ໃນວັນທີ 20 ມິຖຸນາ 2022 ນີ້, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງຝູ​ເຖາະ. ໃນໂອກາດນີ້, ສະຫາຍ ແສງເພັດ ຮຸ່ງບຸນຍວງ ກໍໄດ້ພົບປະ ແລະ ເຮັດວຽກກັບ ສະຫາຍ ບູຍ ວັນ ກວາງ, ຮອງເລຂາພັກແຂວງ, ປະທານຄະນະ​ກຳ​ມະ​ການ​ປະຊາຊົນແຂວງຝູເຖາະ ຊຶ່ງໃນການພົບປະຄັ້ງນີ້, ການນໍາແຂວງ ກໍໄດ້ສະແດງຄວາມຍິນດີຕ້ອນຮັບ, ຕີລາຄາສູງທີ່ສະຫາຍເອກອັກຄະລັດຖະທູດ ພ້ອມຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງຂອງຕົນ

ເປັນການປະກອບສ່ວນເຂົ້າສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ ປີ 2022 ຄື: ວັນ​ສ້າງ​ຕັ້ງ​ສາຍ​ພົວພັນ​ການ​ທູດລາວ-ຫວຽດນາມ ຄົບຮອບ 60 ປີ ​ແລະ ວັນ​ເຊັນ​ສົນທິສັນຍາ​ມິດຕະພາບ ​ແລະ ການ​ຮ່ວມ​ມື​ລາວ-ຫວຽດນາມ ຄົບຮອບ 45 ປີ. ພ້ອມ​ດຽວ​ກັນ​ນັ້ນ ສະຫາຍ ບູຍ ວັນ ກວາງ ໄດ້ລາຍ​ງານ​ໃຫ້​ຊາບ​ໂດຍ​ຫຍໍ້​ກ່ຽວ​ກັບ​ການ​ພັດທະນາ​ເສດຖະກິດ​-ສັງຄົມ​ຂອງ​ແຂວງ​ໃນ​ 25 ປີທີ່ຜ່ານມາ, ແຂວງໄດ້ມີກົນໄກ, ນະໂຍບາຍຕ່າງໆທີ່ຖືກຕ້ອງໃນການດຶງດູດນັກລົງທຶນ ຈົນເຮັດໃຫ້ການພັດທະນາເສດຖະກິດ-ສັງຄົມນັບມື້ນັບມີການຂະຫຍາຍຕົວຢ່າງຕໍ່ເນື່ອງ ໂດຍຖືເອົາຂະແໜງກະສິກໍາ, ອຸດສາຫະກຳ, ການທ່ອງທ່ຽວ ແລະ ການບໍລິການເປັນຕົວຂັບເຄື່ອນ ແລະ ສາມາດເກັບລາຍຮັບໃຫ້ສູນກາງໄດ້ຕາມແຜນການ. ສ່ວນການພົວພັນຮ່ວມມືກັບສາກົນ ໂດຍສະເພາະແມ່ນການຮ່ວມມືສອງຝ່າຍກັບ ສປປ ລາວ ເພື່ອເປັນການສືບຕໍ່ເສີມຂະຫຍາຍສາຍພົວພັນມິດຕະພາບທີ່ດີງາມມາແຕ່ດົນນານຂອງສອງຊາດລາວ-ຫວຽດນາມ, ແຂວງຝູເຖາະ ໄດ້ຜັນຂະຫຍາຍແນວທາງ, ນະ ໂຍບາຍຂອງສອງພັກ, ລັດສອງ ຢ່າງຕັ້ງໜ້າ ໂດຍໄດ້ເອົາໃຈໃສ່ໃນການຮັດແໜ້ນສາຍການພົວພັນຮ່ວມມືກັບບັນດາແຂວງພາກເໜືອຂອງ ສປປ ລາວ; ສອງຝ່າຍໄດ້ມີການພົບປະ, ແລກປ່ຽນຄະນະຜູ້ແທນ, ຊ່ວຍເຫຼືອ, ສະໜັບສະໜູນຊຶ່ງກັນ ແລະ ກັນຢ່າງເປັນປົກກະຕິ.

ສະຫາຍເອກອັກຄະລັດຖະທູດ ກໍໄດ້ສະແດງຄວາມຂອບໃຈຢ່າງ​ຈິງ​ໃຈ​ມາ​ຍັງ​ຄະນະ​ນຳ​ຂອງ​ແຂວງທີ່ໄດ້ໃຫ້ການຕ້ອນຮັບຢ່າງອົບອຸ່ນຄັ້ງນີ້ ພ້ອມທັງຕີລາຄາສູງຕໍ່ການພົວພັນຮ່ວມມືລະຫວ່າງແຂວງຝູເຖາະ ກັບບັນດາແຂວງພາກເໜືອຂອງລາວ ໃນໄລຍະຜ່ານມາ ແລະ ໄດ້ຢືນຢັນວ່າ: ຈະເຮັດສຸດຄວາມສາມາດຂອງຕົນ ເພື່ອເປັນຂົວຕໍ່ໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດເວົ້າລວມ ເວົ້າສະເພາະແມ່ນແຂວງຝູເຖາະ ກັບບັນດາແຂວງພາກເໜືອຂອງລາວໃຫ້ນັບມື້ແຕກດອກອອກຜົນ ແລະ ຈະເລີນງອກງານຍິ່ງໆຂຶ້ນ.

ຈາກນັ້ນໃນຕອນ​ບ່າຍຂອງວັນດຽວກັນ, ສະຫາຍເອກອັກຄະລັດຖະທູດ ພ້ອມດ້ວຍຄະນະ ກໍໄດ້ໄປຢ້ຽມ ຢາມ ແລະ ພົບປະ ກັບ ສະຫາຍ ພົນ​ຈັດຕະວາ ຟ້າມ ຫົງ ​ເຈືອງ,  ຜູ້​ບັນຊາ​ການ​ທະຫານ​ເຂດ 02 ​ໂອກາດ​ດັ່ງກ່າວ ສະຫາຍ​ເອກ​ອັກຄະ​ລັດຖະທູດ​ກໍໄດ້ສືບຕໍ່​ຢືນຢັນວ່າ: ຈະເຮັດສຸດຄວາມສາມາດຂອງຕົນ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດເວົ້າລວມ ເວົ້າສະເພາະແມ່ນແຂວງຝູເຖາະ ແລະ ກອງບັນຊາການທະຫານເຂດ 02 ຂອງຫວຽດນາມກັບບັນດາແຂວງພາກ​ເໜືອ​ຂອງ​ລາວ ແລະ ກອງທັບປະຊາຊົນລາວ, ສະແດງຄວາມຂອບໃຈຢ່າງຈິງໃຈມາຍັງພັກ, ລັດ, ກອງທັບ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການສະໜັບສະໜູນ, ຊ່ວຍເຫຼືອ, ຄຽງບ່າຄຽງໄຫຼ່ກັບປະຊາຊົນລາວຕະຫຼອດມາ ບໍ່ວ່າຈະໃນສະໄໝຕໍ່ສູ້ປົດປ່ອຍຊາດ ກໍຄືການປະຕິບັດສອງໜ້າທີ່ຍຸດທະສາດໃນການປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ ຊຶ່ງເປັນການສະແດງໃຫ້ເຫັນເຖິງຄວາມສະໜິດສະໜົມ, ໝົດຈິດໝົດໃຈຂອງພັກ, ລັດ, ກອງທັບ ແລະ ປະຊາຊົນຫວຽດນາມ ທີ່ມີຕໍ່ ສປປ ລາວ.  

ຕອນ​ເຊົ້າ​ຂອງ​ວັນ​ດຽວ​ກັນ​, ຄະນະ​ໄດ້​ໄປ​ຢ້ຽມຢາມ​ພົບ​ປະ ​ແລະ ​ເຮັດ​ວຽກ​ຮ່ວມ​ກັບ​ຄະນະ​ອຳ​ນວຍ​ການ, ຄູ​ອາຈານ ​ແລະ ນັກ​ສຶກສາລາ​ວທີ່​ມະຫາວິທະຍາ​ໄລ​ຮຸ່ງ​ເວື​ອງ, ປັດຈຸບັນມີນັກສຶກສາລາວທັງໝົດ 193 ຄົນ ທີ່ກຳລັງຮຽນຢູ່​ມະຫາວິທະຍາໄລດັ່ງກ່າວ ທີ່​ມາ​ຈາກບັນດາ​ແຂວງ​ພາກ​ເໜືອຂອງ​ລາວຄື: ແຂວງຫຼວງນ້ຳທາ, ອຸດົມໄຊ, ຜົ້ງສາລີ, ບໍ່ແກ້ວ ​ແລະ ​ແຂວງຫຼວງພະບາງ. ​ໃນ​ການ​ພົບ​ປະ ​ໂອ້​ລົມ ສະຫາຍເອກອັກຄະລັດຖະທູດ ກໍໄດ້ເນັ້ນໜັກໃຫ້ນັກສຶກສາ ເອົາໃຈໃສ່ໃນການເພີ່ມທະວີການຝຶກຝົນຫຼໍ່ຫຼອມຕົວເອງໃຫ້ຫຼາຍຂຶ້ນກວ່າເກົ່າ​ໃນ​ການ​ຍາດ​ແຍ່ງ​ເອົາ​ຄວາມ​ຮູ້​ກັບ​ໄປ​ພັດທະນາ​ປະ​ເທດ​ຊາດ, ພ້ອມ​ທັງ​ຮຽກຮ້ອງ​ໃຫ້​ນັກຮຽນ, ນັກ​ສຶກສາຫຼຸດຜ່ອນການຫຼິ້ນກິນຟຸ່ມເຟືອຍ, ເນັ້ນຄຸນນະພາບຂອງການສຶກສາ, ເພີ່ມທະວີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ ຄຽງຄູ່ກັບການເຄົາລົບ ແລະ ປະຕິບັດຕາມກົດໝາຍຂອງປະເທດເຈົ້າພາບ ກໍຄືກົດລະບຽບຂໍ້ກຳນົດຕ່າງໆຂອງສະຖາບັນການສຶກສາວາງອອກ ຢ່າງເຂັ້ມງວດ.