ເພື່ອເປັນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ສົ່ງເສີມການຮ່ວມມືກັບບັນດາປະເທດເພື່ອນມິດພາຍໃຕ້ການຍຶດໝັ້ນນະໂຍບາຍການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື, ໃນຕອນບ່າຍຂອງວັນທີ 28 ຕຸລາ 2023 ທີ່ຜ່ານມາ, ທ່ານ ດວງມະນີ ຍອດສີອຸດົມ, ເອກອັກຄະລັດຖະທູດແຕ່ງຕັ້ງ, ໄດ້ເຂົ້າຢ້ຽມຂໍ່ານັບພະນະທ່ານໄມເຄິລ ຮິກກິນສ໌ (Michael D. Higgins), ປະທານາທິບໍດີ ແຫ່ງອຽກລັງ, ທີ່ສໍານັກງານປະທານາທິບໍດີ, ນະຄອນຫລວງດັບບິຼນ, ເພື່ອຍື່ນສານຕາຕັ້ງຂອງພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສາທາລະນະລັດປະຊາທິປະໄຕ ປະຊາຊົນຊົນລາວ, ທີ່ແຕ່ງຕັ້ງທ່ານ ດວງມະນີ ຍອດສີອຸດົມ, ໃຫ້ດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ອຽກລັງ, ເຊິ່ງມີສໍານັກງານຕັ້ງຢູ່ນະຄອນຫຼວງ ລອນດອນ.
ໃນໂອກາດດັ່ງກ່າວ ທ່ານ ດວງມະນີ ຍອດສີອຸດົມໄດ້ສະແດງຄວາມຍິນດີເປັນຢ່າງຍິ່ງ ແລະ ຖືເປັນກຽດຢ່າງສູງ ທີ່ ພະນະທ່ານ ປະທານາທິບໍດີຍິນດີຮັບເອົາຜູ້ກ່ຽວ ແລະ ໃຫ້ກຽດຮັບສານຕາຕັ້ງດັ່ງກ່າວ, ຊຶ່ງໃນໂອກາດດຽວກັນນີ້ ທ່ານ ເອກອັກຄະລັດຖະທູດຍັງໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ ພ້ອມດ້ວຍຄໍາອວຍພອນໄຊອັນປະເສີດ ແລະ ຄວາມຮັກແພງຖານເພື່ອນມິດຈາກ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ, ເຖິງ ພະນະທ່ານ ໄມເຄິລ ຮິກກິນສ໌, ປະທານາທິບໍດີ ແຫ່ງ ອຽກລັງ ແລະ ຜ່ານພະນະທ່ານປະທານາທິບໍດີໄປຍັງປະຊາຊົນ ແລະ ລັດຖະບານແຫ່ງອຽກລັງ, ໄດ້ສະແດງຄວາມຂອບໃຈຕໍ່ການສະໜັບສະໜູນ ແລະ ຊ່ວຍເຫລືອອັນລໍ້າຄ່າຕໍ່ການພັດທະນາເສດຖະກິດ ແລະ ສັງຄົມ ສປປ ລາວໃນໄລຍະຜ່ານມາ, ພ້ອມທັງໃຫ້ຄໍາໝັ້ນສັນຍາວ່າ ໃນໄລຍະເວລາການປະຕິບັດໜ້າທີ່ທາງການທູດຂອງຕົນ, ຈະພະຍາຍາມຕັ້ງໜ້າເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດໃນຂົງເຂດຕ່າງໆໃຫ້ດີຍິ່ງຂຶ້ນເລື້ອຍໆ. ທ່ານ ປະທານາທິບໍດີ ໄດ້ສະແດງຄວາມຊົມເຊີຍ ແລະ ຍິນດີຕ້ອນຮັບ ທ່ານ ເອກອັກຄະລັດຖະທູດ ທີ່ໄດ້ຮັບການແຕ່ງຕັ້ງຢ່າງສົມກຽດ ເພື່ອມາດຳລົງຕໍາແໜ່ງ ແລະ ປະຕິບັດໜ້າທີ່ເປັນເອກອັກຄະລັດຖະທູດ ແຫ່ງ ສປປ ລາວ ຄົນໃໝ່ ປະຈຳ ອຽກລັງ, ພ້ອມທັງໄດ້ສົ່ງຄໍາຢື້ຢາມຖາມຂ່າວອັນອົບອຸ່ນ ແລະ ອວຍພອນໄຊອັນປະເສີດມາຍັງ ພະນະທ່ານ ທອງລຸນ ສີສຸລິດ, ປະທານປະເທດ, ລັດຖະບານ ແລະ ປະຊາຊົນລາວ ທຸກຖ້ວນໜ້າ, ພ້ອມທັງອວຍພອນໄຊໃຫ້ ທ່ານ ເອກອັກຄະລັດຖະທູດປະຕິບັດໜ້າທີ່ການທູດຂອງຕົນດ້ວຍຜົນສຳເລັດຢ່າງສູງ ແລະ ຈົບງາມ.
ພາຍຫຼັງພິທີຍື່ນສານຕາຕັ້ງ, ທ່ານເອກອັກຄະລັດຖະທູດ ໄດ້ເຂົ້າຮ່ວມງານດື່ມຊາແບບວົງແຄບ ຮ່ວມກັບ ບັນດາເອກອັກຄະລັດຖະທູດປະເທດອື່ນໆທີ່ໄດ້ເດີນທາງໄປຍື່ນສານຕາຕັ້ງເຊັ່ນດຽວກັນ, ໂດຍເປັນການເຈົ້າພາບ ຂອງທ່ານປະທານາທິບໍດີ ອຽກລັງ, ເຊິ່ງການຍື່ນສານຕາຕັ້ງ ຂອງ ທ່ານເອກອັກຄະລັດຖະທູດລາວ ຕໍ່ທ່ານປະທານາທິບໍດີ ອຽກລັງ ໃນຄັ້ງນີ້ ມີທັງລັກສະນະທາງການທີ່ເຂັ່ງຂຶມທາງດ້ານພິທີການ ແລະ ລັກສະນະຄອບຄົວທີ່ເຕັມໄປດ້ວຍບັນຍາກາດ ອົບອຸ່ນ ແລະ ປະສົບຜົນສຳເລັດຢ່າງຈົບງາມ. ໃນການເດີນທາງໄປຄັ້ງນີ້, ທ່ານເອກອັກຄະລັດຖະທູດ ຍັງຖືໂອກາດເຂົ້າຢ້ຽມຢາມ ແລະ ພົບປະກັບທ່ານຫົວໜ້າກົມພິທິການທູດ ແລະ ທ່ານຫົວໜ້າກົມອາຊີ-ປາຊີຟິກ, ກະຊວງການຕ່າງປະເທດ ອຽກລັງ ເພື່ອເປັນການສະເໜີຕົວ, ແລກປ່ຽນຄຳຄິດເຫັນ ແລະ ປຶກສາຊ່ອງທາງໃນການສືບຕໍ່ເສີມຂະຫຍາຍການພົວພັນຮ່ວມມື ລະຫວ່າງສອງປະເທດ ໃນຂົງເຂດທີ່ມີຄວາມເປັນໄປໄດ້ຮ່ວມກັນ.
ອຽກລັງ ແມ່ນເປັນປະເທດໜຶ່ງທີ່ມີຄວາມເຂັ້ມແຂງທາງດ້ານອຸດສະຫະກໍາ ແລະ ກະສິກໍາເພື່ອສົ່ງອອກ, ຕັ້ງຢູ່ທາງທິດຕາເວັນຕົກສ່ຽງເໜືອຂອງທະວີບເອີຣົບ, ມີຊາຍແດນຕິດກັບສະຫະລາຊະອານາຈັກອັງກິດ ແລະ ເປັນສະມາຊິກຂອງສະຫະພາບເອີຣົບ. ສປປລາວ ແລະ ອຽກລັງ ໄດ້ສ້າງຕັ້ງສາຍພົວພັນການທູດໃນວັນທີ 07 ສິງຫາ 1998 ໂດຍມີສະຖານທູດລາວ ຕັ້ງຢູ່ນະຄອນຫລວງ ລອນດອນ, ສ. ອັງກິດ ທີ່ຮັບຜິດຊອບປະເທດອຽກລັງ ແລະ ສະຖານທູດ ອຽກລັງ ທີ່ມີສໍານັກງານຕັ້ງຢູ່ ຮ່າໂນ້ຍ, ສສ. ຫວຽດນາມ ຮັບຜິດຊອບ ປະເທດລາວເຮົາ. ນັບຕັ້ງແຕ່ສ້າງສ້າຍພົວພັນການທູດນໍາກັນ ສອງປະເທດ ໄດ້ຮ່ວມມືກັນຢ່າງຕັ້ງໜ້າທັງໃນຂອບສອງຝ່າຍ ແລະ ຫຼາຍຝ່າຍ ເປັນຕົ້ນແມ່ນ ການຮ່ວມມືກັບສະຖາບັນການທ່ອງທ່ຽວ ແລະ ການໂຮງແຮມ ແຫ່ງຊາດຂອງລາວເຮົາ, ການຊ່ວຍເຫຼືອຜ່ານໂຄງການ ເກັບກູ້ລະເບີດບໍ່ທັນແຕກຢູ່ ສປປ ລາວ ແລະ ໂຄງການພັດທະນາຊັບພະຍາກອນມະນຸດ ກໍຄື ຍົກລະດັບຄວາມຮູ້ຄວາມສາມາດໃຫ້ແກ່ພະນັກງານພາກລັດ, ເປັນຕົ້ນແມ່ນການໃຫ້ທຶນການສຶກສາລະດັບປະລິນຍາໂທ ເພື່ອໄປສຶກສາຮໍ່າຮຽນຢູ່ ອຽກລັງ ແລະ ສະໜັບສະໜູນໃຫ້ທຶນຝຶກອົບຮົມເພື່ອສ້າງຄວາມເຂັ້ມແຂງທາງດ້ານພາສາອັງກິດຢູ່ກັບທີ່.