ໃນວັນທີ 12 ສິງຫາ 2016, ສປປ ລາວ ໃນນາມປະທານອາຊຽນ ໄດ້ເປັນເຈົ້າພາບ ແລະ ປະທານກອງປະຊຸມປຶກສາຫາລືຮ່ວມ ທີ່ ໂຮງແຮມລາວພລາຊາ, ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ອາລຸນແກ້ວ ກິດຕິຄຸນ, ລັດຖະມົນຕີປະຈຳສຳນັກງານ​ນາຍົກລັດຖະມົນຕີ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໂດຍມີຫົວໜ້າເຈົ້າຫນ້າທີ່ອາວຸໂສຈາກປະເທດສະມາຊິກອາຊຽນ, ບັນດາເຈົ້າໜ້າທີ່ອາວຸໂສເສົາຄ້ຳປະຊາຄົມເສດຖະກິດອາຊຽນ ແລະ ປະຊາ​ຄົມວັດທະນະທຳ-ສັງຄົມອາຊຽນ, ບັນດາຮອງເລຂາທິການໃຫຍ່ອາຊຽນຮັບຜິດຊອບສາມເສົາຄໍ້າປະຊາ​ຄົມ​ອາຊຽນ, ບັນດາຜູ້ຕາງໜ້າຖາວອນປະຈຳ​ອາຊຽນ ພ້ອມດ້ວຍຄະນະຜູ້ແທນເຂົ້າຮ່ວມ.

ກອງປະຊຸມປຶກສາຫາລືຮ່ວມ ໃນຄັ້ງນີ້ ໄດ້ປຶກສາຫາລື ກ່ຽວກັບ ​ການ​ກະກຽມ​ໃຫ້​ແກ່ກອງປະຊຸມສຸດຍອດອາຊຽນ ຄັ້ງທີ 28 ແລະ 29, ກອງປະຊຸມສຸດຍອດອາຊຽນ-ຈີນ ເພື່ອສະເຫຼີມສະຫລອງຄົບຮອບ 25 ປີ, ກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 19, ກອງປະຊູມສຸດຍອດອາຊຽນ-ສ ເກົາຫລີ ຄັ້ງທີ 18, ກອງປະຊຸມສຸດຍອດອາຊຽນ-ບວກສາມ ຄັ້ງທີ 19, ກອງປະຊຸມສຸດຍອດອາຊຽນ-ອົດສະຕຣາລີ ຄັ້ງທຳອິດ, ກອງປະຊຸມສຸດຍອດອາຊຽນ-ສະຫະປະຊາຊາດ ຄັ້ງທີ 8, ກອງປະຊຸມສຸດຍອດອາຊຽນ-ອິນເດຍ ຄັ້ງທີ 14, ກອງປະຊຸມສຸດຍອດອາຊຽນ-ສະຫະລັດ ອາເມລິກາ ຄັ້ງທີ 4 ແລະ ກອງປະຊຸມສຸດຍອດອາຊຽນ-ຊີຕາເວັນອອກ ຄັ້ງທີ 11. ກອງ​ປະຊຸມ ​ໄດ້​ຜ່ານ​ແຜນການ​ເຄື່ອນ​ໄຫວ ແລະ ວາລະ​ກອງ​ປະຊຸມ ຂອງ​ກອງ​ປະຊຸມ​ສຸດ​ຍອດອາຊຽນ ຄັ້ງທີ 28 ແລະ 29 ​ແລະ ບັນດາ​ກອງ​ປະຊຸມ​ສຸດ​ຍອດ​ທີ່​ກ່ຽວຂ້ອງ.

ນອກນັ້ນ, ກອງປະຊຸມຍັງໄດ້ຮັບຮອງ​ເອົາ​ບັນຊີ​ເອກະສານ​ທີ່​ຜູ້ນຳ​ຈະ​ຮັບ​ຮອງ​ເອົາ​​ໃນ​ໂອກາດ​ບັນດາ​ກອງ​ປະຊຸມ​ສຸດ​ຍອດ​ຄັ້ງນີ້, ​ໂດຍ​ສະ​ເພາະ​ແມ່ນ ແຜນແມ່ບົດ ວ່າ​ດ້ວຍ ການເຊື່ອມຈອດອາຊຽນ 2025 ແລະ ແຜນວຽກຂໍ້ລິເລີ່ມການເຊື່ອມຈອດອາຊຽນ ໄລຍະ 3.