ຕອນ​ບ່າຍວັນທີ 08 ຕຸລາ 2021, ທ່ານ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ທີ່ ນະຄອນຫຼວງຮ່າໂນ້ຍ ໄດ້ຕ້ອນຮັບການເຂົ້າຍື່ນສານຕາຕັ້ງຂອງທ່ານ ​ເຍີ​ລານ ບາຍ​ຊານ​ອບ (Mr. Yerlan BAIZHANOV) ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ກາ​ຊັກ​ສະຖານ ປະຈໍາ ສາທາລະນະລັດ ປະຊາທິປະໄຕ ປະຊາຊົນລາວ, ໂດຍມີສຳນັກງານຕັ້ງຢູ່ ນະຄອນຫຼວງຮ່າໂນ້ຍ, ສສ ຫວຽດນາມ.

ວັນທີ 08 ​ຕຸ​ລາ 2021 ທີ່​ຫ້ອງ​ຮັບ​ແຂກ ກະຊວງປ້ອງກັນປະເທດ ແຫ່ງ ສສ ຫວຽດນາມ  ​ໄດ້​ມີ​ພິທີ​ມອບ-​ຮັບເຄື່ອງ​ຊ່ວຍເຫຼືອອຸ​ປະ​ກອນ​ການ​ແພດຈາກກະຊວງປ້ອງກັນປະເທດ ແຫ່ງ ສສ ຫວຽດນາມມອບໃຫ້ ກະຊວງປ້ອງກັນປະເທດ ແຫ່ງ ສປປ ລາວ​ ​ໃຫ້​ກຽດ​ມອບ​ໂດຍ ສະ​ຫາຍ ພົນ​ໂທ ຮ່​ວງ ຊວນ ຈຽນ, ຮອງ​ລັດ​ຖະ​ມົນ​ຕີ ກະ​ຊວງ​ປ້ອງ​ກັນ​ປະ​ເທດ ແຫ່ງ ສ​ສ ຫວຽດ​ນາມ ແລະ ຕາງ​ໜ້າ​ໃຫ້​ກະ​ຊວງ​ປ້ອງ​ກັນ​ປ​ະ​ເທດ ແຫ່ງ ສ​ປ​ປ ລາວ ຮັບ​ເອົາ​ໂດຍ​ສະ​ຫາຍ ແສງເພັດ ຮ່ວງ​ບຸນຍວງ, ເອກ​ອັກ​ຄະ​ລັດ​ຖະ​ທູດ​ວິ​ສາ​ມັ​ນ​ຜູ້​ມີ​ອຳ​ນາດ​ເຕັມ ແຫ່ງ ສ​ປ​ປ ລາວ ປະ​ຈຳ ສ​ສ ຫວຽດ​ນາ​ມ ໂດຍ​ການ​ເຂົ້າ​ຮ່ວມ​ເປັນ​ສັກ​ຂີ​ພິ​ຍານ​ຂອງ​ພະ​ນັກ​ງານ​ທັງ​ສອງ​ຝ່າຍ​ ລາວ - ຫວຽດ​ນາມ.

ໃນຕອນເຊົ້າຂອງວັນທີ 11 ຕຸລາ 2021, ໄດ້ມີພິທີມອບຮັບເຄື່ອງຊ່ວຍເຫຼືອປ້ອງກັນໂຄວິດ-19 ຢູ່ທີ່ກະຊວງການຕ່າງປະເທດ, ຊຶ່ງຕາງໜ້າໃຫ້ກະຊວງການຕ່າງປະເທດ ມອບເຄື່ອງຊ່ວຍເຫຼືອໃຫ້ແກ່ ໂຮງຫມໍເດັກ ໃນຄັ້ງນີ້, ໂດຍແມ່ນ ທ່ານ ສຸຂັນໄຊ ອັກຄະວົງ, ຮອງຫົວຫນ້າຫ້ອງການກະຊວງການຕ່າງປະເທດ, ຊຶ່ງປະກອບມີຄື: ຊຸດປ້ອງກັນພະຍາດໂຄວິດ-19 (ຊຸດ PPE) ຈຳນວນ 400 ຜືນ ແລະ ຜ້າອັດປາກ ຈຳນວນ 25.000 ອັນ. ພ້ອມດຽວກັນນີ້, ທ່ານ ອຸດຕະມະ ສິດທິພົງ, ຮອງຫົວຫນ້າຫ້ອງການກະຊວງ ກໍ່ໄດ້ຕາງໜ້າໃຫ້ກະຊວງການຕ່າງປະເທດ ມອບເຄື່ອງຊ່ວຍເຫຼືອໃຫ້ພາກສ່ວນໜ່ວຍກູ້ໄພສະມາຄົມຊ່ວຍເຫຼືອ ແລະ ບັນເທົາທຸກ ນະຄອນຫຼວງ, ປະກອບມີຄື: ຊຸດປ້ອງກັນພະຍາດໂຄວິດ-19 (ຊຸດ PPE) ຈຳນວນ 400 ຜືນ ແລະ ຜ້າອັດປາກ ຈຳນວນ 25.000 ອັນ, ທັງນີ້ກໍ່ເພື່ອເປັນການປະກອບສ່ວນເຂົ້າໃນວຽກງານ ປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ.