ ລາວ ໃນປີ 2016 ພາຍໃຕ້ຄໍາຂວັນ“ຫັນວິໄສທັດໃຫ້ເປັນຮູບປະທໍາ ເພື່ອຄວາມເຂັມແຂງຂອງປະຊາຄົມອາຊຽນ” ໂດຍສະເພາະແມ່ນເນື້ອໃນຂອງບັນດາເອກະສານທີ່ຜູ້ນໍາອາຊຽນ ແລະ ອາຊຽນກັບຄູ່ເຈລະຈາ ໄດ້ລົງນາມ, ຮັບຮອງເອົາ ແລະ ຮັບຊາບ ໃນກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ, ລວມມີ 57 ສະບັບ ໃນນັ້ນອັນສຳຄັນແມ່ນບັນດາເອກະສານເພື່ອຈັດຕັ້ງຜັນຂະຫຍາຍ 8 ບູລິມະສິດຂອງການເປັນປະທານອາຊຽນຂອງ ສປປ ລາວ ໃນປີ 2016 ເຊັ່ນ: ແຜນແມ່ບົດວ່າດ້ວຍການເຊື່ອມຈອດອາຊຽນ 2025 ແລະ ແຜນງານ ສໍາລັບ ຂໍ້ລິເລີ່ມເພື່ອການເຊື່ອມໂຍງອາຊຽນ ສະບັບທີ 3, ບັນດາຂອບວຽກທີ່ກ່ຽວຂ້ອງກັບການສົ່ງເສີມວິສະຫະກິດຈຸນລະ, ຂະໜາດນ້ອຍ ແລະ ກາງ, ການອໍານວຍຄວາມສະດວກດ້ານການຄ້າ; ການທ່ອງທ່ຽວ; ການສົ່ງເສີມວຽກເຮັດງານທໍາ; ການປົກປັກຮັກສາ ແລະ ສົ່ງເສີມມໍລະດົກທາງວັດທະນະທໍາ ແລະ ເອກະສານອື່ນໆ.

ໃນໂອກາດດັ່ງກ່າວນີ້, ຜູ້ຕາງໜ້າຈາກບັນດາແຂວງພາກເໜືອ ກໍໄດ້ຂື້ນແຈ້ງສະພາບດ້ານການຄ້າ ແລະ ການລົງທຶນ, ລວມທັງການຕີລາຄາຂໍ້ສະດວກ ແລະ ສິ່ງທ້າທາຍຕ່າງໆ ຢູ່ພາຍໃນແຂວງຂອງຕົນ, ຊຶ່ງກອງປະຊຸມ ກໍໄດ້ມີການປຶກສາຫາລື ແລະ ແລກປ່ຽນຄຳຄິດເຫັນຕໍ່ກັບແຕ່ລະບັນຫາ ຢ່າງກົງໄປກົງມາ. ນອກຈາກນີ້, ກອງປະຊຸມ ຍັງໄດ້ຊຸກຍູ້ໃຫ້ບັນດາແຂວງພາກເໜືອນຳເອົາເນື້ອໃນຈິດໃຈຂອງບັນດາເອກະສານທີ່ກ່າວມາຂ້າງເທິງ ໄປຈັດຕັ້ງຜັນຂະຫຍາຍຕາມພາລະບົດບາດ ແລະ ໜ້າວຽກທີ່ຕົນຮັບຜິດຊອບ ແນໃສ່ເພື່ອເສີມຂະຫຍາຍຜົນຂອງການເປັນປະທານອາຊຽນຂອງ ສປປ ລາວ ໃນປີ 2016 ທີ່ໄດ້ຮັບຜົນສໍາເລັດຢ່າງຈົບງາມນັ້ນ ໃຫ້ເກີດດອກອອກຜົນ ແລະ ນໍາຜົນປະໂຫຍດອັນສູງສຸດມາໃຫ້ແກ່ ສປປ ລາວ.