ໃນວັນທີ 7 ກຸມພາ 2024 ເປັນວັນຄົບຮອບ 30 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ເບລາຣຸດຊີ, ເຊິ່ງໃນໂອກາດດັ່ງກ່າວນີ້, ສອງຝ່າຍໄດ້ມີການສະເຫຼີມສະຫຼອງວັນຄົບຮອບດັ່ງກ່າວໂດຍຜ່ານການແລກປ່ຽນສານຊົມເຊີຍ ລະຫວ່າງ ທ່ານ ສະເຫຼີມໄຊ    ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ເຊເກ ອາເລນິກ, ລັດຖະມົນຕີກະຊວງການຕ່າງປະເທດ ແຫ່ງ ສ. ເບລາຣຸດຊີ ທີ່ມີເນື້ອໃນດັ່ງນີ້:

ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສະແດງຄວາມປິຕິຍິນດີຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ສ. ເບລາຣຸດຊີ ຕະຫຼອດໄລຍະເວລາ 3 ທົດສະວັດຜ່ານມາ,  ເຊິ່ງໄດ້ຮັບການຮັດແໜ້ນ ແລະ ຂະຫຍາຍຕົວຢ່າງຕໍ່ເນື່ອງໃນຫຼາຍຂົງເຂດ, ທັງໃນຂອບສອງຝ່າຍ ແລະ ຫຼາຍຝ່າຍ ແລະ ໄດ້ສະແດງຄວາມຫວັງວ່າ ສາຍພົວພັນມິດຕະພາບ ແລະ ການຮ່ວມມືຂອງສອງປະເທດ ຈະສືບຕໍ່ເສີມຂະຫຍາຍຂຶ້ນສູ່ລະດັບໃໝ່ ເພື່ອຜົນປະໂຫຍດຂອງປະຊາຊົນສອງປະເທດ.

ໃນໂອກາດດຽວກັນນີ້, ທ່ານ ເຊເກ ອາເລນິກ, ລັດຖະມົນຕີກະຊວງການຕ່າງປະເທດ ແຫ່ງ ສ. ເບລາຣຸດຊີ ກໍ່ໄດ້ສົ່ງສານຊົມເຊີຍເຖິງ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ເພື່ອສະແດງຄວາມຊົມເຊີຍຕໍ່ການພົວພັນ ແລະ ຮ່ວມມືອັນມີໝາກມີຜົນ ແລະ ຜົນສໍາເລັດຫຼາຍອັນ  ລະຫວ່າງສອງປະເທດ ໃນໄລຍະຜ່ານມາ ໂດຍສະເພາະໃນການພັດທະນາການຮ່ວມມືໃນຂົງເຂດການເມືອງ, ການຄ້າ, ເສດຖະກິດ ແລະ ມະນຸດສະທໍາ. ທ່ານລັດຖະມົນຕີກະຊວງການຕ່າງປະເທດ ແຫ່ງ ສ. ເບລາຣຸດຊີ ຢືນຢັນຈະສືບຕໍ່ເສີມຂະຫຍາຍການພົວພັນຮ່ວມມືກັບ ສປປ ລາວ ໃນຕໍ່ໜ້າ ແລະ ສະໜັບສະໜູນການເປັນປະທານອາຊຽນຂອງ ສປປ ລາວ.