ໃນວັນທີ 21 ເມສາ 2022, ທີ່ ທໍານຽບປະທານາທິບໍດີແຫ່ງ ສາທາລະນະລັດ ມານຕາ, ນະຄອນຫຼວງ ວາແລັດຕາ, ທ່ານ ລັດສະໝີ ແກ້ວມະນີ ໄດ້ເຂົ້າຍື່ນສານຕາຕັ້ງຕໍ່ ພະນະທ່ານ ດຣ. ຈອດສ໌ ເວວລາ (Dr. George Vella), ປະທານາທິບໍດີແຫ່ງ ສາທາລະນະລັດ ມານຕາ ເພື່ອດໍາລົງຕໍາແໜ່ງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະນະລັດ ມານຕາ ໂດຍມີສຳນັກງານຕັ້ງຢູ່ ເຊີແນວ, ປະເທດ ສະວິດສ.

            ພາຍຫຼັງພິທີຍື່ນສານສຳເລັດລົງ, ທ່ານທູດ ລັດສະໝີ ແກ້ວມະນີ ກໍ່ໄດ້ຢ້ຽມຂໍ່ານັບ ແລະ ພົບປະໂອ້ລົມກັບ ພະນະທ່ານປະທານາທິບໍດີມານຕາ ດ້ວຍ​ບັນ​ຍາ​ກາດ​​ໄມ​ຕີ​ຈິດມິດຕະພາບ​ອັນ​ດີ ຊຶ່ງທູດລາວໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຂອງ ພະນະທ່ານ ທອງລຸນ ສີສຸລິດ, ປະທານປະເທດແຫ່ງ ສປປ ລາວ ເຖິງ ພະນະທ່ານ ປະທານາທິບໍດີ ແລະ ຜ່ານພະນະທ່ານໄປຍັງລັດຖະບານ ແລະ ປະຊາຊົນມານຕາທຸກຖ້ວນໜ້າ. ພ້ອມກັນນັ້ນ, ທ່ານປະທານາທິບໍດີມານຕາ ກໍ່ໄດ້ສະແດງຄວາມຂອບໃຈ ແລະ ສົ່ງຄຳອວຍພອນຢ້ຽມຢາມຖາມຂ່າວຄືນ ເຖິງຄູ່ຮ່ວມຕຳແໜ່ງ ເຊັ່ນດຽວກັນ, ພ້ອມທັງສະແດງຄວາມຍິນດີຕ້ອນຮັບທູດລາວຄົນໃໝ່ ແລະ ອວຍພອນໃຫ້ທ່ານທູດ ປະສົບຜົນສຳເລັດໃນການປະຕິບັດໜ້າທີ່ການທູດທຸກປະການ. ທ່ານທູດ ລັດສະໝີ ແກ້ວມະນີ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ຄຳອວຍພອນອັນຈົບງາມດັ່ງກ່າວ ແລະ ຢືນຢັນວ່າຈະປະຕິບັດໜ້າທີ່ຂອງຕົນໃຫ້ດີ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ສາທາລະນະລັດ ມານຕາ ໃຫ້ນັບມື້ນັບດີຂຶ້ນ.

           ໃນໂອກາດໄປເຄື່ອນໄຫວຍື່ນສານຕາຕັ້ງໃນຄັ້ງນີ້, ທ່ານທູດລາວຄົນໃໝ່ ຍັງໄດ້ຢ້ຽມຢາມ ແລະພົບປະສອງຝ່າຍ ກັບ ທ່ານ ຄຣິດສະຕອບເຟີ ກູຕາຈາ (Mr. Christopher Cutajar) ຫົວໜ້າຫ້ອງການກະຊວງການຕ່າງປະເທດ, ເອີຣົບ ແລະການຄ້າ, ທ່ານ ກຣິບຕັນ ກຣີມາ (Hon. Clifton Grima) ລັດຖະມົນຕີກະຊວງສຶກສາທິການ, ກິລາ, ຊາວໜຸ່ມ, ການຄົ້ນຄວ້າ ແລະນະວັດຕະກໍາ ແລະ ທ່ານ ເກຣຕັນ ບາໂຕໂລ (Hon. Clayton Bartolo) ລັດຖະມົນຕີກະຊວງທ່ອງທ່ຽວ, ຊຶ່ງໄດ້ມີການແລກປ່ຽນຄຳຄິດຄຳເຫັນກ່ຽວກັບການເສີມຂະຫຍາຍການພົວພັນ ແລະຮ່ວມມືສອງຝ່າຍ ຕາມຄວາມສາມາດ ແລະ ທ່າແຮງຂອງສອງປະເທດ ໂດຍແນ່ໃສ່ການຮ່ວມມືທາງດ້ານເສດຖະກິດ-ສັງຄົມ ເຊັ່ນ: ການສຶກສາ, ການຝຶກອົບຮົມ, ການທ່ອງທ່ຽວ, ການຄ້າ, ການລົງທຶນ ແລະ ອື່ນໆ ລວມທັງການຮ່ວມມືໃນຂອບຫຼາຍຝ່າຍ ເຊັ່ນ: ອາຊຽນ-ສະຫະພາບເອີຣົບ ແລະ ອົງການສະຫະປະຊາຊາດ. ສປປ ລາວ ແລະ ມານຕາ ໄດ້ສ້າງຕັ້ງສາຍພົວພັນການທູດຮ່ວມກັນ ໃນວັນທີ 13 ມັງກອນ 2011.

-------------------------