ໃນຕອນເຊົ້າ ຂອງ ວັນທີ 04 ທັນວາ 2023, ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ທີ່ ນະຄອນ ຫຼວງ ແບກແລງ, ປະເທດ ເຢຍລະມັນ, ທ່ານ ໄມບົວ ໄຊຍະວົງ ໄດ້ຍື່ນສານຕາຕັ້ງຕໍ່ ພະນະທ່ານ Klaus Iohannis, ປະທານາທິບໍດີ ຣູມານີ ໂດຍມອບສໍາເນົາສານຜ່ານ ທ່ານ Traian Laurențiu Hristea, ຮອງລັດຖະມົນຕີ ກະຊວງການຕ່າງປະເທດ ຣູມານີ ຜ່ານກອງປະຊຸມທາງໄກ (ອອນລາຍ) ເພື່ອດຳລົງຕຳແໜ່ງເປັນ ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ຣູມານີ, ຊຶ່ງມີ ສຳນັກງານຕັ້ງຢູ່ ນະຄອນຫຼວງ ແບກແລງ, ສາທາລະນະລັດ ສະຫະພັນ ເຢຍລະມັນ.
ໃນໂອກາດດັ່ງກ່າວ, ທ່ານ Traian Laurențiu Hristea, ໄດ້ສະແດງຄວາມຍິນດີ ແລະ ຊົມເຊີຍ ທ່ານ ໄມບົວ ໄຊຍະວົງ ທີ່ໄດ້ຮັບການແຕ່ງຕັ້ງ ໃຫ້ດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ຄົນໃໝ່ ປະຈຳ ຣູມານີ, ເຊິ່ງເປັນການປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນ ແລະ ການຮ່ວມມືທີ່ດີ ລະຫວ່າງສອງປະເທດ ໃຫ້ສືບຕໍ່ຂະຫຍາຍຕົວຍິ່ງຂຶ້ນ, ພ້ອມທັງ ອວຍພອນທ່ານເອກອັກຄະລັດຖະທູດ ປະສົບຜົນສຳເລັດໃນການປະຕິບັດໜ້າທີ່ວຽກງານອັນມີກຽດຂອງຕົນ ຢູ່ ຣູມານີ ແລະ ປະເທດ ທີ່ຮັບຜິດຊອບ.
ທ່ານເອກອັກຄະລັດຖະທູດ ໄດ້ສະແດງຄວາມຂອບໃຈ ຕໍ່ຄໍາເວົ້າອັນຈົບງາມ ແລະ ໄດ້ຕີລາຄາສູງຕໍ່ການພົວພັນ ທີ່ມີມູນເຊື້ອອັນດີງາມມາແຕ່ດົນນານ ລະຫວ່າງ ສປປ ລາວ ແລະ ຣູມານີ ນັບແຕ່ສ້າງຕັ້ງສາຍພົວພັນການທູດນໍາກັນ ໃນປີ 1962 ເປັນຕົ້ນມາ. ພ້ອມກັນນັ້ນ, ທ່ານທູດ ກໍໄດ້ຕາງໜ້າໃຫ້ລັດຖະບານລາວ ສະແດງຄວາມຂອບໃຈຢ່າງຈິງໃຈ ມາຍັງ ລັດຖະບານ ແລະ ປະຊາຊົນ ຣູມານີ ທີ່ໄດ້ໃຫ້ການຊ່ວຍເຫຼືອ ແກ່ ສປປ ລາວ ໃນໄລຍະຜ່ານມາ ເປັນຕົ້ນແມ່ນ ການສຶກສາ, ການສະໜັບສະໜູນເຊິ່ງກັນ ແລະ ກັນ ໃນເວທີສາກົນ ແລະ ອື່ນໆ, ພ້ອມທັງໄດ້ແລກປ່ຽນຂໍ້ມູນ ແລະ ທ່າແຮງ ເພື່ອຊຸກຍູ້ ແລະ ສົ່ງເສີມການພົວພັນ ແລະ ຮ່ວມມືໃນຂະແໜງການຄ້າ, ການລົງທຶນ, ສຶກສາ, ກະສິກໍາ, ສາທາລະນະສຸກ ແລະ ອຶ່ນໆ ໃນອະນາຄົດ ລະຫວ່າງ ສອງປະເທດ ລາວ-ຣູມານີ ແລະ ໃນຂອບອາຊຽນ-ອີຢູ ໃຫ້ຂະຫຍາຍຄົວຫຍິ່ງໆຂື້ນ.
ໃນໂອກາດດຽວກັນນີ້, ທ່ານເອກອັກຄະລັດຖະທູດ ໄດ້ອວຍພອນໄຊອັນປະເສີດ ໃຫ້ທ່ານຮອງລັດຖະມົນຕີ ພ້ອມດ້ວຍພະນັກງານ ແລະ ຄອບຄົວ ມີພາລານາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດ ທຸກປະການ ໃນໜ້າທີ່ອັນສູງສົ່ງຂອງທ່ານ.